Shortest Day : చరిత్రలోనే మహా వింత.. తగ్గనున్న 24 గంటల వ్యవధి.. శాస్త్రవేత్తలు షాక్

Shortest Day : ఈ సంవత్సరంలోనే అత్యంత తక్కువ నిడివి కలిగిన రోజుగా ఆదివారం రికార్డు కాబోతోంది. సాధారణంగా ఒక రోజుకు ఉండే పూర్తి 24 గంటల సమయంలో దాదాపు 0.65 మిల్లీ సెకన్ల సమయం తగ్గనున్నట్లు ప్రముఖ ఖగోళ శాస్త్రవేత్తలు వెల్లడించారు. ఈ మార్పు ఎంత వేగంగా జరుగుతుందంటే, మన కంటి రెప్పపాటు కంటే లేదా కెమెరా ఫ్లాష్ వెలిగి ఆరే సమయం కంటే కూడా చాలా తక్కువ. అందువల్ల మానవ మాత్రులమైన మనం ఈ స్వల్ప కాల పరిమితి మార్పును ఏమాత్రం ప్రత్యక్షంగా గమనించలేమని పరిశోధకులు స్పష్టం చేస్తున్నారు.

IERS సంచలన వివరాలు

ప్రపంచవ్యాప్తంగా సమయాలను, భూభ్రమణ వేగాలను నిరంతరం పర్యవేక్షించే ఇంటర్నేషనల్ ఎర్త్ రొటేషన్ అండ్ రెఫరెన్స్ సిస్టమ్స్ సర్వీస్ (IERS) సంస్థ ఈ విషయాన్ని అధికారికంగా ధృవీకరించింది. ప్రతిరోజూ ఉండే నిర్ణీత 24 గంటల సమయం లేదా 86,400 సెకన్ల వ్యవధిలో ఈ ఆదివారం 0.65 మిల్లీ సెకన్లు తగ్గనున్నాయి. గతంలో కూడా ఇలాంటి వింత పరిణామాలు నమోదయ్యాయని, గత ఏడాది జూలై 10వ తేదీన రోజువారీ సమయంలో ఏకంగా 1.37 మిల్లీ సెకన్ల సమయం తగ్గిందని సంస్థ తమ నివేదికలో గుర్తుచేసింది.

వాతావరణ మార్పులే ప్రధాన కారణం

భూభ్రమణంలో వస్తున్న ఈ హఠాత్ మార్పులకు మన భూమిపై వేగంగా జరుగుతున్న వాతావరణ మార్పులే ప్రధాన కారణమని శాస్త్రవేత్తలు విశ్లేషిస్తున్నారు. ప్రపంచవ్యాప్తంగా పెరుగుతున్న ఉష్ణోగ్రతల వల్ల ధ్రువ ప్రాంతాల వద్ద ఉన్న భారీ మంచు పలకలు, హిమనీనదాలు తీవ్రస్థాయిలో కరిగిపోతున్నాయి. ఈ మంచు కరిగి నీరుగా మారి భూమిపై పునర్విభజన చెందడం వల్ల భూమి భ్రమణ వేగం, ద్రవ్యరాశి పంపిణీపై ప్రభావం పడి, వేగంలో మార్పులు సంభవిస్తున్నాయని వారు వివరిస్తున్నారు.

36 లక్షల సంవత్సరాల తర్వాత సంభవిస్తున్న మార్పులు

శాస్త్రవేత్తల ప్రాథమిక అంచనాల ప్రకారం.. వాతావరణంలో సంభవిస్తున్న ఈ ప్రతికూల మార్పుల కారణంగా దాదాపు 36 లక్షల సంవత్సరాల సుదీర్ఘ కాలం తర్వాత భూభ్రమణ వేగంలో ఇలాంటి విచిత్రమైన మార్పులు నమోదు అవుతున్నాయి. భూమి తన అక్షం చుట్టూ తాను తిరిగే వేగంలో మార్పులు రావడం వల్ల అంతర్జాతీయ అటామిక్ క్లాక్‌ల సమయ సర్దుబాటుతో పాటు భవిష్యత్తులో సాంకేతిక వ్యవస్థలు, నావిగేషన్ ఉపగ్రహాల సమయ నియంత్రణపై కూడా స్వల్ప ప్రభావం పడే అవకాశం ఉందని నిపుణులు అభిప్రాయపడుతున్నారు.