MediaTek : అదిరింది.. బడ్జెట్ ఫోన్లలోకి గూగుల్ జెమిని ఎంట్రీ. కానీ..!

MediaTek : గూగుల్ తన ఐ/ఓ (I/O) ఈవెంట్‌లో ఆండ్రాయిడ్ యూజర్ల కోసం సరికొత్త 'జెమిని ఇంటెలిజెన్స్' (Gemini Intelligence) ఏఐ ఫీచర్లను ప్రకటించి టెక్ ప్రపంచంలో సంచలనం సృష్టించింది. అయితే, ఈ వేడుకలో గూగుల్ ఒక కీలకమైన విషయాన్ని మాత్రం దాచేసింది. ఈ అద్భుతమైన ఏఐ ఫీచర్లు రన్ అవ్వడానికి భారీ హార్డ్‌వేర్ కాన్ఫిగరేషన్ అవసరం కావడంతో, ఇవి కేవలం కొన్ని టాప్-ఎండ్ ఫ్లాగ్‌షిప్ ఫోన్లకే పరిమితం కానున్నాయి. పాత ఫోన్లలో ఈ ఫీచర్లు వచ్చే అవకాశం దాదాపు లేనట్లే. అయితే, తాజాగా ప్రముఖ ప్రాసెసర్ల తయారీ సంస్థ 'మీడియాటెక్' (MediaTek) తీసుకున్న ఒక నిర్ణయం వల్ల రాబోయే రోజుల్లో బడ్జెట్, మిడ్-రెంజ్ ఫోన్లలో కూడా గూగుల్ జెమిని ఏఐ ఫీచర్లు అందుబాటులోకి వచ్చే అవకాశం కనిపిస్తోంది.

మీడియాటెక్ డైమెన్సిటీ 8550 లాంచ్.. అదే అసలైన కీ

ఎలాంటి హడావుడి లేకుండా మీడియాటెక్ సంస్థ మార్కెట్లోకి ‘డైమెన్సిటీ 8550’ (Dimensity 8550) అనే సరికొత్త మిడ్-రెంజ్ చిప్‌సెట్‌ను విడుదల చేసింది. మార్కెట్లో పాపులర్ అయిన పోకో X8 ప్రో 5జీ, మోటోరోలా ఎడ్జ్ 70 ప్రో వంటి ఫోన్లలో ఉన్న డైమెన్సిటీ 8500 ప్రాసెసర్‌కు ఇది సక్సెసర్‌గా వస్తోంది. పాత చిప్‌తో పోలిస్తే దీని స్పెసిఫికేషన్లు దాదాపు ఒకేలా ఉన్నప్పటికీ.. ఇందులో ఒక విప్లవాత్మకమైన మార్పు చేశారు. ఈ కొత్త డైమెన్సిటీ 8550 చిప్‌సెట్‌లో ప్రత్యేకంగా 'LLM బూస్టర్' (LLM Booster) ను అమర్చారు. ఇది గూగుల్‌కు చెందిన అత్యంత అధునాతన 'జెమిని నానో v3' (Gemini Nano v3) ఏఐ మోడల్‌ను సపోర్ట్ చేస్తుంది. మిడ్-రెంజ్ ఫోన్లలో గూగుల్ ఏఐ రావడానికి ఇదే అత్యంత కీలకమైన అడుగు.

ఫ్లాగ్‌షిప్‌లకే పరిమితమైన ఏఐ.. పాత మోడళ్లకు నిరాశే

గూగుల్ జెమిని ఇంటెలిజెన్స్ ఫీచర్లు పని చేయాలంటే ఫోన్ ప్రాసెసర్‌లో తప్పనిసరిగా 'ఏఐ కోర్' (AI Core) , 'జెమిని నానో v3' సపోర్ట్ ఉండాలి. ఇప్పటివరకు ఈ సపోర్ట్ కేవలం మార్కెట్లోని కొన్ని ఖరీదైన ఫ్లాగ్‌షిప్ ఫోన్లయిన శామ్‌సంగ్ గెలాక్సీ S26 సిరీస్, గూగుల్ పిక్సెల్ 10 సిరీస్, , వన్‌ప్లస్ 15 లలో మాత్రమే ఉంది. విచిత్రం ఏమిటంటే.. ఇటీవలే విడుదలైన పిక్సెల్ 9 సిరీస్, గెలాక్సీ జెడ్ ఫోల్డ్ 7, షావోమి 17 అల్ట్రా వంటి ఖరీదైన ఫ్లాగ్‌షిప్ ఫోన్లు కూడా కేవలం 'జెమిని నానో v2'ను మాత్రమే సపోర్ట్ చేస్తున్నాయి. గూగుల్ కనుక తన పాత సాఫ్ట్‌వేర్ మోడళ్లను అప్‌డేట్ చేయకపోతే, ఈ ప్రీమియం ఫోన్ల యూజర్లు కూడా లేటెస్ట్ ఏఐ ఫీచర్లను కోల్పోవాల్సి వస్తుంది. లక్షలు పెట్టి కొన్న ఫోన్లలో ఏఐ రాకపోవడంపై నెటిజన్లు తీవ్ర అసంతృప్తి వ్యక్తం చేస్తున్నారు.

ఫీచర్లు రావడం పక్కానేనా? కండిషన్స్ అప్లై

డైమెన్సిటీ 8550 చిప్‌సెట్ ఉన్న ప్రతి మిడ్-రెంజ్ ఫోన్లోనూ జెమిని ఇంటెలిజెన్స్ ఫీచర్లు వచ్చేస్తాయని ఖచ్చితంగా చెప్పలేము. ఎందుకంటే గూగుల్ నిబంధనల ప్రకారం కారు ప్రాసెసర్‌తో పాటు కనీసం 12GB రేమ్ (RAM) ఉండటం తప్పనిసరి. ఉదాహరణకు, డైమెన్సిటీ 8500 తో వచ్చిన మోటోరోలా ఎడ్జ్ 70 ప్రో బేస్ వేరియంట్ 8GB రేమ్‌తో వస్తుంది, కానీ దాని టాప్ వేరియంట్ 12GB రేమ్‌ను కలిగి ఉంది. కాబట్టి రాబోయే మిడ్-రెంజ్ ఫోన్లలో కంపెనీలు 12GB రేమ్‌ను స్టాండర్డ్‌గా అందిస్తేనే ఈ ఏఐ ఫీచర్లు పని చేస్తాయి.

మరోవైపు, కొందరు వినియోగదారులు తమ ఫోన్లలో ఏఐ ఫీచర్లు లేకపోవడమే మంచిదని భావిస్తున్నారు. ఫోన్ల నుండి ఏఐని తొలగించడానికి రకరకాల దారుల కోసం వెతికే కంటే, అసలు ఏఐ తలనొప్పులు లేని తక్కువ ధర ఫోన్లే తమకు బెస్ట్ ఆప్షన్ అని నెటిజన్లు కామెంట్లు చేస్తున్నారు.

ఏఐ యుగంలో స్మార్ట్‌ఫోన్ల భవిష్యత్తు

ప్రస్తుత పరిస్థితి చూస్తుంటే స్మార్ట్‌ఫోన్ రంగం ప్రారంభ రోజుల్లో ఉన్నట్లు అనిపిస్తోంది. అప్పట్లో సరికొత్త ఫీచర్ల కోసం ప్రతి ఏటా ఫోన్లను అప్‌గ్రేడ్ చేయడం (కొత్త ఫోన్ కొనడం) ఎలాగైతే తప్పనిసరి అయిందో.. ఇప్పుడు కేవలం కొన్ని ఏఐ ఫీచర్ల కోసం యూజర్లు ప్రతి ఏటా ఫోన్లు మార్చాల్సి వచ్చేలా కంపెనీలు చేస్తున్నాయి. అయితే, ప్రస్తుతం వినియోగదారులు ఈ ఏఐ ఫీచర్ల పట్ల అంతగా ఆసక్తి చూపించడం లేదు. అందువల్ల కేవలం ఏఐ కోసం ప్రతి ఏటా కొత్త ఫోన్లు కొనడానికి చాలా మంది ఇష్టపడటం లేదు. అయినప్పటికీ, మీడియాటెక్ తెచ్చిన ఈ కొత్త చిప్ వల్ల భవిష్యత్తులో సామాన్యుల బడ్జెట్ ఫోన్లలో కూడా గూగుల్ ఏఐ స్మార్ట్ ఫీచర్లు అందుబాటులోకి రావడం మాత్రం ఖాయంగా కనిపిస్తోంది.