ఢిల్లీ వేదికగా భారత్, అఫ్గానిస్థాన్ టీ20 పోరు.. అరుణ్ జైట్లీలో తోపు టీం ఏదంటే..?

India vs Afghanistan T20I: భారత్, అఫ్గానిస్థాన్ జట్ల మధ్య ప్రతిష్టాత్మక మూడు మ్యాచ్‌ల టీ20 సిరీస్ ఢిల్లీలోని అరుణ్ జైట్లీ స్టేడియంలో సెప్టెంబర్ 13 నుంచి ప్రారంభం కానుంది. ఈ సిరీస్‌కు అధికారికంగా అఫ్గానిస్థాన్ క్రికెట్ బోర్డు ఆతిథ్యం ఇస్తున్నప్పటికీ, మ్యాచ్‌లన్నీ ఢిల్లీ వేదికగానే జరగనున్నాయి. సీనియర్లతో పాటు యువ ప్రతిభతో కూడిన భారత జట్టు పూర్తి ఆధిపత్యం ప్రదర్శించి సిరీస్ సొంతం చేసుకోవాలని పట్టుదలతో ఉండగా, బలమైన అఫ్గాన్ జట్టు గట్టి సవాల్ విసిరేందుకు వ్యూహాలు రచిస్తోంది.

శ్రేయస్ అయ్యర్ సారథ్యం.. బలమైన బ్యాటింగ్ లైనప్..

ఈ సిరీస్‌లో భారత జట్టుకు శ్రేయస్ అయ్యర్ నాయకత్వం వహిస్తుండగా, తెలుగు క్రికెటర్ తిలక్ వర్మ వైస్ కెప్టెన్‌గా వ్యవహరిస్తున్నాడు. విధ్వంసకర ఓపెనర్లు అభిషేక్ శర్మ, ఇషాన్ కిషన్, సంజు శాంసన్‌లతో పాటు యువ సంచలనం వైభవ్ సూర్యవంశీ బ్యాటింగ్ విభాగానికి ప్రధాన బలంగా నిలవనున్నారు. మిడిలార్డర్‌లో శివం దూబే, నితీశ్ కుమార్ రెడ్డి వంటి పవర్ హిట్టర్లు జట్టుకు భారీ స్కోర్లు అందించే సత్తా కలిగి ఉన్నారు.

అరుణ్ జైట్లీ స్టేడియం రికార్డులు..

అరుణ్ జైట్లీ మైదానంలో టీమిండియాకు మంచి ట్రాక్ రికార్డు ఉంది. చిన్న బౌండరీలు, బ్యాటింగ్‌కు అనుకూలించే వికెట్ ఉన్న ఈ మైదానంలో భారీ స్కోర్లు నమోదయ్యే అవకాశం ఎక్కువ. గతంలో బంగ్లాదేశ్‌పై భారత్ ఇక్కడ నమోదు చేసిన 221 పరుగుల స్కోరే ఈ వేదికపై అత్యధిక టీ20 స్కోరుగా కొనసాగుతోంది.

స్పిన్ మాయాజాలం.. పేస్ దళం

బౌలింగ్ విభాగంలో స్టార్ పేసర్ జస్‌ప్రీత్ బుమ్రా, లెఫ్టార్మ్ పేసర్ అర్ష్‌దీప్ సింగ్ భారత్‌కు ప్రధాన అస్త్రాలుగా మారనున్నారు. స్పిన్ విభాగంలో వరుణ్ చక్రవర్తి, రవి బిష్ణోయ్, వాషింగ్టన్ సుందర్, అక్షర్ పటేల్ ప్రత్యర్థిని కట్టడి చేసేందుకు సిద్ధంగా ఉన్నారు. మరోవైపు, ఇబ్రహీమ్ జద్రన్ నేతృత్వంలోని అఫ్గాన్ జట్టులో రషీద్ ఖాన్, మహమ్మద్ నబీ, ముజీబ్ ఉర్ రెహ్మాన్, నూర్ అహ్మద్ వంటి ప్రమాదకరమైన స్పిన్నర్లు ఉన్నారు.

సిరీస్ షెడ్యూల్

సెప్టెంబర్ 13న ఆదివారం మొదటి టీ20, సెప్టెంబర్ 15న రెండో టీ20, సెప్టెంబర్ 17న చివరిదైన మూడో టీ20 మ్యాచ్‌లు అరుణ్ జైట్లీ స్టేడియంలో రాత్రి 7 గంటలకు ప్రారంభం కానున్నాయి.