Revanth Reddy: మక్తల్‌లో ఎత్తిపోతల పథకం పనులు పరిశీలించిన సీఎం రేవంత్‌ రెడ్డి

Revanth Reddy: ఉమ్మడి మహబూబ్‌నగర్ (పాలమూరు) జిల్లాలోని సాగునీటి ప్రాజెక్టుల నిర్మాణాలను వేగవంతం చేయడమే ఏకైక లక్ష్యంగా తెలంగాణ ముఖ్యమంత్రి ఎ. రేవంత్ రెడ్డి క్షేత్రస్థాయి పర్యటనకు శ్రీకారం చుట్టారు. తన రెండు రోజుల అధికారిక పర్యటనలో భాగంగా గురువారం నారాయణపేట జిల్లా, మక్తల్ మండలం కాట్రేవులపల్లి పరిధిలో శరవేగంగా సాగుతున్న 'మక్తల్-నారాయణపేట-కొడంగల్ ఎత్తిపోతల పథకం' పనులను సీఎం రేవంత్ రెడ్డి స్వయంగా పరిశీలించారు. ఈ పర్యటనలో ఆయనతో పాటు రాష్ట్ర నీటిపారుదల శాఖ మంత్రి నలమడ ఉత్తమ్ కుమార్ రెడ్డి, మంత్రులు జూపల్లి కృష్ణారావు, వాకిటి శ్రీహరి తదితర ముఖ్య నేతలు ఉన్నారు.

ప్రాజెక్టు నిర్మాణ స్థలంలో సీఎం రేవంత్ రెడ్డి సాగునీటి పనుల పురోగతిపై ఇంజనీరింగ్, నీటిపారుదల శాఖ ఉన్నతాధికారులతో సుదీర్ఘంగా చర్చించారు. పనుల్లో నాణ్యత పాటిస్తూనే, నిర్దేశిత గడువులోగా కాలువలు, పంప్‌హౌస్‌ల పనులను పూర్తి చేయాలని అధికారులకు పలు కీలక సూచనలు చేశారు. అనంతరం ప్రాజెక్టు డిజైన్, మ్యాప్‌లతో అక్కడ ఏర్పాటు చేసిన ప్రత్యేక ఫోటో గ్యాలరీని ముఖ్యమంత్రి, మంత్రుల బృందం ఆసక్తిగా తిలకించింది.

ఉమ్మడి మహబూబ్‌నగర్ జిల్లాలో గురు, శుక్రవారాల్లో (రెండు రోజుల పాటు) సీఎం రేవంత్ రెడ్డి పర్యటన సుదీర్ఘంగా కొనసాగనుంది. గతంలో ఎన్నడూ లేనివిధంగా ఉమ్మడి జిల్లాలోని అన్ని ప్రధాన సాగునీటి ప్రాజెక్టుల స్థితిగతులను ఆయన స్వయంగా అంచనా వేయనున్నారు.

ముఖ్యమంత్రి ప్రధానంగా ఫోకస్ చేయనున్న ప్రాజెక్టులు ఇవే:

పాలమూరు-రంగారెడ్డి ఎత్తిపోతల పథకం (PRLI)

మక్తల్ - నారాయణపేట - కొడంగల్ ఎలిఫ్ట్ ఇరిగేషన్

కల్వకుర్తి ఎత్తిపోతల పథకం

ప్రియదర్శిని జూరాల ప్రాజెక్టు & నెట్టెంపాడు

ఈ ప్రాజెక్టుల పరిధిలోని ప్రధాన రిజర్వాయర్లు, పంప్‌హౌస్‌లు, కాలువలు (Canals) మరియు డెలివరీ సిస్టర్న్‌ల పనులను ఆయన క్లోజ్‌గా మానిటర్ చేయనున్నారు. ఇదివరకు పూర్తయిన ప్రాజెక్టులు, ప్రస్తుతం రన్నింగ్‌లో ఉన్న పనులు, భవిష్యత్తులో కొత్తగా చేపట్టబోయే ప్రాజెక్టుల యాక్షన్ ప్లాన్‌పై అధికారులతో ఉన్నత స్థాయి రివ్యూ మీటింగ్స్ నిర్వహించనున్నారు.

గురువారం మక్తల్ నియోజకవర్గం నుంచి అత్యంత ప్రతిష్టాత్మకంగా ప్రారంభమైన సీఎం రేవంత్ రెడ్డి పాలమూరు ప్రాజెక్టుల బాట పర్యటన.. శుక్రవారం సాయంత్రం జడ్చర్లలో నిర్వహించబోయే భారీ బహిరంగ సభతో ముగియనుంది. ముఖ్యమంత్రి హోదాలో ఉమ్మడి జిల్లా సాగునీటి కష్టాలను తీర్చేందుకు రేవంత్ రెడ్డి స్వయంగా రంగంలోకి దిగడంతో స్థానిక రైతాంగంలో కొత్త ఆశలు చిగురిస్తున్నాయి.