CP Sajjanar: పోలీస్ స్టేషన్‌లో ఇక లాంగ్వేజ్ ప్రాబ్లమ్స్ క్లోజ్.. సీపీ సజ్జనార్ చేతుల మీదుగా ‘AI Copwriter’ యాప్ లాంచ్!

CP Sajjanar: పోలీసింగ్ రంగంలో సరికొత్త సాంకేతికతకు హైదరాబాద్ నగరం వేదికైంది. దేశంలోనే మొట్టమొదటి ఆర్టిఫిషియల్ ఇంటెలిజెన్స్ (AI) ఆధారిత ఫిర్యాదు రికార్డర్‌ ‘ఏఐ కాప్‌రైటర్‌’ (AI Copwriter) మొబైల్ యాప్‌ను హైదరాబాద్ పోలీస్ కమిషనర్ (CP) వి.సి. సజ్జనార్ అధికారికంగా ఆవిష్కరించారు. బ్లూక్లౌడ్ సాఫ్టెక్ సొల్యూషన్స్ (Bluecloud Softech Solutions) సహకారంతో ఈ వినూత్న యాప్‌ను రూపొందించారు.

ఈ సందర్భంగా సీపీ సజ్జనార్ మాట్లాడుతూ.. శాంతిభద్రతల పరిరక్షణలో, బాధితులకు వేగంగా న్యాయం చేయడంలో సాంకేతికత కీలక పాత్ర పోషిస్తుందని అన్నారు. "భాష అనేది ఎట్టి పరిస్థితుల్లోనూ న్యాయానికి అడ్డంకి కాకూడదన్నదే మా సంకల్పం. అందుకే ఈ ఏఐ టెక్నాలజీని తీసుకువచ్చాం" అని ఆయన స్పష్టం చేశారు.

10కి పైగా భాషల్లో ఫిర్యాదులు.. 'ఏఐ కాప్‌రైటర్‌' ప్రత్యేకతలు ఇవే:

ఈ యాప్ ద్వారా పోలీస్ స్టేషన్‌కు వచ్చే బాధితులు తమకు నచ్చిన భాషలో సమస్యను వివరిస్తే చాలు, ఏఐ సిస్టమ్ దాన్ని సులభతరం చేస్తుంది.

మల్టీ-లింగ్వల్ సపోర్ట్: 10కి పైగా ప్రాంతీయ, అంతర్జాతీయ భాషల్లో ఫిర్యాదులను రికార్డ్ చేసే సదుపాయం ఉంది.

వాయిస్ టు టెక్స్ట్ కన్వర్షన్: బాధితులు చెప్పిన వివరాలను ఈ యాప్ వెంటనే టెక్స్ట్‌ రూపంలోకి మార్చి, అవసరమైన భాషలోకి అనువదిస్తుంది (Translation).

ఆటోమేటిక్ పీడీఎఫ్ (PDF): ఫిర్యాదు వివరాలన్నీ ఆటోమేటిక్‌గా పీడీఎఫ్ ఫార్మాట్‌లో సేవ్ అవుతాయి. దీనివల్ల కాగిత రహిత (Paperless) ప్రక్రియ వేగవంతం అవుతుంది.

ఎవరికి పెద్ద ఊరట?: ఇతర రాష్ట్రాల నుంచి వచ్చే వలస కార్మికులు, పర్యాటకులు, అలాగే సాంకేతికతపై పెద్దగా అవగాహన లేని మహిళలు, వృద్ధులకు ఈ యాప్ పెద్ద ఊరటనిస్తుందని సీపీ సజ్జనార్ తెలిపారు.

తొలి విడతగా 80+ పోలీస్ స్టేషన్లలో అమలు

ఈ ప్రాజెక్టును ప్రాథమికంగా హైదరాబాద్ పరిధిలోని 80కి పైగా పోలీస్ స్టేషన్లలో అందుబాటులోకి తీసుకురానున్నారు. బ్లూక్లౌడ్ సాఫ్టెక్ సొల్యూషన్స్ భాగస్వామ్యంతో వచ్చిన ఈ ‘ఏఐ కాప్‌రైటర్‌’ యాప్ వల్ల ఎఫ్‌ఐఆర్ (FIR) నమోదు ప్రక్రియ మరింత వేగంగా, ఎలాంటి తప్పులు లేకుండా కచ్చితత్వంతో పూర్తి చేయడానికి వీలవుతుంది. తద్వారా పోలీసుల సమయం కూడా చాలా వరకు ఆదా అవుతుందని ఉన్నతాధికారులు వెల్లడించారు.