Guinness World Record : 8 అడుగుల జుట్టు.. గిన్నిస్‌లో భారత మహిళ.!

Guinness World Record : సంవత్సరాల తరబడి ఓపికగా, క్రమం తప్పకుండా చేసిన కృషి ఒక మహిళను ప్రపంచ రికార్డు వేదికపై నిలబెట్టింది. ఉత్తరాఖండ్‌కు చెందిన ఒక మహిళ తన లాంగ్ హెయిర్‌తో ఏకంగా గిన్నిస్ వరల్డ్ రికార్డ్స్ పుటల్లోకి ఎక్కింది. ఆమె జుట్టు పొడవు ఏకంగా 271.50 సెంటీమీటర్లు (8 అడుగుల 10 అంగుళాలు) ఉండటం విశేషం. భారత్‌లోని ఉత్తరాఖండ్ రాష్ట్రం హల్ద్వానీకి చెందిన రేణు ధరియాల్ అనే మహిళ, ప్రస్తుతం జీవించి ఉన్న మహిళల్లో అత్యంత పొడవైన జుట్టు కలిగిన వ్యక్తిగా గిన్నిస్ వరల్డ్ రికార్డ్స్ ద్వారా అధికారిక గుర్తింపు పొందారు. ఆమె జుట్టును గత ఏప్రిల్‌లో హల్ద్వానీలో కొలిచి, అధికారికంగా రికార్డును ధ్రువీకరించారు. రేణు ధరియాల్ జుట్టు పొడవు, ప్రపంచంలోనే అత్యంత పొడవైన వ్యక్తిగా రికార్డుకెక్కిన రాబర్ట్ వాడ్లో ఎత్తు (272 సెంటీమీటర్లు) కంటే కేవలం ఒక్క సెంటీమీటర్ మాత్రమే తక్కువగా ఉండటం గమనార్హం.

2015 నుంచి ఒక్కసారి కూడా కత్తిరించలేదు

రేణు ధరియాల్ 2015 నుంచి ఇప్పటివరకు ఒక్కసారి కూడా తన జుట్టును కత్తిరించలేదు. భారతీయ సంస్కృతి, సంప్రదాయాలలో పొడవైన జుట్టును అందానికి ప్రతీకగా భావిస్తారని, ఆ సాంప్రదాయ ప్రభావంతోనే జుట్టును పెంచడం ప్రారంభించినట్లు రేణు తెలిపారు. కాలక్రమేణా ఆమె జుట్టు ఎంతగా పెరిగిందంటే, నడుస్తున్నప్పుడు వెనుక నేలను తాకుతూ సాగిపోయేది. సాధారణంగా ఇంత పొడవున్న జుట్టు పలుచగా మారే అవకాశం ఉంటుంది, కానీ రేణు జుట్టు మాత్రం ఎంతో దట్టంగా, మెరుస్తూ ఉండటం విశేషం. బయటకు వెళ్లినప్పుడు తన జుట్టును నియంత్రణలో ఉంచుకోవడానికి ఆమె ఎంతో శ్రమతో పెద్ద జడను వేసుకునేవారు.

ఉక్రెయిన్ భామ రికార్డు బ్రేక్

ఈ ఘనత సాధించడం ద్వారా రేణు ధరియాల్, అంతకుముందు వరకు ఈ రికార్డును తన పేరిట ఉంచుకున్న ఉక్రెయిన్ రికార్డు హోల్డర్ అలియా నాసిరోవా రికార్డును తిరగరాశారు. గతంలో అలియా నాసిరోవా జుట్టు 257.33 సెంటీమీటర్లు (8 అడుగుల 5.3 అంగుళాలు) ఉండేది. రేణు తన 271.50 సెంటీమీటర్ల పొడవైన జుట్టుతో ఆ రికార్డును 14 సెంటీమీటర్ల కంటే ఎక్కువ తేడాతో అధిగమించారు.

రసాయనాలు లేకుండా ఇంట్లోనే సహజ సంరక్షణ

ఇంత పొడవైన జుట్టును కేవలం పెంచడమే కాకుండా, దాన్ని ఆరోగ్యంగా కాపాడుకోవడం వెనుక ఎంతో ఓపిక, శ్రమ ఉన్నాయి. జుట్టును శుభ్రం చేసుకోవడానికి, చిక్కులు తీసుకోవడానికి గంటల సమయం కేటాయించేదాన్ని అని రేణు తెలిపారు. మార్కెట్‌లో దొరికే రసాయన ఉత్పత్తులకు దూరంగా ఉంటూ, కేవలం ఇంట్లోనే స్వయంగా తయారు చేసుకున్న సహజ సిద్ధమైన నూనెలు, షాంపూలను మాత్రమే వాడినట్లు ఆమె వెల్లడించారు. ఈ చిట్కాలను ఆమె తన యూట్యూబ్ ఛానెల్ ద్వారా నెటిజన్లతో పంచుకుంటున్నారు.

దేశానికి గుర్తింపు తీసుకురావాలనే ఆశయం

ఈ రికార్డు కేవలం ఒక శారీరక ఘనత మాత్రమే కాదని రేణు అభిప్రాయపడ్డారు. తన సాధన ద్వారా తన ప్రాంతానికి, మాతృదేశమైన భారత్‌కు మంచి గుర్తింపు తీసుకురావాలని ఆశిస్తున్నట్లు తెలిపారు. ప్రతీ ఒక్కరూ తమ సంస్కృతిని, సహజ సిద్ధమైన అందాన్ని ప్రేమిస్తూ, ఏ పనిలోనైనా క్రమశిక్షణతో ముందుకు సాగాలని ఆమె పిలుపునిచ్చారు. 9 అడుగుల వరకు విస్తరించిన తన జుట్టుతో దశాబ్ద కాలపు కృషిని రేణు ప్రపంచ రికార్డుగా మార్చుకున్నారు.

Renu Dhariyal (India) has the longest hair in the world! 🩷

She has claimed the record for longest hair on a living person (female).

Her stunning raven tresses measure an unbelievable 271.50 cm (8 ft 10 in) long. pic.twitter.com/N8FeWdUGP0

— Guinness World Records (@GWR) August 7, 2026