Girigo App: కోరికలు తిర్చాటమే కాదు, ప్రాణాలు తీసే 'గిరిగో' యాప్..? అసలు సీక్రెట్ తెలిస్తే షాకే..!

Girigo App: ఊహకందని మలుపులతో సాగే కొరియన్ వెబ్ సిరీస్‌లు అంటే నేటి యువతకు ఎంతో క్రేజ్. ఈ క్రమంలోనే నెట్‌ఫ్లిక్స్‌లో వచ్చిన 'ఇఫ్ విషెస్ కుడ్ కిల్' (If Wishes Could Kill) అనే హారర్ సిరీస్ ప్రపంచవ్యాప్తంగా సంచలనం సృష్టిస్తోంది. అందులోని 'గిరిగో' యాప్ ఇప్పుడు ప్లే స్టోర్‌లో దర్శనమివ్వడంతో జనం భయాందోళనల మధ్యే డౌన్లోడ్ చేస్తున్నారు. అసలు ఈ యాప్ కథాకమీమామిషు ఏంటో తెలుసుకుందాం.

'ఇఫ్ విషెస్ కుడ్ కిల్' అనే కొరియన్ సిరీస్ కథ మొత్తం 'గిరిగో' అనే ఒక రహస్య యాప్ చుట్టూ తిరుగుతుంది. ఈ సిరీస్ ప్రకారం, ఈ యాప్‌లో మనం ఏదైనా కోరిక కోరితే అది వెంటనే నెరవేరుతుంది. కానీ, ఆ కోరికకు ప్రతిఫలంగా కోరిన వ్యక్తి ప్రాణాలను ఈ యాప్ బలి తీసుకుంటుంది. ఈ థ్రిల్లింగ్ కాన్సెప్ట్ ప్రేక్షకులకు బాగా నచ్చడంతో, సిరీస్ మేకర్స్ లేదా అభిమానులు అదే పేరుతో ఒక యాప్‌ను ప్లే స్టోర్‌లో అందుబాటులోకి తెచ్చారు.

సిరీస్‌లో చూపించిన విధంగానే ఈ యాప్ రూపురేఖలు ఉండటంతో, అది నిజంగానే కోరికలు తీరుస్తుందేమోనన్న భ్రమలో చాలామంది దీనిని ఇన్స్టాల్ చేసుకుంటున్నారు. సోషల్ మీడియాలో ఈ యాప్‌ను వాడుతూ వీడియోలు తీసి షేర్ చేయడం ఇప్పుడు ఒక కొత్త ట్రెండ్‌గా మారింది.

యాప్ లో ఏముంటుంది? ఇది ఎలా పనిచేస్తుంది?

మీరు గిరిగో యాప్‌ను ఓపెన్ చేయగానే, సిరీస్‌లో కనిపించే భయానక వాతావరణం మీ ఫోన్ స్క్రీన్‌పై కనిపిస్తుంది. యాప్ ఇంటర్ఫేస్ మొత్తం కొరియన్ భాషలో ఉంటుంది, దీనిని మార్చుకోవడానికి వీలుండదు.

ప్రార్థన ముద్ర: యాప్ హోమ్ పేజీలో రెండు చేతులు ప్రార్థన చేస్తున్నట్లుగా కనిపిస్తాయి.

వీడియో రికార్డింగ్: మీ కోరికను రికార్డ్ చేయడానికి ఇందులో ఒక ఆప్షన్ ఉంటుంది.

సబ్మిట్: రికార్డ్ చేసిన వీడియోను సబ్మిట్ చేయగానే, సిరీస్‌లో వచ్చే సౌండ్స్, విజువల్స్ వస్తాయి.

ఇది కేవలం ఒక 'రెప్లికా' యాప్ మాత్రమే. అంటే సిరీస్ అభిమానులకు ఆ అనుభూతిని కలిగించడానికి రూపొందించిన ఒక వినోద సాధనం. ఇది నిజంగా మీ కోరికలను తీర్చదు లేదా మీ ప్రాణాలకు హాని చేయదు. కానీ, డిజిటల్ పరంగా కొన్ని ప్రమాదాలు పొంచి ఉన్నాయి.

యాప్ డౌన్‌లోడ్ చేయడం సురక్షితమేనా?

చూడటానికి వినోదభరితంగా ఉన్నప్పటికీ, ఈ యాప్‌ను మీ స్మార్ట్‌ఫోన్‌లో ఇన్‌స్టాల్ చేయడం అంత సురక్షితం కాదని టెక్ నిపుణులు హెచ్చరిస్తున్నారు. దీనికి ప్రధాన కారణాలు ఇవే:

అనధికారిక యాప్: ఇది నెట్‌ఫ్లిక్స్ లేదా అధికారిక నిర్మాణ సంస్థ విడుదల చేసిన యాప్ కాదు. ఎవరో గుర్తుతెలియని డెవలపర్లు దీనిని రూపొందించారు.

ప్రైవసీ రిస్క్: మీ కోరికను రికార్డ్ చేసే క్రమంలో ఈ యాప్ మీ కెమెరా, మైక్రోఫోన్ యాక్సెస్‌ను అడుగుతుంది. మీ వ్యక్తిగత వీడియోలు ఎక్కడికి వెళ్తున్నాయో, ఎవరు చూస్తున్నారో తెలియదు.

డేటా చోరీ: ఈ యాప్ బ్యాక్‌గ్రౌండ్‌లో మీ ఫోన్‌లోని ఇతర డేటాను కూడా సేకరించే అవకాశం ఉంది. ఇలాంటి థర్డ్ పార్టీ యాప్‌లు మాల్వేర్‌లను కూడా ఫోన్‌లోకి చేరవేసే ప్రమాదం ఉంది.

పాపులర్ కల్చర్‌లో భాగంగా వచ్చే ఇలాంటి క్రేజీ యాప్‌ల పట్ల అప్రమత్తంగా ఉండాలి. కేవలం సరదా కోసం మీ వ్యక్తిగత డేటాను పణంగా పెట్టకండి. సిరీస్‌ను చూసి ఎంజాయ్ చేయడం వరకు పర్వాలేదు కానీ, గిరిగో వంటి యాప్‌లను ఇన్‌స్టాల్ చేసి మీ ప్రైవసీని రిస్క్‌లో పడేయకండి.

గిరిగో యాప్ కేవలం ఒక కాల్పనిక ప్రపంచానికి ప్రతిరూపం మాత్రమే. ఇది మీ కోరికలను తీర్చలేదు, అలాగే సిరీస్‌లో చూపించినట్లు ప్రాణాలు తీయలేదు. కానీ, మీ ఫోన్ భద్రతను మాత్రం దెబ్బతీయగలదు. కాబట్టి, ఇటువంటి 'వైరల్' యాప్‌ల జోలికి వెళ్లకపోవడమే ఉత్తమం.