5 ఏళ్లుగా నిరాశే.. మరోసారి హ్యాండిచ్చిన బీసీసీఐ సెలెక్టర్లు.. ఒక్క మాటతో ఇచ్చిపడేసిన కోహ్లీ దోస్త్..!

Krunal Pandya 1st Reaction after India Squad aginst AFG: అఫ్గానిస్థాన్‌తో జరగనున్న మూడు టీ20ల సిరీస్‌కు భారత జట్టును బీసీసీఐ ప్రకటించింది. ఈ జట్టులో ఆల్‌రౌండర్‌ క‌ృణాల్‌ పాండ్యాకు చోటు దక్కలేదు. ఇటీవల ఐపీఎల్‌లో అద్భుతంగా రాణించడంతో అతడు తిరిగి టీమ్‌ఇండియాలోకి వస్తాడని ప్రచారం జరిగినప్పటికీ.. సెలెక్టర్లు మాత్రం అతడిని పక్కనపెట్టారు. ఈ పరిణామంపై క‌ృణాల్‌ తాజాగా స్పందించాడు.

‘ఆశ ఇంకా సజీవంగానే ఉంది’..!

అఫ్గాన్‌ సిరీస్‌కు ఎంపిక కాకపోవడంతో క‌ృణాల్‌ పాండ్యా తన ఇన్‌స్టాగ్రామ్‌ స్టోరీలో ఓ సందేశాన్ని పంచుకున్నాడు. “Hope Is Still Alive” అంటూ భారత జెండాతో కూడిన పోస్టును పెట్టాడు.

దీంతో టీమ్‌ఇండియాలోకి తిరిగి రావాలన్న తన ఆశలను క‌ృణాల్‌ ఇంకా వదులుకోలేదనే సంకేతాలు కనిపిస్తున్నాయి. ఈ పోస్టు సోషల్‌ మీడియాలో వైరల్‌గా మారింది.

ఐదేళ్లుగా జట్టుకు దూరం..

క‌ృణాల్‌ పాండ్యా చివరిసారిగా 2021లో శ్రీలంక పర్యటనలో భారత జెర్సీ ధరించాడు. ఆ తర్వాత జాతీయ జట్టులో అతడికి అవకాశం రాలేదు. భారత్‌ తరఫున ఇప్పటివరకు 19 టీ20లు, 5 వన్డేలు ఆడిన క్రుణాల్‌.. టీ20ల్లో 15 వికెట్లు పడగొట్టాడు. ఈ ఫార్మాట్‌లో నాలుగు వికెట్ల ప్రదర్శన కూడా అతడి ఖాతాలో ఉంది.

ఐపీఎల్‌లో అదరగొట్టినా..

అంతర్జాతీయ జట్టుకు దూరంగా ఉన్నప్పటికీ దేశవాళీ క్రికెట్‌, ఐపీఎల్‌లో క్రుణాల్‌ తన సత్తా చాటుతూనే ఉన్నాడు. ముఖ్యంగా ఆర్‌సీబీ తరపున 2026 ఐపీఎల్‌లో 14 వికెట్లు, 226 పరుగులు సాధించాడు. దీంతో అఫ్గానిస్థాన్‌ సిరీస్‌కు అతడిని ఎంపిక చేయవచ్చనే అంచనాలు పెరిగాయి.

అక్షర్‌ పటేల్‌ ఇటీవలి ప్రదర్శనలపై చర్చ జరగడంతో క‌ృణాల్‌ పేరు మరింత బలంగా వినిపించింది. అయితే చివరకు సెలెక్టర్లు అక్షర్‌పైనే నమ్మకం ఉంచారు. క‌ృణాల్‌ స్థానంలో వాషింగ్టన్‌ సుందర్‌ జట్టులో చోటు దక్కించుకున్నాడు.

రీఎంట్రీ కోసం ఎదురుచూపులు..

అఫ్గానిస్థాన్‌తో టీ20 సిరీస్‌ సెప్టెంబర్‌ 13 నుంచి ఢిల్లీలో ప్రారంభం కానుంది. శ్రేయస్‌ అయ్యర్‌ కెప్టెన్‌గా వ్యవహరించనున్న ఈ జట్టులో యువ ఆటగాడు వైభవ్‌ సూర్యవంశీకు కూడా చోటు దక్కింది. జస్ప్రీత్‌ బుమ్రా, సంజూ సామ్‌సన్‌ వంటి ఆటగాళ్లు తిరిగి జట్టులోకి వచ్చారు.

క‌ృణాల్‌కు మాత్రం ఈసారి నిరాశే ఎదురైంది. అయినప్పటికీ అతడి తాజా సందేశం చూస్తే.. టీమ్‌ఇండియాలోకి తిరిగి రావాలన్న లక్ష్యాన్ని మాత్రం అతడు వదులుకోలేదని స్పష్టమవుతోంది.

క‌ృణాల్‌ గణాంకాలు..

భారత్‌ తరపున ఆడిన టీ20లు: 19

టీ20 వికెట్లు: 15

వన్డేలు: 5

చివరి అంతర్జాతీయ మ్యాచ్‌: 2021

ఐపీఎల్‌ 2026లో ఆర్‌సీబీ తరఫున వికెట్లు: 14

ఐపీఎల్‌ 2026 పరుగులు: 226

అఫ్గానిస్థాన్‌ సిరీస్‌ జట్టులో చోటు దక్కకపోయినా.. ‘ఆశ ఇంకా సజీవంగానే ఉంది’ అంటూ క‌ృణాల్‌ ఇచ్చిన సందేశం అతడి పట్టుదలను చాటుతోంది. ఇక భవిష్యత్తులో సెలెక్టర్లు అతడికి మరో అవకాశం ఇస్తారా? అన్నదే ఆసక్తికరం.