శ్రీలంకతో తలపడే భారత జట్టు ఇదే.. రీఎంట్రీ ఇచ్చిన ఇద్దరు తోపులు.. తెలుగబ్బాయ్ ఔట్..!

India Test squad For Sri Lanka: దాదాపు ఐదేళ్ల సుదీర్ఘ విరామం తర్వాత శ్రీలంక గడ్డపై టెస్ట్ సిరీస్ ఆడేందుకు భారత జట్టు సన్నద్ధమైంది. ఈ ప్రతిష్టాత్మక పర్యటన కోసం 15 మంది సభ్యులతో కూడిన అత్యంత పటిష్టమైన జట్టును బీసీసీఐ తాజాగా ప్రకటించింది. సీనియర్ ఆటగాళ్లు జస్ప్రీత్ బుమ్రా, రవీంద్ర జడేజా తిరిగి జట్టులోకి రావడం అభిమానుల్లో సరికొత్త ఉత్సాహం నింపుతోంది.

శుభ్‌మన్ గిల్ సేన ముందున్న సవాల్..

ఐదేళ్ల కిందట ఉన్న శ్రీలంక వాతావరణం, అక్కడి జట్టు బలాబలాలు ఇప్పుడు పూర్తిగా మారిపోయాయి. శ్రీలంక సైతం సొంత గడ్డపై ఎప్పుడూ ప్రమాదకరమైన జట్టే అనడంలో ఎలాంటి సందేహం లేదు. గతంలో దిగ్గజ ఆటగాళ్లు ముత్తయ్య మురళీధరన్, రంగనా హెరాత్ లాంటి స్పిన్నర్లు భారత బ్యాటర్లను ముప్పుతిప్పలు పెట్టిన చరిత్ర లంక గడ్డపై ఉంది. లంక జట్టులో అద్భుతమైన స్పిన్ వనరులున్నా మన కుర్రాళ్లు స్పిన్‌ను దీటుగా ఎదుర్కోవడంలో ప్రత్యేక శిక్షణ తీసుకున్నారు.

ఈ ఐదేళ్ల కాలంలో భారత క్రికెట్‌లో ఎన్నో పెను మార్పులు చోటుచేసుకున్నాయి. సీనియర్ల గైర్హాజరీలో కుర్రాళ్లు బాధ్యత తీసుకుని అద్భుత విజయాలు సాధిస్తూ శభాష్ అనిపించుకుంటున్నారు. ముఖ్యంగా ఓవర్సీస్ గడ్డపై యువ కెప్టెన్ శుభ్‌మన్ గిల్ నాయకత్వంలో టీమిండియా ఆడుతున్న రెండో టెస్ట్ సిరీస్ ఇది. గతంలో ఇంగ్లండ్ లాంటి కఠినమైన పర్యటనలో క్లిష్ట పరిస్థితులను ఎదుర్కొని సిరీస్‌ను 2-2 తో డ్రాగా ముగించిన అద్భుతమైన ట్రాక్ రికార్డ్ గిల్ సేనకు ఉంది. గిల్ నాయకత్వ లక్షణాలకు, అతని వ్యూహ రచనకు ఈ సిరీస్ గీటురాయిగా నిలవనుంది. రాబోయే ప్రపంచ టెస్ట్ ఛాంపియన్‌షిప్ ఫైనల్ రేసులో ముందు వరుసలో నిలవాలంటే ఈ సిరీస్‌లో కచ్చితంగా విజయం సాధించాలి.

బుమ్రా, జడేజా రీఎంట్రీతో పెరిగిన బలం..

జట్టు ప్రణాళికలు, కాంబినేషన్ల గురించి విశ్లేషిస్తే బౌలింగ్ విభాగం అత్యంత పటిష్టంగా కనిపిస్తోంది. గత సిరీస్‌లకు దూరమైన స్టార్ ఆటగాళ్లు జస్ప్రీత్ బుమ్రా, రవీంద్ర జడేజా తిరిగి స్క్వాడ్‌లోకి వచ్చేశారు. వీరిద్దరి పునరాగమనం భారత జట్టు శిబిరంలో కొండంత ధైర్యాన్ని నింపుతోంది. లంక పిచ్‌లు సాధారణంగా మొదటి రోజు నుంచే నెమ్మదించి స్పిన్‌కు అమితంగా సహకరిస్తాయి. ఇలాంటి పరిస్థితుల్లో బంతితో, బ్యాట్‌తో మాయ చేయగల సామర్థ్యం ఉన్న జడేజా పాత్ర మ్యాచ్‌ను మలుపు తిప్పే అవకాశం మెండుగా ఉంది. బ్యాటింగ్ ఆర్డర్ కుప్పకూలిన సందర్భాల్లో జడేజా ఆదుకున్న తీరును క్రికెట్ ఫ్యాన్స్ ఎప్పటికీ మర్చిపోలేరు.

విశ్రాంతి తర్వాత జట్టులోకి వచ్చిన ప్రపంచంలోనే అత్యుత్తమ పేసర్ బుమ్రా తన పదునైన యార్కర్లతో ప్రత్యర్థి బ్యాటింగ్ లైనప్‌ను కుప్పకూల్చేందుకు సిద్ధమయ్యాడు. పేస్ విభాగంలో బుమ్రాకు తోడుగా హైదరాబాదీ స్పీడ్‌స్టర్ మహ్మద్ సిరాజ్, యంగ్ సెన్సేషన్ ప్రసిద్ధ్ కృష్ణ పేస్ బాధ్యతలు పంచుకోనున్నారు. ముఖ్యంగా ఆసియా కప్ ఫైనల్లో శ్రీలంక బ్యాటింగ్ లైనప్‌ను కకావికలం చేసిన సిరాజ్ రికార్డు ఆ జట్టుకు సైకలాజికల్ గా పెద్ద దెబ్బ. సిరాజ్ బంతిని స్వింగ్ చేసే తీరు లంక ఓపెనర్లకు కంటిమీద కునుకు లేకుండా చేస్తుంది. హైట్‌లోనే కాదు బౌన్స్ రాబట్టడంలో ప్రసిద్ధ్ కృష్ణ దిట్ట. దేశవాళీలో రాణించిన యువ బౌలర్ గుర్నూర్ బ్రార్‌కు సైతం ఈ పర్యటనలో చోటు దక్కడం అతడి కెరీర్‌కు గొప్ప బూస్ట్ ఇవ్వనుంది.

బ్యాటింగ్ ఆర్డర్.. అంతా కుర్రాళ్ల జోరు..

బ్యాటింగ్ లైనప్ వైపు చూస్తే పూర్తిగా యువ రక్తంతో ఉరకలేస్తోంది. ఎక్కడా భయం లేకుండా బ్యాట్ ఝుళిపించే డాషింగ్ ఓపెనర్ యశస్వి జైస్వాల్, కేఎల్ రాహుల్ ఇన్నింగ్స్ ప్రారంభించే అవకాశం ఉంది. రాహుల్ సీనియారిటీని పరిగణనలోకి తీసుకున్న సెలెక్టర్లు అతడికి వైస్ కెప్టెన్సీ బాధ్యతలు అప్పగించారు. వికెట్ కీపర్లుగా రిషభ్ పంత్, ధ్రువ్ జురెల్ ఎంపికయ్యారు. పంత్ తన మార్క్ అటాకింగ్ ఆటకు పెట్టింది పేరు కాగా ఎంతటి క్లిష్ట పరిస్థితుల్లో అయినా ఒత్తిడికి గురికాకుండా నిలకడగా ఆడే సత్తా జురెల్ సొంతం. ఇంగ్లండ్ సిరీస్‌లో ఒత్తిడికి చిత్తవకుండా అద్భుతమైన ఇన్నింగ్స్‌లు ఆడిన జురెల్ వికెట్ కీపింగ్ నైపుణ్యాలు సైతం జట్టుకు అదనపు ఆస్తి. టెస్ట్ ఫార్మాట్‌లో పంత్ క్రీజులో ఉంటే స్కోరు బోర్డు పరుగులు పెట్టడం గ్యారెంటీ.

మిడిలార్డర్‌ను మరింత బలోపేతం చేసేందుకు ప్రతిభావంతులైన ఎడమచేతి వాటం బ్యాటర్లు సాయి సుదర్శన్, దేవదత్ పడిక్కల్ జట్టుతో చేరారు. దేశవాళీ క్రికెట్‌లో వీరు కనబరిచిన స్థిరమైన ప్రదర్శన, భారీ స్కోర్లే వీరిని జాతీయ జట్టులో నిలబెట్టాయి. స్పిన్ విభాగంలో జడేజాతో కలిసి మ్యాజిక్ స్పిన్నర్ కుల్దీప్ యాదవ్ కీలక వ్యూహాలు అమలు చేస్తాడు. మానవ్ సుతార్, సారాంశ్ జైన్ లాంటి యువ స్పిన్నర్లు లంక బ్యాటర్ల సహనానికి గట్టి పరీక్ష పెడతారు.

శ్రీలంక టూర్‌కు ఎంపికైన 15 మంది సభ్యుల భారత టెస్ట్ జట్టు..

కెప్టెన్: శుభ్‌మన్ గిల్

వైస్ కెప్టెన్: కేఎల్ రాహుల్

బ్యాటర్లు: యశస్వి జైస్వాల్, దేవదత్ పడిక్కల్, సాయి సుదర్శన్

వికెట్ కీపర్లు: రిషభ్ పంత్, ధ్రువ్ జురెల్

ఆల్‌రౌండర్లు / స్పిన్నర్లు: రవీంద్ర జడేజా, కుల్దీప్ యాదవ్, మానవ్ సుతార్, సారాంశ్ జైన్

ఫాస్ట్ బౌలర్లు: జస్ప్రీత్ బుమ్రా, మహ్మద్ సిరాజ్, ప్రసిద్ధ్ కృష్ణ, గుర్నూర్ బ్రార్

శ్రీలంక టూర్ ఎప్పుడూ విదేశీ జట్లకు ఒక కఠినమైన సవాల్ లాంటిదే. అయితే యువ ఆటగాళ్ల దూకుడు, సీనియర్ల అపార అనుభవం మేళవించిన ఈ సరికొత్త భారత జట్టు అక్కడ విజయదుందుభి మోగించడం ఖాయంగా కనిపిస్తోంది. త్వరలో మొదలుకానున్న ఈ టెస్ట్ సమరం కోసం క్రికెట్ అభిమానులు కళ్లు కాయలు కాచేలా ఎదురుచూస్తున్నారు.