IPL 2026 Points Table: ఐపీఎల్ పాయింట్ల పట్టికలో చెన్నై జంప్.. ముంబైని ముంచి ఆరో స్థానానికి సీఎస్‌కే

IPL 2026 Points Table: ఐపీఎల్ 2026 సీజన్ రసవత్తర దశకు చేరుకుంది. దశాబ్దకాలంగా ఐపీఎల్‌ను శాసిస్తున్న రెండు దిగ్గజ జట్లు చెన్నై సూపర్ కింగ్స్, ముంబై ఇండియన్స్ మధ్య జరిగిన పోరు పాయింట్ల పట్టికలో సమీకరణాలను పూర్తిగా మార్చేసింది. చెపాక్ స్టేడియంలో ముంబైని మట్టికరిపించిన చెన్నై, పాయింట్ల పట్టికలో ఒక మెట్టు పైకి ఎగబాకగా.. ముంబై ఇండియన్స్ పరిస్థితి మాత్రం అగమ్యగోచరంగా మారింది. ఈ విజయంతో రుతురాజ్ సేన ప్లేఆఫ్స్ ఆశలను సజీవంగా ఉంచుకుంది. చెన్నై సూపర్ కింగ్స్ ఈ సీజన్‌లో నెమ్మదిగా పుంజుకుంటోంది. ముంబై ఇండియన్స్‌తో జరిగిన మ్యాచ్‌లో 8 వికెట్ల తేడాతో ఘనవిజయం సాధించిన తర్వాత, సీఎస్‌కే పాయింట్ల పట్టికలో ఒక స్థానాన్ని మెరుగుపరుచుకుంది. ప్రస్తుతం 9 మ్యాచ్‌లు ఆడిన చెన్నై 4 విజయాలతో 8 పాయింట్లు సాధించి 6వ స్థానానికి చేరుకుంది. ఢిల్లీ క్యాపిటల్స్ కూడా 8 పాయింట్లతో ఉన్నప్పటికీ, నెట్ రన్ రేట్ (0.005) మెరుగ్గా ఉండటంతో చెన్నై వారిని వెనక్కి నెట్టింది. రుతురాజ్ గైక్వాడ్ కెప్టెన్సీలో టీమ్ తిరిగి ఫామ్‌లోకి రావడం ఫ్యాన్స్‌కు పెద్ద ఊరటనిస్తోంది.

మరోవైపు ఐదుసార్లు ఛాంపియన్ ముంబై ఇండియన్స్ పరిస్థితి చాలా దారుణంగా ఉంది. ఈ సీజన్‌లో ఇప్పటివరకు 9 మ్యాచ్‌లు ఆడిన ముంబై, కేవలం 2 మ్యాచ్‌ల్లోనే గెలిచి 7 మ్యాచ్‌ల్లో ఓడిపోయింది. కేవలం 4 పాయింట్లతో పట్టికలో 9వ స్థానంలో నిలిచింది. తాజా ఓటమితో ముంబై ప్లేఆఫ్స్ చేరడం దాదాపు అసాధ్యంగా కనిపిస్తోంది. ముంబై జట్టు తర్వాతి రౌండ్‌కు వెళ్లాలంటే మిగిలిన 5 మ్యాచ్‌ల్లోనూ తప్పనిసరిగా గెలవాలి. అలా గెలిస్తే 14 పాయింట్లు వస్తాయి, కానీ అప్పుడు కూడా ఇతర జట్ల ఫలితాల మీద ఆధారపడాల్సి ఉంటుంది.

ఈ సీజన్‌లో ముంబై, చెన్నై జట్లు రెండుసార్లు తలపడగా.. రెండింటిలోనూ చెన్నైదే పైచేయి కావడం విశేషం. వాంఖడేలో జరిగిన మొదటి మ్యాచ్‌లో చెన్నై 207 పరుగులు చేయగా, ముంబై కేవలం 104 పరుగులకే కుప్పకూలింది. తాజాగా చెపాక్‌లో జరిగిన రెండో మ్యాచ్‌లో కూడా ముంబైని 159 పరుగులకే కట్టడి చేసిన చెన్నై, కేవలం 2 వికెట్లు మాత్రమే కోల్పోయి లక్ష్యాన్ని ఛేదించింది. బ్యాటింగ్, బౌలింగ్ రెండు విభాగాల్లోనూ సీఎస్‌కే తన ఆధిపత్యాన్ని చాటుకుంది.

పాయింట్ల పట్టికలో అగ్రస్థానంలో ఉన్న జట్ల స్థానాల్లో పెద్దగా మార్పులు లేకపోయినా, మిడ్-ట్యాబ్ (మధ్యలో ఉన్న జట్లు) మధ్య పోటీ ఇప్పుడు తీవ్రమైంది. చెన్నై, ఢిల్లీ, గుజరాత్ వంటి జట్లు 8 పాయింట్లతో నాలుగో స్థానం కోసం పోటీ పడుతున్నాయి. రానున్న మ్యాచ్‌ల్లో ప్రతి గెలుపు, ప్రతి ఓటమి ప్లేఆఫ్స్ బెర్తులను నిర్ణయించబోతున్నాయి. చెన్నై తన మిగిలిన 5 మ్యాచ్‌ల్లో కనీసం 4 గెలిస్తే ప్లేఆఫ్స్ బెర్తు దాదాపు ఖాయం చేసుకుంటుంది.