Taapsee Pannu: హీరోయిన్ల అభ్యంతరకర సీన్లపై తాప్సీ సంచలన వ్యాఖ్యలు.. రిటైర్ అవుతానంటూ వార్నింగ్!

Taapsee Pannu: 'పెద్ది', 'టాక్సిక్' వంటి సినిమాల్లో హీరోయిన్లను అభ్యంతరకరంగా చూపించారన్న వివాదంపై బాలీవుడ్ నటి తాప్సీ పన్ను తాజాగా సంచలన వ్యాఖ్యలు చేశారు. సినిమాల్లో మహిళలను కేవలం గ్లామర్ బొమ్మలుగా, అభ్యంతరకరంగా చూపిస్తున్న తీరుపై ఆమె తీవ్ర అసంతృప్తి వ్యక్తం చేశారు. బాక్సాఫీస్ వద్ద కేవలం కలెక్షన్ల కోసమే కథను, ప్రతిభను పక్కనపెడుతున్నారని ఆమె మండిపడ్డారు. జాన్వీ కపూర్ నటించిన 'పెద్ది', యశ్ హీరోగా వస్తున్న 'టాక్సిక్' సినిమాల్లో హీరోయిన్ల పాత్రలను మితిమీరిన గ్లామర్‌తో చూపించారనే విమర్శలు నెట్టింట తీవ్రంగా వస్తున్న నేపథ్యంలో తాప్సీ ఈ కామెంట్స్ చేశారు. ఆమె నేరుగా ఈ సినిమాల పేర్లను ప్రస్తావించకపోయినా, పరోక్షంగా వీటి గురించే మాట్లాడారని నెటిజన్లు భావిస్తున్నారు.

ఈ విషయంపై చిత్ర నిర్మాతలు, దర్శకులను ప్రశ్నిస్తే వారు నేరుగా ఆడియన్స్‌ను బ్లేమ్ చేస్తున్నారని తాప్సీ ఆరోపించారు. 'ప్రేక్షకులు కోరుకునేదే మేము తీస్తున్నాం' అంటూ మేకర్స్ తప్పించుకుంటున్నారని ఆమె విమర్శించారు. ఇలాంటి సినిమాలు తీసి డబ్బులు సంపాదించడం కంటే, తాను ఇండస్ట్రీ నుంచి రిటైర్ అవ్వడమే మేలని ఆమె సంచలన ప్రకటన చేశారు. నటనపై తనకు ఎంత ఇష్టం ఉన్నప్పటికీ, తన వృత్తిపరమైన విలువలకు విరుద్ధంగా ఇలాంటి చెత్త సినిమాల్లో గుడ్డిగా నటించలేనని స్పష్టం చేశారు.

అభ్యంతరకరమైన సీన్ల విషయంలో కేవలం నెట్టింట వచ్చే విమర్శలే కాకుండా, ఆ సీన్లను వైరల్ చేసే ఒక ప్రత్యేక బ్యాచ్ కూడా ఉంటుందని ఆమె చెప్పుకొచ్చారు. కొందరు కావాలనే హీరోయిన్ల ఫోటోలను జూమ్ చేసి, విచిత్రమైన యాంగిల్స్‌లో వీడియోలు క్రియేట్ చేసి వైరల్ చేస్తుంటారని ఆమె ఆవేదన వ్యక్తం చేశారు. ఇలాంటి కంటెంట్‌కు కూడా ఒక వర్గం ఆడియన్స్ ఉంటారని, అది మరింత ప్రమాదకరమని ఆమె హెచ్చరించారు. ఒక సినిమా లాభాల్లోకి రావాలంటే రూ. 100 కోట్లు లేదా రూ. 200 కోట్లు కలెక్ట్ చేయాలన్న ఉద్దేశ్యంతో మేకర్స్ కమర్షియల్ అంశాలకే పెద్దపీట వేస్తున్నారని ఆమె పరోక్షంగా విమర్శించారు.

కరోనాకు ముందు బాలీవుడ్ ఇండస్ట్రీ మంచి కంటెంట్ ఉన్న సినిమాలతో హాలీవుడ్ స్థాయికి వెళ్లే దిశగా అడుగులు వేసిందని, కానీ ఇప్పుడు మళ్లీ వెనక్కి వెళ్లిపోతోందని ఆమె అభిప్రాయపడ్డారు. టెక్నాలజీ పరంగా మనం ఎదుగుతున్నా, కంటెంట్ విషయంలో మాత్రం రాజీ పడుతున్నామని విమర్శించారు. ప్రేక్షకుల్లో మార్పు వచ్చి మంచి కథలకు మద్దతు ఇస్తేనే ఈ పరిస్థితి మారుతుందని ఆమె ఆశాభావం వ్యక్తం చేశారు. హిందీ చిత్ర పరిశ్రమలో తాను కెరీర్ ప్రారంభించిన సమయంలో విభిన్నమైన కథలకు స్థానం ఉండేదని గుర్తుచేసుకున్నారు. ఒకవేళ ఇప్పుడున్న పరిస్థితుల్లో తాను ఇండస్ట్రీకి వచ్చి ఉంటే బహుశా నిలదొక్కుకునేదాన్ని కాదేమో అని ఆమె అన్నారు. 10 ఏళ్ల తర్వాత చూసుకున్నా గర్వపడేలా తన సినిమాలు ఉండాలని తాను కోరుకుంటున్నట్లు తాప్సీ స్పష్టం చేశారు. రూ. పదుల కోట్లు పారితోషికం ఆశించి ఇలాంటి సినిమాలు చేసేకంటే, గౌరవంగా తప్పుకోవడమే మంచిదని ఆమె చెప్పిన మాటలు ప్రస్తుతం ఇంటర్నెట్‌లో విపరీతంగా ట్రెండ్ అవుతున్నాయి.