DC vs KKR : ఢిల్లీ బ్యాటర్లకు కేకేఆర్ బౌలర్ల చుక్కలు.. 51 డాట్ బంతులతో రికార్డు ఊచకోత

DC vs KKR : ఐపీఎల్ 2026 సీజన్‌లో భాగంగా శుక్రవారం రాత్రి ఢిల్లీలోని అరుణ్ జైట్లీ స్టేడియంలో జరిగిన 51వ మ్యాచ్‌లో కోల్‌కతా నైట్ రైడర్స్ (KKR) బౌలర్లు నిప్పులు చెరిగారు. ఢిల్లీ క్యాపిటల్స్ (DC) బ్యాటర్లను వారి సొంత గడ్డపైనే ఉక్కిరిబిక్కిరి చేస్తూ, పరుగుల కోసం కటకటలాడేలా చేశారు. పక్కా వ్యూహంతో బరిలోకి దిగిన కేకేఆర్ బౌలర్లు.. ఢిల్లీ ఇన్నింగ్స్‌ను కేవలం 142 పరుగులకే కట్టడి చేసి మ్యాచ్‌ను తమవైపు తిప్పుకున్నారు. ఈ మ్యాచ్‌లో టాస్ గెలిచిన కేకేఆర్ కెప్టెన్ రహానే ఫీల్డింగ్ ఎంచుకోగా, ఢిల్లీకి ఓపెనర్లు పథుమ్ నిస్సాంక, కేఎల్ రాహుల్ మంచి ఆరంభాన్ని ఇచ్చారు. తొలి 5 ఓవర్లలోనే 49 పరుగులు జోడించి భారీ స్కోరు చేసేలా కనిపించారు. నిస్సాంక 30 బంతుల్లో 50 పరుగులు చేసి హాఫ్ సెంచరీ పూర్తి చేయగా, కేఎల్ రాహుల్ 23 పరుగులతో ఫర్వాలేదనిపించాడు. అయితే, వీరిద్దరూ అవుట్ అయిన తర్వాత ఢిల్లీ ఇన్నింగ్స్ ఒక్కసారిగా కుప్పకూలింది. మధ్య ఓవర్లలో (7 నుంచి 15 వరకు) కేకేఆర్ బౌలర్లు కేవలం 43 పరుగులు మాత్రమే ఇచ్చి 4 వికెట్లు పడగొట్టారు. ఇది ఈ సీజన్‌లోనే అత్యంత చెత్త మిడిల్ ఓవర్ స్కోరుగా నమోదైంది.

ఢిల్లీ బ్యాటర్లు ఈ ఇన్నింగ్స్‌లో ఏకంగా 51 డాట్ బంతులు ఆడటం అందరినీ ఆశ్చర్యపరిచింది. అంటే దాదాపు 8.3 ఓవర్ల పాటు ఢిల్లీ బ్యాటర్లు ఒక్క పరుగు కూడా తీయలేకపోయారు. నితీష్ రాణా (8), సమీర్ రిజ్వీ (3), ట్రిస్టన్ స్టబ్స్ (2) వంటి హిట్టర్లు చేతులెత్తేశారు. చివరకు కెప్టెన్ అక్షర్ పటేల్ కూడా 22 బంతులు ఆడి కేవలం 11 పరుగులు మాత్రమే చేయగలిగారంటే కేకేఆర్ బౌలర్లు ఎంతలా కట్టడి చేశారో అర్థం చేసుకోవచ్చు. చివర్లో ఆశుతోష్ శర్మ 39 పరుగులతో మెరుపులు మెరిపించకపోయి ఉంటే ఢిల్లీ స్కోరు 120 దాటడం కూడా కష్టమయ్యేది.

కేకేఆర్ బౌలర్లలో అనుకూల్ రాయ్, కార్తీక్ త్యాగి అత్యంత ప్రభావవంతంగా బౌలింగ్ చేశారు. వీరిద్దరూ తలో రెండు వికెట్లు తీసి ఢిల్లీ నడ్డి విరిచారు. వైభవ్ అరోరా, సునీల్ నరైన్, కేమరూన్ గ్రీన్ తలో వికెట్ పడగొట్టగా, వరుణ్ చక్రవర్తి వికెట్ తీయకపోయినా తన 4 ఓవర్లలో కేవలం 28 పరుగులు మాత్రమే ఇచ్చి కట్టుదిట్టమైన బౌలింగ్ ప్రదర్శన చేశాడు. ఢిల్లీ ఇన్నింగ్స్ మొత్తం మీద కేవలం 6 సిక్సర్లు మాత్రమే నమోదయ్యాయి. ఇందులో నిస్సాంక, ఆశుతోష్ తలో మూడు కొట్టగా మిగిలిన వారెవరూ కనీసం ఒక్క సిక్సర్ కూడా కొట్టలేకపోయారు.

సొంత మైదానంలో ఇంత తక్కువ స్కోరుకే పరిమితం కావడం ఢిల్లీ ప్లేఆఫ్స్ ఆశలపై నీళ్లు చల్లింది. ఢిల్లీ ఈ సీజన్‌లో ఆడిన 10 మ్యాచ్‌ల్లో ఇప్పటికే 6 ఓటములతో పాయింట్ల పట్టికలో వెనుకబడింది. మరోవైపు కేకేఆర్ ఈ విజయంతో పాయింట్ల పట్టికలో జంప్ చేసి ప్లేఆఫ్స్ రేసులో గట్టి పోటీనిస్తోంది. బ్యాటింగ్, బౌలింగ్ రెండు విభాగాల్లోనూ కేకేఆర్ సమష్టిగా రాణించడం ఆ జట్టు అభిమానుల్లో కొత్త ఉత్సాహాన్ని నింపుతోంది.