Redmi 17 4G : రూ.10 వేలలోనే 7500mAh బ్యాటరీ.. Redmi 17 4G ఫీచర్స్ లీక్..

Redmi 17 4G : ప్రముఖ స్మార్ట్‌ఫోన్ తయారీ సంస్థ రెడ్‌మీ తన సరికొత్త బడ్జెట్ మోడల్ 'రెడ్‌మీ 17 4G' (Redmi 17 4G) ను మార్కెట్‌లోకి తీసుకురావడానికి సిద్ధమవుతోంది. అయితే ఈ హ్యాండ్‌సెట్ అధికారికంగా లాంచ్ కాకముందే దీనికి సంబంధించిన దాదాపు అన్ని హార్డ్‌వేర్ స్పెసిఫికేషన్లు, ఫీచర్లు ఆన్‌లైన్‌లో లీకై సోషల్ మీడియాలో హల్‌చల్ చేస్తున్నాయి. ప్రముఖ టిప్‌స్టర్ సుధాన్షు అంబోరే సోషల్ మీడియా ప్లాట్‌ఫామ్ 'ఎక్స్' (X) వేదికగా ఈ ఫోన్ స్పెసిఫికేషన్ షీట్‌ను షేర్ చేయడంతో దీనికి సంబంధించిన పూర్తి వివరాలు వెలుగులోకి వచ్చాయి.

మీడియాటెక్ ప్రాసెసర్, భారీ వర్చువల్ ర్యామ్

లీకైన వివరాల ప్రకారం, రెడ్‌మీ 17 4G స్మార్ట్‌ఫోన్ మీడియాటెక్ 'హెలియో G91 ఆల్ట్రా' (MediaTek Helio G91 Ultra) చిప్‌సెట్‌తో పనిచేయనుంది. వినియోగదారులకు సౌకర్యవంతమైన ఎంపికలను అందించేందుకు ఈ ఫోన్ నాలుగు విభిన్న వేరియంట్లలో లభించనుంది. ఇందులో 4GB + 128GB, 4GB + 256GB, 6GB + 128GB , 6GB + 256GB మోడళ్లు ఉన్నాయి. ఇవి LPDDR4X ర్యామ్, eMMC 5.1 స్టోరేజ్‌తో జతచేయబడతాయి. అదనంగా 12GB వరకు వర్చువల్ ర్యామ్ ఎక్స్‌పాన్షన్‌కు ఇది సపోర్ట్ చేస్తుంది. ఈ హ్యాండ్‌సెట్ అవుట్-ఆఫ్-ది-బాక్స్ షావోమి సరికొత్త 'హైపర్ ఓఎస్ 3' (HyperOS 3) తో రానుండటం విశేషం.

బిగ్ డిస్‌ప్లే.. స్మూత్ రిఫ్రెష్ రేట్

డిస్‌ప్లే విషయానికి వస్తే, ఈ ఫోన్‌లో 6.9 ఇంచుల హెచ్‌డీ+ (720 x 1,600 పిక్సెల్స్) డిస్‌ప్లేను అందించనున్నారు. ఇది 120Hz వరకు అడాప్టివ్ రిఫ్రెష్ రేట్‌ను కలిగి ఉండి, గేమింగ్ , వీడియోలు చూసేటప్పుడు స్మూత్ అనుభూతిని ఇస్తుంది. సాధారణ బ్రైట్‌నెస్ 675 నిట్స్ ఉండగా, హై బ్రైట్‌నెస్ మోడ్‌లో 825 నిట్స్ వరకు సపోర్ట్ చేస్తుంది. కంటి రక్షణ కోసం 'ట్యూవ్ రీన్‌లాండ్' సర్టిఫికేషన్లు , స్క్రీన్ భద్రత కోసం గొరిల్లా గ్లాస్ 7i ప్రొటెక్షన్ అందించనున్నారు. ఈ ఫోన్ ఓక్ గ్రీన్, డీప్ బ్లూ, బ్లాక్ , లోటస్ పర్పుల్ రంగుల్లో అందుబాటులోకి రానుంది. దుమ్ము, నీటి చుక్కల నుండి రక్షణ కోసం IP64 రేటింగ్‌తో పాటు ఆకర్షణీయమైన 'డైనమిక్ ఆర్‌జిబి' (RGB) లైటింగ్ కూడా ఉంది.

50 ఎంపీ కెమెరా.. 7,500mAh భారీ బ్యాటరీ

ఫోటోగ్రఫీ ప్రేమికుల కోసం రెడ్‌మీ 17 4G వెనుకవైపు f/1.8 ఎపర్చరుతో కూడిన 50 మెగాపిక్సెల్ ప్రైమరీ కెమెరాతో పాటు మరొక సెకండరీ సెన్సార్‌ను కలిగి ఉంటుంది. సెల్ఫీలు, వీడియో కాల్స్ కోసం ముందర 8 మెగాపిక్సెల్ కెమెరాను అమర్చారు. రెండు కెమెరాలు కూడా 1080p రెసల్యూషన్‌లో వీడియో రికార్డింగ్ సపోర్ట్‌ను కలిగి ఉంటాయి. ఇక ఈ ఫోన్‌లో ప్రధాన ఆకర్షణ ఏంటంటే దీని 7,500mAh రాక్షస బ్యాటరీనే! దీన్ని వేగంగా ఛార్జ్ చేసేందుకు యూఎస్‌బీ టైప్-సి పోర్ట్ ద్వారా 45W వైర్డ్ ఫాస్ట్ ఛార్జింగ్ సపోర్ట్‌ను ఇస్తున్నారు. అదనంగా సైడ్-మౌంటెడ్ ఫింగర్‌ప్రింట్ సెన్సార్, ఐఆర్ బ్లాస్టర్, ఏఐ ఫేస్ అన్‌లాక్ , డ్యూయల్-బ్యాండ్ వై-ఫై వంటి ఆధునిక ఫీచర్లు కూడా ఉండనున్నాయి.