IPL 2026 : ఐపీఎల్ చరిత్రలోనే అత్యంత చెత్త ఫీల్డర్..ముంబై కొంప ముంచిన 7 క్యాచ్‌ డ్రాప్‎లు

IPL 2026 : ఐపీఎల్ 2026 సీజన్‌లో ముంబై ఇండియన్స్ ప్రదర్శన అభిమానులను తీవ్ర నిరాశకు గురిచేస్తోంది. కేవలం బ్యాటింగ్, బౌలింగ్ మాత్రమే కాదు.. ఫీల్డింగ్ లోనూ ముంబై ఆటగాళ్లు ఘోరంగా విఫలమవుతున్నారు. పంజాబ్ కింగ్స్‌తో జరిగిన తాజా మ్యాచ్‌లో ముంబై ఫీల్డర్ల వైఫల్యం మరోసారి బయటపడింది. ముఖ్యంగా యంగ్ ప్లేయర్ నమన్ ధీర్ క్యాచ్‌లను వదిలేయడం జట్టుకు శాపంగా మారింది. బౌలర్లు కష్టపడి వికెట్ అవకాశాలు సృష్టిస్తున్నా, ఫీల్డర్లు వాటిని చేజార్చడం ముంబై కొంప ముంచుతోంది.

పంజాబ్ కింగ్స్‌తో జరిగిన 58వ మ్యాచ్‌లో ఇన్నింగ్స్ రెండో ఓవర్‌లోనే ముంబైకి పెద్ద అవకాశం వచ్చింది. స్టార్ బౌలర్ జస్ప్రీత్ బుమ్రా వేసిన అద్భుతమైన బంతికి పంజాబ్ ఓపెనర్ ప్రభ్‌సిమ్రాన్ సింగ్ బ్యాట్ అంచుకు తగిలి స్లిప్ దిశగా వెళ్ళింది. అక్కడ ఫీల్డింగ్ చేస్తున్న నమన్ ధీర్ అతి సులభమైన ఆ క్యాచ్‌ను నేలపాలు చేశాడు. దాంతో బుమ్రా తీవ్ర నిరాశకు లోనయ్యాడు. ఒకవేళ ఆ వికెట్ పడి ఉంటే మ్యాచ్ స్వరూపం మరోలా ఉండేది. కానీ నమన్ చేసిన తప్పిదం వల్ల పంజాబ్ భారీ స్కోరు సాధించడానికి మార్గం సుగమమైంది.

ఈ సీజన్‌లో నమన్ ధీర్ ఫీల్డింగ్ రికార్డు అత్యంత దారుణంగా ఉంది. ఇప్పటివరకు అతను మొత్తం 7 క్యాచ్‌లను వదిలేశాడు. ఐపీఎల్ 2026లో మరే ఇతర ఫీల్డర్ కూడా ఇన్ని క్యాచ్‌లు డ్రాప్ చేయలేదు. కీలక సమయాల్లో క్యాచ్‌లు చేజార్చడం వల్ల ప్రత్యర్థి బ్యాటర్లకు లైఫ్ లైన్ దొరికి, వారు చెలరేగిపోతున్నారు. ముంబై ఇండియన్స్ మేనేజ్మెంట్ నమన్‌ను కీలక స్థానాల్లో ఫీల్డింగ్‌కు పంపుతున్నా, అతను మాత్రం ఆ నమ్మకాన్ని నిలబెట్టుకోలేకపోతున్నాడు.

ఫీల్డింగ్ లోపాలు కేవలం నమన్ ధీర్‌కే పరిమితం కాలేదు. ఈ సీజన్‌లో ముంబై ఇండియన్స్ జట్టు మొత్తం కలిపి 11 క్యాచ్‌లను డ్రాప్ చేసింది. 11 మ్యాచ్‌లలో కేవలం 3 విజయాలు మాత్రమే సాధించిన ముంబై, అప్పుడే ప్లే ఆఫ్స్ రేసు నుంచి నిష్క్రమించింది. గ్రౌండ్ ఫీల్డింగ్ లోనూ ఆటగాళ్లు మిస్ ఫీల్డ్స్ చేస్తూ అదనపు పరుగులు ఇస్తున్నారు. ఒక ఛాంపియన్ జట్టుగా పేరున్న ముంబై, ఇలాంటి చిన్న చిన్న పొరపాట్లు చేయడం వల్ల పాయింట్ల పట్టికలో అట్టడుగున నిలిచింది.

ముంబై ఇండియన్స్ ఇప్పుడు తన తప్పుల నుంచి పాఠాలు నేర్చుకోవాల్సిన అవసరం ఉంది. కేవలం భారీ హిట్టర్లు ఉంటే సరిపోదు, మ్యాచ్‌లు గెలవాలంటే క్యాచెస్ విన్ మ్యాచెస్ అనే సూత్రాన్ని ఫాలో అవ్వాలి. వచ్చే సీజన్ నాటికి ఫీల్డింగ్ కోచ్, ఆటగాళ్లు తమ లోపాలను సరిదిద్దుకోకపోతే, ముంబై పరిస్థితి మరింత దిగజారే అవకాశం ఉంది. అభిమానులు మాత్రం సోషల్ మీడియాలో ఫీల్డర్ల వైఫల్యాలపై తీవ్రంగా విమర్శలు గుప్పిస్తున్నారు.