IPL 2026: ల‌క్నో కెప్టెన్ మార‌డం ఖాయ‌మా.? తెర‌పైకి ఆ క్రికెట‌ర్ పేరు

IPL 2026: ఐపీఎల్ 2026 సీజన్‌లో లక్నో సూపర్ జెయింట్స్ ప్రదర్శన ఆశించిన స్థాయిలో లేకపోవడంతో జట్టులో కీలక మార్పులపై చర్చ మొదలైంది. ముఖ్యంగా కెప్టెన్‌గా ఉన్న రిష‌బ్ పంత్ భవిష్యత్తు ఇప్పుడు ప్రశ్నార్థకంగా మారింది.

త‌గ్గిన పంత్ ఫామ్

ఈ సీజన్‌లో పంత్ ప్రదర్శన ఆశించిన విధంగా లేదు. 9 మ్యాచ్‌ల్లో కేవలం 204 పరుగులు మాత్రమే చేశాడు. అతని స్ట్రైక్ రేట్ కూడా తక్కువగా ఉండటం విమర్శలకు దారితీసింది. గత సీజన్‌లో కూడా పెద్దగా మెరుగైన ప్రదర్శన లేకపోవడంతో ఇది వరుస వైఫల్యంగా మారింది.

కెప్టెన్సీ ఒత్తిడి.. ఆటపై ప్రభావం

మాజీ ఆటగాడు రోహ‌న్ గ‌వ‌స్కార్ అభిప్రాయం ప్రకారం, కెప్టెన్సీ బాధ్యతలే పంత్ ఆటను దెబ్బతీస్తున్నాయి. సహజంగా అటాకింగ్‌గా ఆడే అతను, ఒత్తిడిలో జాగ్రత్తగా ఆడుతూ తన స్టైల్‌ను కోల్పోతున్నాడని విశ్లేషించారు. ఇదే విషయాన్ని మ‌నోజ్ తివారీ కూడా మద్దతు ఇస్తూ, పంత్‌ను కేవలం బ్యాటర్‌గా ఉపయోగిస్తే మెరుగైన ఫలితాలు వస్తాయని సూచించారు.

మార్క్‌రమ్ పేరు ముందుకు..

పంత్ స్థానంలో కెప్టెన్‌గా ఐడెన్ మార్క్‌రమ్ పేరును పలువురు సూచిస్తున్నారు. దక్షిణాఫ్రికా టీ20 జట్టును నడిపించిన అనుభవం ఉన్న ఐడెన్ మార్క్‌రమ్, లీడర్‌గా ప్రశాంతంగా నిర్ణయాలు తీసుకునే వ్యక్తిగా గుర్తింపు పొందాడు. అతని నాయకత్వంలో సన్‌రైజర్స్ ఈస్టర్న్ కేప్ జట్టు వరుసగా టైటిల్స్ సాధించడం అతని సామర్థ్యాన్ని చూపిస్తుంది.

యాజమాన్యం ముందు కఠిన నిర్ణయం

లక్నో యజమాని సంజీవ్‌ గోయెంకాకు పంత్‌పై విశ్వాసం ఉన్నప్పటికీ, జట్టు ఫలితాలు ఆలోచించాల్సిన పరిస్థితిని తీసుకొచ్చాయి. భవిష్యత్తును దృష్టిలో పెట్టుకుని జట్టును గాడిలో పెట్టాలంటే నాయకత్వ మార్పు తప్పనిసరి అనే అభిప్రాయం బలపడుతోంది.