Android Malware: ఆండ్రాయిడ్‌లో ఈ మాల్వేర్.. OTPలు, చాట్లు గప్‌చుప్

Android Malware: ప్రస్తుత డిజిటల్ యుగంలో స్మార్ట్‌ఫోన్ ప్రతీ ఒక్కరి జీవితంలో భాగమైపోయింది. అయితే, ఇదే సమయంలో ఆండ్రాయిడ్ వినియోగదారుల భద్రతను ప్రశ్నించేలా సరికొత్త, అత్యంత ప్రమాదకరమైన సైబర్ ముప్పు పొంచి ఉందనే వార్త తీవ్ర కలకలం రేపుతోంది.

'మాంటాక్స్ ఓటాక్స్' (Montax OTX) అని పిలిచే ఒక భయంకరమైన మాల్వేర్ ఆండ్రాయిడ్ ఫోన్లపై దాడి చేస్తూ వినియోగదారుల రహస్య డేటాను కొల్లగొడుతోందని ప్రముఖ మొబైల్ సెక్యూరిటీ సంస్థ 'జింపెరియం' (Zimperium) పరిశోధకులు వెల్లడించారు.

ఇది కేవలం ఫోన్ సమాచారాన్ని చోరీ చేయడమే కాకుండా, పరికరాన్ని హ్యాకర్ల నియంత్రణలోకి తీసుకుని వినియోగదారులను మానసికంగా కూడా వేధించే సామర్థ్యాన్ని కలిగి ఉండటం ఆందోళన కలిగిస్తోంది.

బ్యాంకింగ్ ఓటీపీలు, వాట్సాప్ , టెలిగ్రామ్ చాట్‌లపై నిఘా

మాంటాక్స్ ఓటాక్స్ మాల్వేర్ ఒకసారి ఆండ్రాయిడ్ పరికరంలోకి ప్రవేశించిన తర్వాత వినియోగదారులకు చెందిన అత్యంత రహస్యమైన వ్యక్తిగత సమాచారాన్ని ప్రమాదంలో పడేస్తుంది. రోజువారి బ్యాంకింగ్ లావాదేవీలకు ఎంతో కీలకమైన వన్-టైమ్ పాస్‌వర్డ్‌లు (OTP) ఉండే ఎస్ఎమ్‌ఎస్ నోటిఫికేషన్లను ఇది చాలా సులభంగా చదవగలదు. దీనికి తోడు, ఆండ్రాయిడ్ ఆపరేటింగ్ సిస్టమ్‌లోని 'యాక్సెసిబిలిటీ సెట్టింగ్స్'లోని లోపాలను దుర్వినియోగం చేస్తూ వాట్సాప్ ప్రొఫైల్స్, మెసేజ్ చాట్‌లు , టెలిగ్రామ్ వ్యక్తిగత సంభాషణలను సైతం పర్యవేక్షిస్తుంది. అంతేకాకుండా ఫోన్‌లోని కాల్ లాగ్‌లు, బ్రౌజర్ హిస్టరీ, కాంటాక్ట్ లిస్ట్, ఇన్‌స్టాల్ అయిన ఇతర యాప్‌లు, జీపీఎస్ లొకేషన్ , గూగుల్ ఖాతా వివరాలను సైతం దొంగిలించి హ్యాకర్ల సర్వర్‌లకు చేరవేస్తుంది.

ప్రమాదకరమైన ఏపీకే ఫైళ్ల ద్వారా వ్యాప్తి , ఫోన్ లాకింగ్

మొబైల్ సెక్యూరిటీ పరిశోధకుల ప్రకారం, ఈ మాల్వేర్ గూగుల్ ప్లే స్టోర్ వెలుపల లభించే అనధికారిక, హానికరమైన ఏపీకే (APK) ఫైళ్ల ద్వారా వేగంగా విస్తరిస్తోంది. ఇది స్పైవేర్, రాన్సమ్‌వేర్ , రిమోట్ కంట్రోల్ సామర్థ్యాల కలయికగా పనిచేస్తుంది. ఫోన్‌లో ఇన్‌స్టాల్ కాగానే 'డివైస్ అడ్మినిస్ట్రేటర్' , 'యాక్సెసిబిలిటీ' వంటి అత్యంత కీలకమైన అనుమతులను వినియోగదారుల నుంచి కోరుతుంది. ఒకసారి ఈ అనుమతులు లభించిన వెంటనే ఫోన్‌పై పూర్తి నియంత్రణ సాధించి, నిరంతరంగా వచ్చే అభ్యంతరకరమైన పాప్-అప్‌లు, ఆడియో, వీడియో సందేశాలతో స్క్రీన్‌ను లాక్ చేసి వినియోగదారులను తీవ్ర ఇబ్బందులకు గురిచేస్తుంది.

రహస్య స్క్రీన్ రికార్డింగ్ , కెమెరా నియంత్రణ

ఈ మాల్వేర్ వల్ల కలిగే ముప్పు కేవలం డేటా చోరీకి మాత్రమే పరిమితం కాదు. ఆండ్రాయిడ్ 'మీడియా ప్రొజెక్షన్' ఫీచర్‌ను ఉపయోగించుకుని ఫోన్ స్క్రీన్‌ను లైవ్‌గా రికార్డ్ చేయడం, సీక్రెట్‌గా స్క్రీన్‌షాట్‌లు తీయడం , ఫోన్ స్క్రీన్ కార్యకలాపాలను నేరుగా దాడి చేసేవారికి ప్రసారం చేయడం వంటి పనులు చేస్తుంది. అన్నింటికంటే భయాందోళన కలిగించే విషయమేమిటంటే, వినియోగదారులకు తెలియకుండానే ఫోన్ ముందు , వెనుక కెమెరాలను ఆన్ చేసి రహస్యంగా ఫొటోలు తీసి హ్యాకర్లకు పంపగలదు. దీనివల్ల వినియోగదారుల వ్యక్తిగత గోప్యత తీవ్రంగా దెబ్బతింటుంది.

సైబర్ నిపుణుల సూచనలు , నివారణ మార్గాలు

ఇలాంటి ప్రమాదకరమైన మాల్వేర్ల బారిన పడకుండా ఉండాలంటే కేవలం గూగుల్ ప్లే స్టోర్ నుంచి మాత్రమే ప్రమాణీకరించబడిన యాప్‌లను డౌన్‌లోడ్ చేసుకోవాలని నిపుణులు హెచ్చరిస్తున్నారు. వాట్సాప్, టెలిగ్రామ్ లేదా అపరిచిత వెబ్‌సైట్లలో వచ్చే లింక్‌ల ద్వారా ఎలాంటి ఏపీకే ఫైళ్లను ఫోన్‌లో ఇన్‌స్టాల్ చేయకూడదు. ఏదైనా యాప్ పరిమితికి మించిన అనుమతులు కోరితే నిరాకరించడం, అలాగే ఫోన్‌లో అనుమానాస్పద పాప్-అప్‌లు వస్తుంటే వెంటనే విశ్వసనీయమైన యాంటీవైరస్ సహాయంతో స్కాన్ చేయడం లేదా ఫోన్‌ను రీసెట్ చేయడం మంచిదని సూచిస్తున్నారు.