OpenAI : మనుషులు లేకుండానే కొత్త AIలు.. ఓపెన్‌ఏఐ షాక్.!

OpenAI : ఆర్టిఫిషియల్ ఇంటెలిజెన్స్ (AI) మానవ సహాయం లేకుండానే తనను తాను మెరుగుపరుచుకోవడం, సరికొత్త తెలివైన ఏఐ సిస్టమ్స్‌ను సృష్టించడం అనేది ఇప్పటివరకు మనం కేవలం హాలీవుడ్ సైన్స్ ఫిక్షన్ సినిమాల్లో మాత్రమే చూశాం. కానీ, ఇప్పుడు ఆ ఊహ నిజమయ్యే రోజులు చాలా దగ్గర్లోనే ఉన్నాయని ప్రపంచంలోనే అతిపెద్ద ఏఐ సంస్థ ‘ఓపెన్ ఏఐ’ (OpenAI) బలంగా నమ్ముతోంది. మానవ ప్రమేయం లేకుండానే స్వయంగా పరిశోధనలు చేయగల అత్యంత అధునాతన ఏఐ సిస్టమ్స్‌ను నిర్మించే రేసులో ఓపెన్ ఏఐ ముందంజలో ఉంది. అదే సమయంలో, దీనివల్ల భవిష్యత్తులో మానవాళికి ఎదురయ్యే ముప్పులను అంచనా వేసి, వాటిని ఎదుర్కొనేందుకు కంపెనీ ఇప్పుడే గుట్టుచప్పుడు కాకుండా సన్నాహాలు చేస్తోంది.

రూ. 4.2 కోట్ల ప్యాకేజీతో సరికొత్త ఉద్యోగాలు

బిజినెస్ ఇన్‌సైడర్ నివేదిక ప్రకారం.. ఏఐ సిస్టమ్స్ తమను తాము శిక్షణ ఇచ్చుకుంటూ, తమకంటే తెలివైన సరికొత్త ఏఐ వెర్షన్లను తయారు చేసుకునే ప్రక్రియను (దీన్ని సాంకేతిక భాషలో 'రికార్సివ్ సెల్ఫ్-ఇంప్రూవ్‌మెంట్' అంటారు) అధ్యయనం చేయడం కోసం ఓపెన్ ఏఐ ప్రత్యేకంగా పరిశోధకులను నియమించుకుంటోంది. ఇందుకోసం కంపెనీ తన ‘ప్రిపేర్డ్‌నెస్ సేఫ్టీ టీమ్’ (Preparedness Safety Team) పరిధిలో సరికొత్త ఉద్యోగ ప్రకటనను విడుదల చేసింది. ఈ ఉద్యోగానికి ఎంపికయ్యే నిపుణులకు ఏడాదికి సుమారు $2,95,000 (రూ. 2.81 కోట్లు) నుండి $4,45,000 (సుమారు రూ. 4.2 కోట్లు) వరకు భారీ శాలరీ ప్యాకేజీని ఆఫర్ చేస్తోంది.

ప్రస్తుతం ఆంథ్రోపిక్ (Anthropic), ఓపెన్ ఏఐ వంటి సంస్థలు కోడింగ్ రంగంలో సాధించిన అద్భుతమైన పురోగతి వల్లే ఈ ‘ సెల్ఫ్-అప్‌గ్రేడ్’ టెక్నాలజీ సాధ్యమైంది. ప్రముఖ ఏఐ శాస్త్రవేత్త డెమిస్ హస్సాబిస్ ఇటీవల మాట్లాడుతూ.. మానవాళి ప్రస్తుతం ‘సింగులారిటీ’ (Singularity) అంచున నిలిచి ఉందని, ఇక్కడి నుండి ఏఐ మానవుల కంటే వేగంగా తనను తాను అప్‌గ్రేడ్ చేసుకోగలదని హెచ్చరించారు.

భవిష్యత్తు లక్ష్యం.. ఏఐ రీసెర్చ్ ఇంటర్న్.!

ఓపెన్ ఏఐ సీఈఓ సామ్ ఆల్ట్‌మన్ గతంలోనే తమ భవిష్యత్తు వ్యూహాలను వెల్లడించారు. ఈ ఏడాది (2026) సెప్టెంబర్ నాటికి లక్షలాది కంప్యూటర్ చిప్స్‌పై రన్ అయ్యే ఒక ‘ఆటోమేటెడ్ ఏఐ రీసెర్చ్ ఇంటర్న్’ను (స్వయంగా పరిశోధనలు చేసే ఏఐ అసిస్టెంట్) సృష్టించాలని ఓపెన్ ఏఐ లక్ష్యంగా పెట్టుకుంది. అలాగే మార్చి 2028 నాటికి పూర్తి స్థాయి ‘ఆటోమేటెడ్ ఏఐ రీసెర్చర్’ను మార్కెట్లోకి తేవాలని భావిస్తోంది. ఈ ప్రయోగంలో తాము పూర్తిగా విఫలం కావచ్చు కూడా అని, అయితే ఈ విషయాలను ప్రజలకు ముందే పారదర్శకంగా చెప్పడం చాలా ముఖ్యమని ఆల్ట్‌మన్ అభిప్రాయపడ్డారు.

ఏఐ సామర్థ్యాలను అధ్యయనం చేసే ‘మెట్ఆర్’ (METR) సంస్థ నివేదిక ప్రకారం.. అడ్వాన్స్‌డ్ ఏఐ సిస్టమ్స్ చేయగల పని సామర్థ్యం ప్రతి ఏడు నెలలకు ఒకసారి రెట్టింపు అవుతోంది. దీనివల్ల భవిష్యత్తులో హ్యూమన్ ప్రోగ్రామర్లకు రోజులు, వారాల సమయం పట్టే కోడింగ్ పనులను ఈ ఏఐ ఏజెంట్లు కేవలం నిమిషాల్లోనే పూర్తి చేయగలవు.

లాభాలతో పాటు పొంచి ఉన్న ప్రమాదాలు

ఓపెన్ ఏఐ తన 'కోడెక్స్' కోడింగ్ టూల్స్ ద్వారా భారీగా ఆదాయాన్ని గడిస్తున్నప్పటికీ, ఈ సిస్టమ్స్ ఊహించిన దానికంటే వేగంగా వృద్ధి చెందితే వాటిని నియంత్రించడం అసాధ్యంగా మారుతుందనే ఆందోళన టెక్ వర్గాల్లో మొదలైంది. ఇది కేవలం ఉద్యోగాలు పోవడానికి సంబంధించిన సమస్య మాత్రమే కాదు, మానవుల మాట వినని ఒక శక్తివంతమైన వ్యవస్థ తయారైతే వచ్చే ముప్పులకు సంబంధించింది.

ఓపెన్ ఏఐ తన తాజా జాబ్ లిస్టింగ్‌లో కొన్ని ముఖ్యమైన భయాలను ప్రస్తావించింది. ముఖ్యంగా హ్యాకర్లు కావాలనే తప్పుడు సమాచారాన్ని అందించి ఏఐని పక్కదారి పట్టించే ‘డేటా పాయిజనింగ్’ (Data Poisoning) ప్రమాదాన్ని అడ్డుకోవడంపై ఈ టీమ్ పనిచేస్తుంది. అలాగే, ఏఐ లోపల ఎలా ఆలోచిస్తుందో (Reasoning) తెలుసుకునే టూల్స్‌ను అభివృద్ధి చేయడం, టెక్నికల్ స్టాఫ్ స్థానంలో ఏఐ ఎంతవరకు రీప్లేస్ అవుతుందో ట్రాక్ చేయడం కూడా ఈ కొత్త టీమ్ బాధ్యత.