Success Story: కుక్కలను వాకింగ్‌కు తీసుకెళ్తే నెలకు రూ. 5 లక్షలా?.. ఈ టెక్కీ మార్కెటింగ్ సీక్రెట్ తెలిస్తే షాకవుతారు!

Success Story: ఇప్పుడున్న రోజుల్లో సాఫ్ట్‌వేర్ ఉద్యోగం (Tech Job) చేస్తూ ఖాళీ సమయంలో 'సైడ్ హజిల్' (Side Hustle - పార్ట్ టైం పని) ద్వారా అదనపు ఆదాయం సంపాదించడం ఐటీ ఉద్యోగులకు అలవాటే. కానీ, న్యూయార్క్‌కు చెందిన ఓ టెక్కీ మాత్రం తనకున్న ఒక చిన్న అభిరుచినే అద్భుతమైన వ్యాపారంగా మార్చుకున్నాడు. పెంపుడు జంతువుల సంరక్షణను ఒక లగ్జరీ బిజినెస్‌గా మార్చి, కేవలం పార్ట్ టైం ద్వారానే నెలకు లక్షల రూపాయలు ఆర్జిస్తూ ఎందరికో స్ఫూర్తిగా నిలుస్తున్నాడు.

న్యూయార్క్ నగరంలో నివసిస్తున్న 28 ఏళ్ల కోబీ గుడ్‌హార్ట్ (Kobi Goodhart) ఓ ప్రముఖ టెక్ కంపెనీలో ఇంజినీర్‌గా పనిచేస్తున్నాడు. అతనికి చిన్నప్పటి నుంచి పెంపుడు జంతువులంటే, ముఖ్యంగా కుక్కలంటే ఎనలేని ప్రేమ. ఈ ఇష్టాన్నే ఆదాయ వనరుగా మార్చుకోవాలని భావించిన కోబీ.. 2025లో ‘గుడ్‌హార్ట్ డాగ్ కో’ (Goodhart Dog Co) పేరుతో ఓ స్టార్టప్‌ను ప్రారంభించాడు. తన ఫుల్‌టైమ్ సాఫ్ట్‌వేర్ ఉద్యోగానికి ఎలాంటి ఆటంకం కలగకుండా, పెంపుడు కుక్కలకు ప్రీమియం సంరక్షణ సేవలను (Premium Dog Care) అందించడం మొదలుపెట్టాడు. అనతికాలంలోనే అతని ఐడియా క్లిక్ అయి, వ్యాపారం ఊపందుకుంది. ప్రస్తుతం ఈ సైడ్ హజిల్ ద్వారా అతను నెలకు 6,000 డాలర్లకు పైగా (సుమారు రూ.5.72 లక్షలు) సంపాదిస్తున్నాడు.

ప్రముఖ అంతర్జాతీయ పీపుల్ మ్యాగజైన్‌తో కోబీ గుడ్‌హార్ట్ తన సక్సెస్ సీక్రెట్‌ను పంచుకున్నాడు. తన ఐటీ ఉద్యోగ సమయాలకు అనుగుణంగానే ఈ 'డాగ్ వాకింగ్' షెడ్యూల్ రూపొందించుకున్నట్లు తెలిపాడు.

"నేను ఉదయం ఆఫీస్‌కు వెళ్లే ముందు, లంచ్ బ్రేక్‌లో, సాయంత్రం ఆఫీస్ అయిపోయాక, అలాగే వీకెండ్స్‌లో కుక్కలను వాకింగ్‌కు తీసుకెళ్తాను. నేను ఆఫీస్ వర్క్‌లో బిజీగా ఉన్నప్పుడు కుక్కల సంరక్షణ చూసుకోవడానికి మరో మహిళా వాకర్‌ను కూడా పార్ట్ టైమ్‌గా నియమించుకున్నా. భవిష్యత్తులో ఈ వ్యాపారాన్ని మరింతగా విస్తరించి, దీన్నే నా పూర్తిస్థాయి వృత్తిగా మార్చుకోవాలన్నదే నా గోల్" అని గుడ్‌హార్ట్ ధీమా వ్యక్తం చేశాడు.

ప్రస్తుతం గుడ్‌హార్ట్, అతని సహాయకురాలు కలిసి రోజుకు 10 నుంచి 20 కుక్కలను వాకింగ్‌కు తీసుకెళ్తున్నారు. ఎక్కడా పెద్దగా యాడ్స్ ఇవ్వకుండా కేవలం 'వర్డ్ ఆఫ్ మౌత్' (ఒకరి ద్వారా మరొకరికి తెలియడం), సోషల్ మీడియా ప్రచారం ద్వారానే తన క్లయింట్ల సంఖ్య పెరిగిందని అతను చెప్పాడు. "ఒక చిన్న ఏరియాలో మనం బెస్ట్ సర్వీస్ ఇస్తే, దాని గురించి కస్టమర్లే మాట్లాడుకుంటారు. అంతేకాకుండా వాకింగ్‌కు వెళ్లినప్పుడు పెద్ద పెద్ద అపార్ట్‌మెంట్లలోని బిల్డింగ్ డోర్‌మెన్‌లకు నా బిజినెస్ కార్డులు ఇస్తుంటాను. ఎందుకంటే వారికి బిల్డింగ్‌లోని అందరితో పరిచయాలు ఉంటాయి" అని తన స్మార్ట్ మార్కెటింగ్ ట్రిక్‌ను వెల్లడించాడు.

న్యూయార్క్ లాంటి మెట్రో నగరాల్లో ప్రజలు తీవ్రమైన పని ఒత్తిడితో చాలా బిజీగా ఉంటారని, అలాంటి వారు తమ పెంపుడు జంతువుల సంరక్షణ బాధ్యతను నమ్మకమైన వారికి అప్పగించడానికి ఎంతైనా ఖర్చు పెడతారని గుడ్‌హార్ట్ పేర్కొన్నాడు. తనది ఒక లగ్జరీ సర్వీస్ అని, అందుకే కుక్క సైజు, దాని ప్రవర్తన, లొకేషన్ వంటి అంశాలను బట్టి చార్జీలు ఉంటాయని స్పష్టం చేశాడు. కష్టపడే తత్వంతో పాటు కాస్త క్రియేటివిటీ ఉంటే మన అభిరుచితోనే లక్షలు సంపాదించవచ్చని ఈ టెక్కీ నిరూపిస్తున్నాడు.