Women's T20 World Cup 2026 : మళ్లీ విశ్వవిజేతగా ఆస్ట్రేలియా.. ఇంగ్లాండ్ కోటను బద్దలు కొట్టి 7వ సారి వరల్డ్ కప్ కైవసం

Women's T20 World Cup 2026 : మహిళల క్రికెట్ ప్రపంచంలో ఆస్ట్రేలియా జట్టు మరోసారి తన తిరుగులేని ఆధిపత్యాన్ని చాటుకుంది. లండన్‌లోని చారిత్రాత్మక లార్డ్స్ మైదానంలో ఆదివారం రాత్రి జరిగిన ఐసీసీ మహిళల టీ20 వరల్డ్ కప్ 2026 ఫైనల్ పోరులో ఆస్ట్రేలియా ఘనవిజయం సాధించింది. హోరాహోరీగా సాగుతుందనుకున్న ఈ మ్యాచ్‌లో ఆసీస్ జట్టు ఏకపక్షంగా ఇంగ్లాండ్‌ను 7 వికెట్ల తేడాతో ఓడించి, రికార్డు స్థాయిలో ఏడోసారి ప్రపంచ కప్ ట్రోఫీని ముద్దాడింది. కొత్త కెప్టెన్ సోఫీ మోలినెక్స్ నాయకత్వంలో బరిలోకి దిగిన ఆస్ట్రేలియా జట్టు, లార్డ్స్ వేదికగా ఇంగ్లాండ్ నిర్దేశించిన లక్ష్యాన్ని చాలా సులువుగా ఛేదించి సరికొత్త చరిత్ర సృష్టించింది.

లార్డ్స్ వేదికగా ఇంగ్లాండ్‌కు ఘోర పరాభవం

ఈ ప్రతిష్టాత్మక ఫైనల్ మ్యాచ్‌కు ముందు ఇరు జట్ల ముందు సరికొత్త చరిత్ర సృష్టించే అవకాశం ఉంది. ఎందుకంటే గతంలో ఇంగ్లాండ్ గడ్డపై జరిగిన అన్ని మహిళల వన్డే, టీ20 ప్రపంచ కప్‌లలో ఆతిథ్య ఇంగ్లాండ్ జట్టే విజేతగా నిలిచింది. మరోవైపు టీ20 వరల్డ్ కప్ ఫైనల్స్‌లో ఇంగ్లాండ్, ఆస్ట్రేలియా తలపడిన మూడు సార్లూ ఆసీస్ జట్టునే విజయం వరించింది. ఈ నేపథ్యంలో లార్డ్స్ వేదికగా జరిగిన ఈ ఫైనల్లో ఇంగ్లాండ్ కోటను బద్దలు కొట్టిన ఆస్ట్రేలియా, ఆ జట్టు సొంత గడ్డపై ఉన్న అజేయ రికార్డుకు బ్రేక్ వేసింది. తద్వారా ఇంగ్లాండ్ తన సొంత ప్రేక్షకుల ముందు మొదటిసారి ఒక ప్రపంచ కప్ ఫైనల్లో ఓటమిని చవిచూడాల్సి వచ్చింది.

టాస్ గెలిచి బౌలింగ్ ఎంచుకున్న ఆస్ట్రేలియా

టాస్ గెలిచిన ఆస్ట్రేలియా కెప్టెన్ సోఫీ మోలినెక్స్ ఏమాత్రం ఆలోచించకుండా మొదట బౌలింగ్ ఎంచుకుంది. కెప్టెన్ నమ్మకాన్ని నిలబెడుతూ ఆసీస్ బౌలర్లు రెండో ఓవర్ నుంచే వికెట్ల వేట ప్రారంభించారు. 20 ఏళ్ల యువ ఫాస్ట్ బౌలర్ లూసీ హామిల్టన్ ప్రమాదకరమైన అమీ జోన్స్‌ను అవుట్ చేసి ఇంగ్లాండ్‌కు గట్టి షాక్ ఇచ్చింది. ఆ తర్వాత ఈ టోర్నీలోనే అత్యంత విజయవంతమైన బ్యాటర్‌గా ఉన్న డాని వ్యాట్ కేవలం 8 పరుగులకే పెవిలియన్ చేరింది. దీనితో ఇంగ్లాండ్ జట్టు ఆరంభంలోనే తీవ్ర ఒత్తిడిలో పడిపోయింది. ఆ తర్వాత వచ్చిన బ్యాటర్లు కూడా ఆసీస్ బౌలింగ్‌ను ఎదుర్కొని వేగంగా పరుగులు చేయడంలో విఫలమయ్యారు.

నైట్ సివర్ బ్రంట్ ఒంటరి పోరాటం వృథా

కష్టాల్లో పడిన ఇంగ్లాండ్ జట్టును కెప్టెన్ నైట్ సివర్ బ్రంట్ ఆదుకుంది. ఆమె అలిస్ కాప్సేతో కలిసి 35 పరుగుల భాగస్వామ్యం నెలకొల్పింది. అయితే కాప్సే అవుటైన తర్వాత క్రీజులోకి వచ్చిన ఫ్రేయా కెంప్ మ్యాచ్ స్వరూపాన్ని మార్చేసింది. కెంప్ ఆసీస్ బౌలర్లపై ఎదురుదాడికి దిగి కేవలం 28 బంతుల్లోనే 44 పరుగులు రాబట్టింది. కెప్టెన్ సివర్ బ్రంట్ (53 బంతుల్లో 58 పరుగులు) ఈ టోర్నీలో వరుసగా రెండో హాఫ్ సెంచరీ పూర్తి చేసుకుంది. వీరిద్దరూ నాలుగో వికెట్‌కు విడదీయరాని 80 పరుగుల భాగస్వామ్యాన్ని నెలకొల్పడంతో ఇంగ్లాండ్ నిర్ణీత 20 ఓవర్లలో 4 వికెట్ల నష్టానికి 150 పరుగులు చేయగలిగింది. ఆసీస్ బౌలర్ కిమ్ గార్త్ 20 పరుగులిచ్చి ఒక వికెట్ పడగొట్టింది.

బెత్ మూనీ విశ్వరూపం.. ఫిబీ లిచ్‌ఫీల్డ్ మెరుపులు

151 పరుగుల లక్ష్యంతో బరిలోకి దిగిన ఆస్ట్రేలియాకు కూడా ఆరంభంలోనే ఎదురుదెబ్బ తగిలింది. యువ ఓపెనర్ జార్జియా వోల్ రెండో ఓవర్లోనే అవుటైంది. అయితే ఆ తర్వాత క్రీజులోకి వచ్చిన స్టార్ బ్యాటర్ బెత్ మూనీ తన క్లాస్ బ్యాటింగ్‌తో ఇంగ్లాండ్ బౌలర్లకు చుక్కలు చూపించింది. ఆమెకు తోడుగా ఫిబీ లిచ్‌ఫీల్డ్ కూడా అద్భుతంగా రాణించింది. వీరిద్దరూ కలిసి కేవలం 11 ఓవర్లలోనే 100 పరుగుల భారీ భాగస్వామ్యాన్ని నెలకొల్పి మ్యాచ్‌ను వన్‌సైడ్ చేసేశారు. బెత్ మూనీ 64 పరుగులతో టాప్ స్కోరర్‌గా నిలవగా, లిచ్‌ఫీల్డ్ 48 పరుగులు చేసి తృటిలో హాఫ్ సెంచరీ మిస్ చేసుకుంది. ఆస్ట్రేలియా కేవలం 17.1 ఓవర్లలోనే 3 వికెట్లు కోల్పోయి 153 పరుగులు చేసి ఘనవిజయం సాధించింది.