JioPC: పాత కంప్యూటర్కు కొత్త స్పీడ్.. జియో క్లౌడ్ సర్వీస్తో అదిరే బెనిఫిట్స్
JioPC: పాత కంప్యూటర్ల వేగం పెంచేందుకు రిలయన్స్ జియో ‘జియోపీసీ’ క్లౌడ్ సేవలను తీసుకొచ్చింది. ఏ ఇంటర్నెట్ నెట్వర్క్లోనైనా ఇది పనిచేస్తుంది.
JioPC: పాత కంప్యూటర్కు కొత్త స్పీడ్.. జియో క్లౌడ్ సర్వీస్తో అదిరే బెనిఫిట్స్
JioPC: కంప్యూటర్ను కొన్నేళ్ల పాటు ఉపయోగించిన తర్వాత దాని పనితీరు మందగించడం సాధారణమే. స్టోరేజ్ తగ్గిపోవడం, ర్యామ్ సరిపోకపోవడం, కొత్త సాఫ్ట్వేర్లు, అప్లికేషన్లు సరిగ్గా పనిచేయకపోవడం వంటి సమస్యలు ఎదురవుతుంటాయి. దీంతో చాలామంది కొత్త కంప్యూటర్ కొనుగోలు చేయాలని భావిస్తారు. అయితే పాత కంప్యూటర్తోనే మెరుగైన పనితీరును పొందాలనుకునే వారికి రిలయన్స్ జియో తీసుకొచ్చిన జియోపీసీ (JioPC) సేవ ఒక ప్రత్యామ్నాయంగా నిలుస్తోంది.
జియోపీసీ అనేది క్లౌడ్ ఆధారిత కంప్యూటింగ్ సర్వీస్. దీని ద్వారా వినియోగదారులు తమ వద్ద ఉన్న కంప్యూటర్ నుంచే క్లౌడ్లోని కంప్యూటింగ్ వనరులను ఉపయోగించుకోవచ్చు. అంటే పాత కంప్యూటర్లో పరిమితంగా ఉన్న హార్డ్వేర్ సామర్థ్యానికి అదనంగా క్లౌడ్ కంప్యూటింగ్ పవర్, స్టోరేజ్ వంటి వనరులను ఉపయోగించే అవకాశం ఉంటుంది. దీంతో కొత్త కంప్యూటర్ కొనుగోలు చేయకుండానే కొన్ని ఆధునిక అప్లికేషన్లు, సాఫ్ట్వేర్లను వినియోగించుకోవచ్చని జియో చెబుతోంది.
గతంలో జియోపీసీ సేవ కేవలం జియోహోమ్ బ్రాడ్బ్యాండ్ వినియోగదారులకు మాత్రమే అందుబాటులో ఉండేది. ప్రస్తుతం ఇతర కంపెనీల ఇంటర్నెట్ కనెక్షన్ ఉపయోగిస్తున్నవారు కూడా ఈ సేవను వినియోగించుకునే అవకాశం ఉంది. అంటే జియో సిమ్ లేదా జియో బ్రాడ్బ్యాండ్ కనెక్షన్ తప్పనిసరి కాదు.
రూ.1,000 నుంచి జియోపీసీ ప్లాన్స్
ప్రస్తుతం జియోపీసీలో రెండు ప్రధాన ఆప్షన్లు అందుబాటులో ఉన్నాయి. సాధారణ జియోపీసీ ప్లాన్లో 8జీబీ ర్యామ్, 500జీబీ స్టోరేజ్ లభిస్తాయి. ఇక జియోపీసీ అల్ట్రా ప్లాన్లో 16జీబీ ర్యామ్, 1టీబీ స్టోరేజ్ అందుబాటులో ఉంటాయి.
రెండు నెలల జియోపీసీ ప్లాన్ ధర రూ.1,000 నుంచి ప్రారంభమవుతుంది. జియోపీసీ అల్ట్రా రెండు నెలల ప్లాన్ ధర రూ.1,200గా ఉంది. ఎక్కువ కాలం సేవలను వినియోగించుకోవాలనుకునే వారికి ఏడాది సహా వివిధ కాలవ్యవధుల కోసం పలు ప్లాన్స్ను కంపెనీ అందిస్తోంది.
మూడు, నాలుగేళ్లుగా ఉపయోగిస్తున్న కంప్యూటర్లకు జియోపీసీ ఉపయోగపడే అవకాశం ఉందని కంపెనీ చెబుతోంది. అంతేకాకుండా సుమారు ఎనిమిదేళ్ల పాత కంప్యూటర్లలో కూడా జియోపీసీ ద్వారా ఏఐ ఆధారిత అప్లికేషన్లను ఉపయోగించుకోవచ్చని పేర్కొంది. అధిక కంప్యూటింగ్ అవసరమయ్యే పనులను క్లౌడ్లో నిర్వహించడం వల్ల పాత కంప్యూటర్ హార్డ్వేర్పై భారం తగ్గుతుందని సంస్థ వివరిస్తోంది.
మొత్తంగా చూస్తే, పాత కంప్యూటర్ పనితీరుతో ఇబ్బంది పడుతున్న వారు వెంటనే కొత్త పీసీ కొనుగోలు చేయడానికి బదులుగా క్లౌడ్ కంప్యూటింగ్ సేవలను పరిశీలించవచ్చు. ముఖ్యంగా విద్యార్థులు, ఇంటి నుంచి కంప్యూటర్ ఉపయోగించేవారు, చిన్న వ్యాపారాలు, ప్రొఫెషనల్స్కు జియోపీసీ ఉపయోగపడే అవకాశం ఉంది. అయితే సేవను ఉపయోగించడానికి అవసరమైన ఇంటర్నెట్ వేగం, అనుకూలత వంటి అంశాలను కూడా వినియోగదారులు ముందుగా పరిశీలించడం మంచిది.