పాత Android ఫోన్లకు WhatsApp గుడ్‌బై.. ఇక ఈ ఫోన్లలో పనిచేయదు.!

Android phones: వాట్సాప్ యూజర్లకు కీలక అలర్ట్. పాత ఆండ్రాయిడ్ వెర్షన్లు ఉపయోగిస్తున్న ఫోన్ యూజర్లకు వాట్సాప్ సేవలు నిలిచిపోయాయి. సెప్టెంబర్ 8, 2026 నుంచి Android 5.0, 5.1 (Lollipop) ఆపరేటింగ్ సిస్టమ్‌తో పనిచేసే ఫోన్లకు WhatsApp సపోర్ట్‌ను నిలిపివేసింది.

ఈ విషయాన్ని WABetaInfo తన తాజా నివేదికలో వెల్లడించింది. ఇకపై ఈ పాత వెర్షన్లలో వాట్సాప్‌ను ఉపయోగించేందుకు అవకాశం ఉండదు. యాప్ ఓపెన్ చేసినప్పుడు సపోర్ట్ నిలిచిపోయినట్లు అలర్ట్ మెసేజ్ కనిపించే అవకాశం ఉంది.

ఏ ఫోన్లపై ప్రభావం?

ప్రధానంగా Android 5.0, 5.1 వెర్షన్లతో నడిచే స్మార్ట్‌ఫోన్లు ఈ మార్పు కారణంగా ప్రభావితమవుతాయి. ఇకపై వాట్సాప్‌ను కొనసాగించాలంటే ఫోన్‌లో కనీసం Android 6.0 Marshmallow లేదా అంతకంటే కొత్త వెర్షన్ ఉండాలి. అయితే మీ ఫోన్‌కు సాఫ్ట్‌వేర్ అప్‌డేట్ అందుబాటులో ఉంటే సమస్యను సులభంగా పరిష్కరించుకోవచ్చు. ఫోన్ సెట్టింగ్స్‌లోకి వెళ్లి సాఫ్ట్‌వేర్ అప్‌డేట్ ఉందో లేదో చెక్ చేసి, అందుబాటులో ఉంటే కొత్త వెర్షన్‌కు అప్‌డేట్ చేసుకోవచ్చు.

అప్‌డేట్ లేకపోతే ఏం చేయాలి?

చాలా పాత మోడళ్లకు ఇకపై కొత్త Android అప్‌డేట్లు అందే అవకాశం ఉండదు. అలాంటి ఫోన్లలో వాట్సాప్‌ను తిరిగి ఉపయోగించడం సాధ్యం కాకపోవచ్చు. ఈ సందర్భంలో కొత్త స్మార్ట్‌ఫోన్‌కు మారడం తప్ప మరో మార్గం ఉండదు. కాబట్టి మీ ఫోన్ Android 5.0 లేదా 5.1పై పనిచేస్తుంటే.. ముందుగా సాఫ్ట్‌వేర్ అప్‌డేట్ ఆప్షన్ ఉందో లేదో చెక్ చేసుకోవడం మంచిది.

వాట్సాప్ ఎందుకు ఈ నిర్ణయం తీసుకుంది?

వాట్సాప్ ఈ మార్పును అకస్మాత్తుగా తీసుకోలేదు. పాత Android వెర్షన్లకు సపోర్ట్ నిలిపివేయనున్నట్లు కంపెనీ ఈ ఏడాది ఏప్రిల్‌లోనే ప్రకటించింది. కొత్త సెక్యూరిటీ అప్‌డేట్లు, ఫీచర్లు, సాంకేతిక మార్పులను చాలా పాత ఆపరేటింగ్ సిస్టమ్‌లు సపోర్ట్ చేయలేకపోతున్నాయి. దీంతో యూజర్లకు సురక్షితమైన, మెరుగైన సేవలను అందించేందుకు పాత వెర్షన్లకు సపోర్ట్‌ను తొలగించినట్లు తెలుస్తోంది.

లక్షలాది మంది యూజర్లపై ప్రభావం?

భారత్‌తో పాటు పాకిస్తాన్, బ్రెజిల్ వంటి దేశాల్లో ఇప్పటికీ పాత Android వెర్షన్లపై పనిచేసే ఫోన్లు కొంతమంది ఉపయోగిస్తున్నారు. దీంతో ఈ నిర్ణయం ఆయా యూజర్లపై ప్రభావం చూపే అవకాశం ఉంది. మొత్తంగా.. మీ ఫోన్ Android 5.0 లేదా 5.1పై పనిచేస్తుంటే వెంటనే సాఫ్ట్‌వేర్ అప్‌డేట్ చెక్ చేసుకోండి. అప్‌డేట్ అందుబాటులో లేకపోతే వాట్సాప్ వాడటానికి కొత్త ఫోన్ కొనాల్సి రావచ్చు.