Viral: ఇదేందయ్యా ఇది.! 'హలో బ్రదర్' సినిమా చూసిన ఫీల్ వస్తోంది.. నెట్టింట వైరల్..

Viral: కేరళలోని చంగనాస్సేరి మెట్రోపాలిటన్ చర్చిలో జరిగిన ఒక వివాహం ప్రస్తుతం దేశవ్యాప్తంగా వైరల్ అవుతోంది. సాధారణంగా ఏ పెళ్లిలోనైనా అందరి దృష్టి వధూవరుల అలంకరణ, ఆహారం లేదా ఇతర ఏర్పాట్లపై ఉంటుంది. అయితే ఈ పెళ్లి మాత్రం అందుకు పూర్తిగా భిన్నంగా నిలిచింది. ఇక్కడ దాదాపు ప్రతి కీలక పాత్రలోనూ కవలలు ఉండటం విశేషం. కేరళలోని వెట్టుపరంబిల్ ప్రాంతానికి చెందిన కవల సోదరులు అఖిల్ కె థామస్, నిఖిల్ కె థామస్ పతనంతిట్ట జిల్లాకు చెందిన కవల సోదరీమణులు మాగీ మేరీ, మరియా మేరీలను వివాహం చేసుకున్నారు.

ఈ వివాహ వేడుక మరింత ప్రత్యేకంగా మారడానికి ప్రధాన కారణం అక్కడ పాల్గొన్న చర్చి ఫాదర్లు కూడా కవలలు కావడమే. కవల ఫాదర్ ఆంటో పెజుమ్‌కాట్టిల్, ఫాదర్ అజో పెజుమ్‌కాట్టిల్ ఈ వివాహ తంతును అధికారికంగా నిర్వహించారు. అంతేకాకుండా ఈ వేడుకలో వేదిక వద్ద సహాయకులుగా మరో కవల బాలురు జెరాన్ జేమ్స్, జోహన్ జేమ్స్ వ్యవహరించారు. ఇలా పెళ్లిలో ప్రతి ముఖ్యమైన విభాగంలోనూ కవలలు కనిపించడం స్థానికంగాను, సామాజిక మాధ్యమాలలోనూ అందరినీ విస్మయానికి గురిచేసింది.

తమ చిన్ననాటి కలలను నిజం చేసుకునేందుకు ఈ వధూవరుల కుటుంబాలు ఎంతో శ్రమించాయి. తమ వివాహం చుట్టూ కవలలు ఉండాలని సోదరీమణులు చిన్నప్పటి నుంచి కోరుకున్నారని, ఇందుకోసం ప్రత్యేకంగా కవల పూజారులను వెతికి మరీ ఆహ్వానించామని కుటుంబ సభ్యులు తెలిపారు. కాగా, వరులిద్దరూ మర్చంట్ నేవీలో ఉద్యోగాలు చేస్తుండగా, వధువులు ఐటీ రంగంలో పనిచేస్తున్నారు. ఈ అరుదైన పెళ్లికి సంబంధించిన ఫొటోలు, వీడియోలు నెట్టింట వైరల్ కావడంతో నెటిజన్లు సరదాగా స్పందిస్తున్నారు. భగవంతుడు వివాహాలను ఎంతో వినూత్నంగా ప్రచారం చేస్తాడంటూ రకరకాల కామెంట్లు పెడుతూ ఈ అరుదైన జంటలను అభినందిస్తున్నారు.