మీ స్మార్ట్‌ఫోన్‌ను ఈ 4 చోట్ల పెడుతున్నారా..? అయితే ప్రమాదంలో పడ్డట్టే..!

Smartphone Safety Tips: నేటి కాలంలో స్మార్ట్‌ఫోన్ అనేది కేవలం అవసరం మాత్రమే కాదు, అది ఒక ఖరీదైన పెట్టుబడి కూడా. అయితే, మనం తెలియక చేసే కొన్ని చిన్న తప్పులు ఫోన్ ఆయుష్షును తగ్గించడమే కాకుండా, మన ప్రాణాలకు కూడా ముప్పు తెచ్చే అవకాశం ఉంది. ముఖ్యంగా ఫోన్‌ను ఎక్కడ ఉంచుతున్నామనే విషయంలో ప్రతి ఒక్కరూ అప్రమత్తంగా ఉండాలి.

వేడికి దూరంగా ఉంచండి..

చాలామంది వంట చేసేటప్పుడు ఫోన్‌ను గ్యాస్ స్టౌ లేదా ఇండక్షన్ పొయ్యిల దగ్గర పెడుతుంటారు. ఇది చాలా ప్రమాదకరమైన అలవాటు. కేవలం వంటగది మాత్రమే కాకుండా, హీట్ జనరేట్ చేసే ఏ ఎలక్ట్రానిక్ వస్తువు దగ్గర కూడా ఫోన్‌ను ఉంచకూడదు. ఫోన్ ఛార్జింగ్ అవుతున్నప్పుడు దుప్పట్లు లేదా దిండ్ల మీద పెట్టడం వల్ల ఫోన్ ఓవర్ హీట్ అయ్యే అవకాశం ఉంది. ఇది బ్యాటరీ సామర్థ్యాన్ని దెబ్బతీయడమే కాకుండా, కొన్నిసార్లు ఫోన్ పేలిపోయే ప్రమాదం కూడా ఉంది.

ఎండలో పార్క్ చేసిన కార్లలో వదిలేయకండి..

వేసవి కాలంలో లేదా ఎండ ఎక్కువగా ఉన్నప్పుడు కారు లోపల ఉష్ణోగ్రత చాలా వేగంగా పెరుగుతుంది. అటువంటి సమయంలో ఫోన్‌ను కారులోనే వదిలేసి వెళ్లడం వల్ల దాని అంతర్గత భాగాలు తీవ్రంగా దెబ్బతింటాయి. డిస్‌ప్లే సమస్యలు రావడం లేదా మదర్ బోర్డ్ పాడైపోవడం వంటివి జరిగి, వేల రూపాయల నష్టం వాటిల్లే అవకాశం ఉంది. కాబట్టి కారు దిగేటప్పుడు ఫోన్‌ను మీతో పాటే తీసుకెళ్లడం ఉత్తమం.

విమానాశ్రయ భద్రతా తనిఖీల వద్ద జాగ్రత్త..

ఎయిర్‌పోర్ట్‌లలో భద్రతా తనిఖీల సమయంలో చాలామంది ఫోన్‌ను నేరుగా సెక్యూరిటీ బిన్‌లలో పడేస్తుంటారు. ఇలా చేయడం వల్ల ఫోన్ దొంగతనానికి గురయ్యే అవకాశం ఎక్కువగా ఉంటుంది. అలాగే రద్దీలో తొందరపాటు వల్ల ఫోన్‌ను అక్కడే మర్చిపోయే ప్రమాదం కూడా ఉంది. కాబట్టి ఫోన్‌ను నేరుగా ట్రేలో వేయకుండా, మీ బ్యాగ్ లేదా జాకెట్ లోపల పెట్టి తనిఖీ చేయించడం సురక్షితం.

జేబులో ఫోన్ - ఆరోగ్యానికి ముప్పు..

మనం రోజంతా ఫోన్‌ను మన ప్యాంటు జేబులోనే ఉంచుకుంటాం. కానీ, ఫోన్ నుంచి నిరంతరం విడుదలయ్యే రేడియో ఫ్రీక్వెన్సీ తరంగాలు మన ఆరోగ్యంపై ప్రతికూల ప్రభావం చూపుతాయని నిపుణులు హెచ్చరిస్తున్నారు. ఎక్కువ కాలం ఇలా చేయడం వల్ల సంతానలేమి లేదా ఇతర నాడీ సంబంధిత సమస్యలు వచ్చే అవకాశం ఉంది. వీలైనంత వరకు ఫోన్‌ను జేబులో కాకుండా బ్యాగ్‌లో ఉంచుకోవడానికి ప్రయత్నించండి.