IND vs ZIM T20I: జింబాబ్వేతో తొలి టీ20 పోరుకు భారత్ సిద్ధం.. హెడ్ టు హెడ్ రికార్డులు ఇవే..!

India vs Zimbabwe 1st T20I: ఐర్లాండ్, ఇంగ్లాండ్ పర్యటనల్లో చేదు అనుభవాలను ఎదుర్కొన్న భారత టీ20 జట్టు, ఇప్పుడు జింబాబ్వేతో సమరానికి సిద్ధమైంది. నేటి నుంచి హరారే వేదికగా ప్రారంభం కానున్న మూడు మ్యాచ్‌ల టీ20 సిరీస్‌లో శ్రేయస్ అయ్యర్ నేతృత్వంలోని యంగ్ ఇండియా విజయాన్నే లక్ష్యంగా పెట్టుకుంది. ఈ క్రమంలో ఇరు జట్ల మధ్య ఉన్న హెడ్ టు హెడ్ గణాంకాలు, రికార్డులను ఓసారి చూద్దాం..

ఫామ్ లేమితో సతమతమవుతున్న యంగ్ ఇండియా..

ఇటీవల ముగిసిన టీ20 సిరీస్‌లలో భారత్ ఆశించిన స్థాయిలో రాణించలేకపోయింది. ఐర్లాండ్ చేతిలో పరాజయం, ఆ తర్వాత ఇంగ్లాండ్ పర్యటనలో 0-4 తేడాతో సిరీస్ కోల్పోవడం శ్రేయస్ అయ్యర్ సారథ్యంలోని భారత జట్టును తీవ్ర ఒత్తిడిలోకి నెట్టింది. టీ20 కెప్టెన్‌గా తన పయనాన్ని ఓటములతో ప్రారంభించిన అయ్యర్‌కు, ఈ జింబాబ్వే పర్యటన అత్యంత కీలకంగా మారింది. ఈ సిరీస్ ద్వారా తిరిగి విజయాల బాట పట్టి, ఫామ్‌ను పునరుద్ధరించుకోవాలని టీమిండియా గట్టి పట్టుదలతో ఉంది.

మరోవైపు జింబాబ్వే కూడా ఇటీవల బంగ్లాదేశ్‌తో జరిగిన టీ20 సిరీస్‌లో తొలి మ్యాచ్ గెలిచినా, తర్వాతి రెండు మ్యాచ్‌లలో ఓడి సిరీస్‌ను చేజార్చుకుంది. సికందర్ రజా నాయకత్వంలో బరిలోకి దిగుతున్న జింబాబ్వే, స్వదేశంలో భారత్‌ను దెబ్బతీయాలని వ్యూహాలు రచిస్తోంది.

పొట్టి ఫార్మాట్‌లో భారత్‌దే పైచేయి..

టీ20 అంతర్జాతీయ క్రికెట్‌లో భారత్, జింబాబ్వే జట్లు ఇప్పటివరకు 14 మ్యాచ్‌లలో ముఖాముఖిగా తలపడ్డాయి. ఇందులో భారత్ స్పష్టమైన ఆధిక్యాన్ని ప్రదర్శిస్తూ 11 మ్యాచ్‌లలో విజయం సాధించగా, జింబాబ్వే 3 మ్యాచ్‌లలో మాత్రమే గెలిచింది.

ఆసక్తికర గణాంకాలు..

అత్యధిక టీమ్ స్కోరు: 2026 టీ20 ప్రపంచకప్‌లో జింబాబ్వేపై భారత్ నమోదు చేసిన 256/4 పరుగులే ఇప్పటివరకు అత్యధిక జట్టు స్కోరుగా నిలిచింది.

అత్యల్ప టీమ్ స్కోరు: 2016లో హరారే వేదికగా జింబాబ్వే నమోదు చేసిన 99/9 పరుగులేఅత్యల్ప స్కోరుగా నిలిచింది.

అత్యధిక వ్యక్తిగత స్కోరు: అభిషేక్ శర్మ 61 బంతుల్లో సాధించిన 100 పరుగులే ఇరు జట్ల మధ్య అత్యధిక వ్యక్తిగత స్కోర్‌గా నిలిచింది.

బెస్ట్ బౌలింగ్: 2016లో భారత పేసర్ బరీందర్ శ్రాన్ 4 ఓవర్లలో 4/10 వికెట్లు పడగొట్టి అత్యుత్తమ బౌలింగ్ గణాంకాలను సొంతం చేసుకున్నాడు.

అత్యధిక పరుగులు: జింబాబ్వే కెప్టెన్ సికందర్ రజా 11 మ్యాచ్‌లలో 194 పరుగులతో అగ్రస్థానంలో ఉండగా, భారత్ తరపున అభిషేక్ శర్మ 5 మ్యాచ్‌లలో 179 పరుగులు చేశాడు.

అత్యధిక వికెట్లు: వాషింగ్టన్ సుందర్ 5 మ్యాచ్‌లలో 8 వికెట్లు పడగొట్టి (ఎకానమీ 5.16) అగ్రస్థానంలో ఉన్నాడు. ముకేష్ కుమార్, అక్షర్ పటేల్ కూడా చెరో 8 వికెట్లు తీసినప్పటికీ, ఎకానమీ రేట్ ఆధారంగా సుందర్ ముందున్నాడు.

చివరి మ్యాచ్..

ఈ ఏడాది టీ20 ప్రపంచకప్‌లో చెన్నై వేదికగా ఇరు జట్లు చివరిసారి తలపడ్డాయి. ఆ పోరులో అర్ష్‌దీప్ సింగ్ (3/24) అద్భుత బౌలింగ్‌తో మెరిశాడు. బ్యాటింగ్ విభాగంలో జింబాబ్వే బ్యాటర్ బ్రయాన్ బెన్నెట్ 59 బంతుల్లో 97 పరుగులతో చెలరేగి ఆకట్టుకున్నాడు.

ఇరు జట్ల చివరి 5 మ్యాచ్‌ల రికార్డులు..

భారత్: ఓటమి, ఓటమి, ఓటమి, ఓటమి, ఓటమి

జింబాబ్వే: ఓటమి, ఓటమి, గెలుపు, ఓటమి, ఓటమి

వరుస పరాజయాల నుంచి కోలుకోవడానికి టీమిండియాకు ఈ జింబాబ్వే సిరీస్ ఒక మంచి అవకాశం. అయితే, స్వదేశీ మైదానంలో డేంజర్ టీమ్‌గా మారే జింబాబ్వేను తక్కువ అంచనా వేస్తే భారత్‌కు ముప్పు తప్పదు. హరారే వేదికగా వరుసగా నాలుగు రోజుల్లో మూడు మ్యాచ్‌లు జరగనున్న నేపథ్యంలో, మొదటి మ్యాచ్‌లోనే గెలిచి బోణీ కొట్టాలని శ్రేయస్ సేన తహతహలాడుతోంది.