Japan Fossil Discovery : 70 ఏళ్ల చరిత్ర బోల్తా.. ‘మనిషి’ అనుకుని పూజలు చేసిన జపానీయులు.. కానీ..!

Japan Fossil Discovery : దాదాపు 70 ఏళ్లుగా జపాన్ చరిత్ర పుస్తకాల్లో, మ్యూజియంలలో అత్యంత పురాతన మానవ శిలాజంగా పూజలందుకున్న ఒక అరుదైన ఆవిష్కరణ వెనుక ఉన్న అసలు నిజం తాజాగా బయటపడింది. 1957లో తోయోహాషి సమీపంలోని ఒక సున్నపురాయి క్వారీ నుంచి సేకరించిన ఎముకల ఆధారంగా, దీనికి శాస్త్రవేత్తలు ‘ఉషికావా మ్యాన్’ (Ushikawa Man) అని పేరు పెట్టారు. జపాన్ ప్రధాన భూభాగంలో మానవ మనుగడకు ఇది తొలి సాక్ష్యమని దశాబ్దాలుగా అందరూ నమ్ముతూ వచ్చారు. కానీ, అత్యాధునిక సాంకేతికతతో జరిపిన తాజా పరిశోధనలు ఈ చరిత్రను పూర్తిగా తిరగరాశాయి. ఆ ఎముకలు అస్సలు మనుషులవి కావు అని, అవి ఒక అడవి ఎలుగుబంటికి సంబంధించినవని తేలింది.

నిజం నిరూపించిన సరికొత్త టెక్నాలజీ

టోక్యో విశ్వవిద్యాలయానికి చెందిన పరిశోధకుడు జెన్ సువా నేతృత్వంలోని బృందం 1950ల కాలంలో లేని అత్యాధునిక సీటీ (CT) స్కాన్లు, 3D మోడలింగ్ సాంకేతికతను ఉపయోగించి ఈ ఎముకలను తిరిగి పరీక్షించింది. ఈ ఎముకల నిర్మాణాన్ని మానవ, జంతు అస్థిపంజరాలతో పోల్చి చూసినప్పుడు, అప్పట్లో మనిషి చేయి అనుకున్న ఎముక భాగం వాస్తవానికి ఎలుగుబంటి ముంజేయి అని స్పష్టమైంది. అలాగే అందులోని మరో ఎముక ముక్క కూడా ఎలుగుబంటి శరీర నిర్మాణంతోనే సరిపోలింది. అప్పట్లో ఆ ఎముకలు చాలా మందంగా, బలంగా ఉండటంతో ప్రాచీన మానవుడివిగా పొరబడ్డారని, 1980ల నుంచే దీనిపై అనుమానాలు ఉన్నప్పటికీ ఇప్పటివరకు ఆ ముద్ర అలాగే ఉండిపోయిందని పరిశోధకులు వెల్లడించారు.

మారిన జపాన్ చరిత్ర.. కొత్త కాలక్రమం..

ఉషికావా మ్యాన్ మానవ రికార్డుల నుండి తొలగిపోవడంతో, ఇప్పుడు జపాన్ చరిత్రకారులు తమ దేశ కాలక్రమాన్ని (Timeline) మార్చవలసి వస్తోంది. ఇప్పటివరకు లభించిన ఆధారాల ప్రకారం.. జపాన్ ప్రధాన భూభాగంలో అత్యంత పురాతనమైన మానవ అవశేషాలు ఇప్పుడు షిజువోకాలోని 'హమాకితా' ప్రాంతంలో లభించినవే అవుతాయి. ఇవి కేవలం 14,000 నుండి 18,000 సంవత్సరాల క్రితం నాటివి మాత్రమే. అంటే, గతంలో ఉషికావా మ్యాన్ ఆధారంగా ఊహించిన కాలం కంటే జపాన్ ప్రధాన భూభాగంలో మానవ స్థావరాల ఏర్పాటు చాలా ఆలస్యంగా జరిగిందని అర్థమవుతోంది.

వలసల వెనుక ఎన్నో రహస్యాలు

జపాన్ ఆవిర్భావ కథ ఇప్పుడు మరింత సంక్లిష్టంగా మారింది. మెయిన్‌ల్యాండ్ కంటే ముందే ఒకినావాలోని 'యామాషితా-చో' గుహలలో లభించిన ఎముకలు సుమారు 32,000 సంవత్సరాల నాటివని తేలింది. దీన్ని బట్టి ప్రాచీన మానవులు తైవాన్, ఆగ్నేయాసియా ప్రాంతాల నుండి దక్షిణ వలస మార్గాల ద్వారా జపాన్‌కు చేరుకున్నట్లు నిపుణులు భావిస్తున్నారు. జపాన్ జనాభా కేవలం ఒకే ఒక వలస వల్ల ఏర్పడలేదని, వివిధ కాలాల్లో విభిన్న వలసల ద్వారా ఇక్కడికి ప్రజలు వచ్చారని స్పష్టమవుతోంది.

మూడో పూర్వీకుల సమూహం.. డీఎన్ఏ ట్విస్టులు..

ప్రముఖ పరిశోధనా సంస్థ 'రికెన్' వేలాది మంది ఆధునిక జపనీస్ జీనోమ్‌లను విశ్లేషించి ఒక సంచలన విషయాన్ని కనుగొంది. ఇప్పటివరకు జపనీయులకు ఇద్దరు పూర్వీకుల సమూహాలు (జోమోన్ వేటగాళ్లు, యాయోయి వలసదారులు) మాత్రమే ఉన్నారని భావించేవారు. కానీ, ఈ అధ్యయనంలో ఈశాన్య జపాన్‌కు చెందిన ప్రాచీన 'ఎమిషి' ప్రజలతో సంబంధం ఉన్న ఒక మూడవ పూర్వీకుల సమూహం కూడా ఉన్నట్లు బయటపడింది.

అంతేకాకుండా, ఆధునిక జపనీస్ ప్రజలలో నియాండర్తల్, డెనిసోవన్ మానవుల డీఎన్ఏ ఆనవాళ్లు కూడా లభించాయి. వేల సంవత్సరాల క్రితం ప్రాచీన మానవ సమూహాల మధ్య జరిగిన పరస్పర కలయికల వల్లే ఇది సాధ్యమైంది. సైన్స్ అభివృద్ధి చెందుతున్న కొద్దీ, పాత నమ్మకాలు తప్పుగా నిరూపితమవుతూ మానవ పరిణామ క్రమం ఎంతటి రహస్యాలతో కూడుకున్నదో ఈ పరిశోధనలు మనకు గుర్తుచేస్తున్నాయి.