Viral News: ప్రేమికుల అత్యుత్సాహం.. బైక్‌పై యువతిని ఒళ్లో కూర్చోబెట్టుకుని విన్యాసాలు.. వీడియో వైరల్!

Viral News: అతివేగం.. దానికి తోడు అత్యుత్సాహం వెరసి ప్రాణాల మీదకు తెచ్చుకునేలా చేస్తోంది. తిరువళ్లూర్ జిల్లా పూందమల్లి సమీపంలోని మీంజూరు-వండలూరు ఔటర్ రింగ్ రోడ్డుపై ఆదివారం ఓ యువకుడు చేసిన బైక్ స్టంట్లు కలకలం రేపాయి.

రోడ్డుపై వేగంగా వెళ్తున్న బైక్‌పై తన ప్రేయసిని ఎదురుగా ఒళ్లో కూర్చోబెట్టుకుని, ప్రమాదకర రీతిలో వాహనాన్ని నడిపాడు. చుట్టుపక్కల వాహనదారులు దీన్ని గమనించి భయాందోళనలకు గురయ్యారు. కొందరు ఈ దృశ్యాలను తమ ఫోన్లలో చిత్రీకరించగా, ప్రస్తుతం ఈ వీడియో సామాజిక మాధ్యమాల్లో విపరీతంగా వైరల్ అవుతోంది.

ట్రాఫిక్ నిబంధనలను బేఖాతరు చేస్తూ, ఇతరుల ప్రాణాలను కూడా రిస్క్‌లో పడేసిన ఈ జంట తీరుపై నెటిజన్లు మండిపడుతున్నారు. ఈ ఘటనపై సమాచారం అందుకున్న పోలీసులు కేసు నమోదు చేశారు. వైరల్ వీడియో ఆధారంగా ఆ యువకుడిని గుర్తించే పనిలో పడ్డారు.