IND vs AFG: టీమిండియాతో టీ20 సిరీస్‌.. ఆ ముగ్గురితోనే అసలు ముప్పు..?

IND vs AFG: భారత్, అఫ్గానిస్థాన్ మధ్య మూడు టీ20ల సిరీస్ సెప్టెంబర్ 11 నుంచి భారత్‌లో జరగనుంది. ఈ సిరీస్ కోసం అఫ్గానిస్థాన్ క్రికెట్ బోర్డు 15 మంది సభ్యులతో కూడిన జట్టును ప్రకటించింది. ఇబ్రహీం జద్రాన్ కెప్టెన్‌గా వ్యవహరించనున్నాడు.

రషీద్ ఖాన్, రహ్మానుల్లా గుర్బాజ్, నూర్ అహ్మద్ వంటి ఆటగాళ్లతో జట్టు బలంగా కనిపిస్తోంది. నవీన్ ఉల్ హక్, గుల్బదిన్ నాయబ్ తిరిగి జట్టులోకి వచ్చారు. భారత్‌పై ఇప్పటివరకు టీ20 సిరీస్ విజయాన్ని నమోదు చేయని అఫ్గాన్ జట్టు ఈసారి ఆ లోటును తీర్చుకోవాలని చూస్తోంది. అందులో భాగంగా భారత్‌కు ఇబ్బందులు సృష్టించగల ముగ్గురు ఆటగాళ్లపై ప్రత్యేకంగా దృష్టి పడుతోంది.

1. గుల్బదిన్ నాయబ్..

35 ఏళ్ల గుల్బదిన్ నాయబ్ భారత్‌పై మంచి రికార్డు ఉంది. అతడు టీమిండియాపై ఇప్పటివరకు రెండు టీ20 ఇన్నింగ్స్‌లు ఆడి 112 పరుగులు చేశాడు. అతని సగటు కూడా 112గా ఉండటం విశేషం. అంతేకాదు, భారత్‌తో ఆడిన రెండు మ్యాచ్‌ల్లోనూ అర్ధశతకాలు సాధించాడు.

బౌలింగ్‌లో మాత్రం భారత్‌పై ఇప్పటివరకు ఒక్క ఓవర్ మాత్రమే వేసే అవకాశం నాయబ్‌కు వచ్చింది. బ్యాటింగ్‌తో పాటు బౌలింగ్‌లోనూ ఉపయోగపడగల ఈ ఆల్‌రౌండర్ తిరిగి రావడం అఫ్గాన్ జట్టుకు బలాన్నిచ్చే అంశం.

2. ఇబ్రహీం జద్రాన్..

ఇబ్రహీం జద్రాన్ ఈ ఏడాది అఫ్గానిస్థాన్ తరపున అత్యధిక పరుగులు చేసిన బ్యాటర్. 2026లో కేవలం ఏడు ఇన్నింగ్స్‌ల్లోనే 307 పరుగులు చేశాడు. అతని బ్యాటింగ్ సగటు 61.40గా ఉంది. టీమిండియాపై కూడా జద్రాన్‌కు అనుభవం ఉంది.

భారత్‌తో మూడు ఇన్నింగ్స్‌ల్లో 83 పరుగులు చేశాడు. అందులో ఒక అర్ధశతకం ఉంది. కెప్టెన్సీ బాధ్యతలతో పాటు బ్యాట్‌తోనూ జట్టును ముందుండి నడిపించాల్సిన కీలక ఆటగాడు అతడే.

3. రషీద్ ఖాన్..

రషీద్ ఖాన్ గురించి ప్రత్యేక పరిచయం అవసరం లేదు. టీ20 క్రికెట్ చరిత్రలో అత్యధిక వికెట్లు తీసిన బౌలర్‌గా ఉన్న అతడు ప్రస్తుతం అద్భుత ఫామ్‌లో ఉన్నాడు. ఐర్లాండ్‌తో ఇటీవల ముగిసిన సిరీస్‌లో కేవలం మూడు ఇన్నింగ్స్‌ల్లోనే 12 వికెట్లు పడగొట్టాడు. తొలి మ్యాచ్‌లో ఆరు వికెట్ల ప్రదర్శన ఇచ్చిన రషీద్, తర్వాతి రెండు మ్యాచ్‌ల్లో మూడేసి వికెట్లు తీశాడు.

విచిత్రంగా భారత్‌తో ద్వైపాక్షిక సిరీస్‌లో రషీద్ ఇప్పటివరకు బౌలింగ్ చేయలేదు. టీమిండియాతో జరగబోయే సిరీస్ అతడికీ కొత్త సవాలుగా నిలవనుంది.

గుల్బదిన్ నాయబ్‌కు భారత్‌పై అద్భుతమైన బ్యాటింగ్ రికార్డు ఉండగా, ఇబ్రహీం జద్రాన్ ప్రస్తుత ఫామ్‌లో ఉన్నాడు. మరోవైపు రషీద్ ఖాన్ తన స్పిన్‌తో మ్యాచ్‌ను మలుపుతిప్పగల సామర్థ్యం కలిగి ఉండటంతో, ఈ ముగ్గురిపై టీమిండియా ప్రత్యేక దృష్టి పెట్టాల్సి ఉంటుంది.