Kanchili: మకరాంపురంలో అంగరంగ వైభవంగా శ్రీ షిరిడి సాయినాథుని పల్లకీ సేవ

కంచిలి: కంచిలి మండలం మకరాంపురం గ్రామం మంగళవారం సాయంత్రం సాయినామ స్మరణతో మార్మోగింది. గురుపౌర్ణమి మహోత్సవాల సందర్భంగా శ్రీ షిరిడి సాయినాథుని ఆలయంలో నిర్వహించిన సాయినాథుని పల్లకీ సేవ భక్తిశ్రద్ధల నడుమ అంగరంగ వైభవంగా సాగింది. మేళతాళాలు, భజనల హోరు, "ఓం శ్రీ సాయిరాం" నామస్మరణలు, మహిళల కోలాటాలతో గ్రామమంతా ఆధ్యాత్మిక కాంతిని సంతరించుకుంది.

ఆలయ ధర్మకర్త బెందాళం రమణ స్వామి ఆధ్వర్యంలో జరిగిన ఈ మహోత్సవానికి మకరాంపురంతో పాటు పరిసర గ్రామాల నుంచి భారీ సంఖ్యలో భక్తులు తరలివచ్చారు. సర్వాంగ సుందరంగా అలంకరించిన శ్రీ షిరిడి సాయినాథుని ఉత్సవ విగ్రహాన్ని పల్లకీలో ప్రతిష్ఠించి గ్రామ ప్రధాన వీధుల గుండా వైభవంగా ఊరేగించారు. పల్లకీ ముందుగా మంగళ వాయిద్యాలు, భజన బృందాల సాయినామ సంకీర్తనలు, వెనుక వేలాది మంది భక్తులు భక్తి పారవశ్యంతో సాగడం వేడుకకు ప్రత్యేక శోభను తీసుకొచ్చింది.

గ్రామంలోని ప్రతి వీధిలో భక్తులు పల్లకీకి హారతులు సమర్పిస్తూ, పూల వర్షం కురిపిస్తూ బాబాకు ఘన స్వాగతం పలికారు. చిన్నారుల నుంచి వృద్ధుల వరకు ప్రతి ఒక్కరూ భక్తి భావంతో పల్లకీ సేవలో పాల్గొనడం విశేషంగా కనిపించింది. సాయిబాబా ఆశీస్సుల కోసం భక్తులు పెద్ద సంఖ్యలో క్యూలైన్లలో నిలబడి దర్శనం చేసుకున్నారు.

వేడుకల్లో ప్రధాన ఆకర్షణగా నిలిచిన ఐదు గ్రామాలకు చెందిన సుమారు 150 మంది మహిళల సామూహిక కోలాట ప్రదర్శన ప్రేక్షకులను మంత్రముగ్ధులను చేసింది. సంప్రదాయ దుస్తుల్లో మహిళలు ప్రదర్శించిన కోలాటం సాంస్కృతిక వైభవాన్ని ప్రతిబింబించగా, భజన బృందాల గానామృతం భక్తులను ఆధ్యాత్మిక అనుభూతిలో ముంచెత్తింది.

గురుపౌర్ణమి వేడుకలు నేడు (బుధవారం) అంగరంగ వైభవంగా నిర్వహించనున్నారు. ఉదయం సుప్రభాత సేవతో కార్యక్రమాలు ప్రారంభమై, ఆలయ ఆస్థాన కళాకారుల ఆధ్వర్యంలో రోజంతా నిరంతర సాయిభజనలు కొనసాగనున్నాయి. మధ్యాహ్నం శ్రీ సాయినాథునికి మహామంగళహారతి సమర్పించిన అనంతరం భక్తులకు అన్నసమారాధన నిర్వహించనున్నారు.

గురుపౌర్ణమి మహోత్సవాల సందర్భంగా ఆలయాన్ని విద్యుత్ దీపాలు, పుష్పాలతో కనులపండువగా అలంకరించారు. భక్తులకు తాగునీరు, ప్రసాదం, అన్నదానం, పార్కింగ్ తదితర సౌకర్యాలను సమకూర్చి ఎలాంటి ఇబ్బందులు తలెత్తకుండా నిర్వాహకులు ప్రత్యేక ఏర్పాట్లు చేశారు. భక్తుల రద్దీ, సాయినామ ఘోష, ఆధ్యాత్మిక ఉత్సాహంతో మకరాంపురం గ్రామం ఒక పుణ్యక్షేత్రాన్ని తలపించేలా దర్శనమిచ్చింది.