Phone: వర్షాకాలంలో ఫోన్ తడిసిందా? ఈ 5 చిట్కాలతో భారీ నష్టాన్ని తగ్గించుకోండి.!

Phone: వర్షాకాలంలో ప్రయాణాలు చేస్తున్నప్పుడు అకస్మాత్తుగా కురిసే వర్షాలకు స్మార్ట్‌ఫోన్‌లు తడిసిపోవడం సర్వసాధారణం. అయితే ఫోన్ నీటిలో తడిచిన వెంటనే కొందరు కంగారుపడి తప్పులు చేస్తుంటారు, దీనివల్ల ఫోన్ పూర్తిగా పాడైపోయే ప్రమాదం ఉంది. ఫోన్ తడిసినప్పుడు వెంటనే అప్రమత్తమై కొన్ని సాధారణ జాగ్రత్తలు పాటిస్తే శాశ్వత నష్టాన్ని నివారించవచ్చు. ఫోన్ వానలో తడిచిన వెంటనే చేయాల్సిన మొదటి పని దానిని వెంటనే స్విచ్ ఆఫ్ చేయడం. ఫోన్ ఆన్‌లో ఉంటే షార్ట్ సర్క్యూట్ అయ్యే అవకాశం ఉంది, కాబట్టి పని చేస్తుందో లేదో పరీక్షించడానికి దానిని ఆన్ చేయడానికి ప్రయత్నించవద్దు.

అలాగే ఫోన్‌కు ఉన్న కవర్లు, సిమ్ కార్డ్, మెమరీ కార్డ్ వంటి వాటిని వెంటనే తొలగించాలి. దీనివల్ల నీరు ఎక్కడైనా ఇరుక్కుపోకుండా ఉంటుంది. ఆ తర్వాత మృదువైన, నూలు వస్త్రంతో లేదా టవల్‌తో ఫోన్ పైభాగాన్ని మెల్లగా తుడవాలి. పోర్ట్‌లు, బటన్లు, హెడ్‌ఫోన్ జాక్ వంటి భాగాలపై ప్రత్యేక శ్రద్ధ పెట్టాలి. అయితే ఫోన్‌ను గట్టిగా వూపడం లేదా ఎక్కువ ఒత్తిడి చేయడం చేయకూడదు.

చాలామంది తడిసిన ఫోన్‌ను ఆరబెట్టడానికి హెయిర్ డ్రైయర్స్, మైక్రోవేవ్‌లు లేదా నేరుగా ఎండలో ఉంచడం లాంటి పొరపాట్లు చేస్తుంటారు. ఇలాంటి అధిక ఉష్ణోగ్రతల వల్ల ఫోన్ లోపలి సర్క్యూట్లు శాశ్వతంగా దెబ్బతింటాయి. దీనికి బదులుగా ఫోన్‌లోని తేమను పీల్చుకోవడానికి బియ్యం నింపిన డబ్బాలో లేదా సిలికా జెల్ ప్యాకెట్ల మధ్య ఉంచడం మంచిది. కనీసం 24 నుండి 48 గంటల పాటు దానిని కదపకుండా అలాగే ఉంచాలి. ఆ తర్వాత కూడా ఫోన్ పనిచేయకపోతే వెంటనే అధీకృత సర్వీస్ సెంటర్‌ను సంప్రదించి నిపుణుల సహాయం తీసుకోవడం ఉత్తమం.