Viral Video : సీఎంకు పూల బుట్టతో స్వాగతం.. పోలీస్ డాగ్ 'రాకీ' వీడియో వైరల్!
Viral Video : చెన్నైలో జరిగిన ఒక అధికారిక పతకాల ప్రదానోత్సవ వేడుకలో ఒక పోలీస్ స్నిఫ్ఫర్ డాగ్ ప్రత్యేక ఆకర్షణగా నిలిచి అందరి దృష్టినీ ఆకట్టుకుంది.
Police Sniffer Dog
Viral Video : చెన్నైలో జరిగిన ఒక అధికారిక పతకాల ప్రదానోత్సవ వేడుకలో ఒక పోలీస్ స్నిఫ్ఫర్ డాగ్ ప్రత్యేక ఆకర్షణగా నిలిచి అందరి దృష్టినీ ఆకట్టుకుంది. తమిళనాడు ముఖ్యమంత్రి సీ. జోసెఫ్ విజయ్కు తన నోటితో పూల బుట్టను పట్టుకుని వచ్చి వినూత్నంగా శుభాకాంక్షలు తెలపడంతో, అక్కడ ఉన్న ఆహూతులందరూ సంతోషంతో చప్పట్లు కొడుతూ కేరింతలు కొట్టారు. ప్రస్తుతం ఈ సన్నివేశానికి సంబంధించిన దృశ్యాలు సోషల్ మీడియాలో తెగ వైరల్ అవుతున్నాయి.
సీఎం విజయ్కు గౌరవ వందనం.. 'రాకీ' స్పెషల్ ఎంట్రీ
2023 నుండి 2025 సంవత్సరాలకు గాను కేంద్ర ప్రభుత్వం , తమిళనాడు రాష్ట్ర ప్రభుత్వం ప్రకటించిన విశిష్ట పోలీస్ పతకాలను అందుకున్న సిబ్బందికి పురస్కారాలు అందించేందుకు ఈ ప్రత్యేక వేడుకను ఏర్పాటు చేశారు. ఈ కార్యక్రమానికి ముఖ్య అతిథిగా హాజరైన ముఖ్యమంత్రి సీ. జోసెఫ్ విజయ్కు తమిళనాడు పోలీసు బలగాలు గౌరవ వందనం (గార్డ్ ఆఫ్ ఆనర్) సమర్పించాయి.
అనంతరం వేదికపైకి 'రాకీ' అనే పోలీస్ స్నిఫ్ఫర్ డాగ్ ఎంటర్ అయింది. సెక్యూరిటీ సిబ్బంది తోడుగా రాగా, రాకీ తన నోటితో అత్యంత జాగ్రత్తగా ఒక పూల బుట్టను పట్టుకుని స్టేజ్ వైపు తడబడకుండా.. నడుచుకుంటూ వచ్చింది. వేదికపై ఉన్న ముఖ్యమంత్రి విజయ్ ముందరకు వచ్చి, ఎంతో క్రమశిక్షణతో తలవంచి శుభాకాంక్షలు తెలిపింది.
రాకీకి సీఎం సెల్యూట్.. హాలులో హర్షధ్వానాలు
స్నిఫ్ఫర్ డాగ్ రాకీ చూపించిన క్రమశిక్షణ, ప్రేమకు సీఎం విజయ్ ఎంతో మురిసిపోయారు. వెంటనే ఆయన చిరునవ్వు చిందిస్తూ రాకీకి ప్రతిగా సెల్యూట్ చేశారు. ముఖ్యమంత్రి , శునకం మధ్య జరిగిన ఈ ముచ్చటైన సంభాషణ అక్కడి వారిని ఎంతగానో అలరించింది. ఈ దృశ్యాన్ని చూసి హాలులోని అధికారులు, ప్రేక్షకులు చప్పట్లతో సభా ప్రాంగణాన్ని హోరెత్తించారు. ఈ వేడుకలోనే అత్యంత ప్రత్యేకమైన, ఆకట్టుకునే ఘట్టంగా ఇది నిలిచింది.
665 మందికి పురస్కారాలు.. పండగ వాతావరణం
ఈ వేడుకలో పోలీస్ శాఖలో అత్యుత్తమ సేవలందించిన మొత్తం 665 మంది పోలీస్ సిబ్బందికి కేంద్ర, రాష్ట్ర ప్రభుత్వాల పతకాలను ముఖ్యమంత్రి విజయ్ స్వయంగా అందజేసి అభినందించారు. ఈ అధికారిక కార్యక్రమానికి మరింత శోభ చేకూరుస్తూ, విజయ్ నటించిన బ్లాక్బస్టర్ సినిమాల్లోని ప్రసిద్ధ పాటలతో సాంస్కృతిక ప్రదర్శనలు నిర్వహించారు. దీంతో వేదిక ప్రాంగణమంతా ఒక పండగ వాతావరణాన్ని సంతరించుకుంది.
ఇటీవలే సీఎం విజయ్ ముందస్తు సమాచారం లేకుండా సాధారణ ప్రయాణికుడిలా చెన్నై మెట్రో రైలులో ప్రయాణించి అందరినీ ఆశ్చర్యపరిచిన సంగతి తెలిసిందే. ఆ సమయంలో ఆయనను చూసేందుకు స్టేషన్ కారిడార్లు, ప్లాట్ఫారమ్లు ప్రయాణికులతో నిండిపోయాయి. ఆ ఘటన తాలూకు వార్తలు ఆరకముందే, ఇప్పుడు పోలీస్ స్నిఫ్ఫర్ డాగ్ రాకీతో సీఎం విజయ్ పంచుకున్న ఈ మధురమైన సన్నివేశం సోషల్ మీడియాలో వైరల్ అవుతూ నెటిజన్ల మనసులను గెలుచుకుంటోంది.
G Krishna
అక్షరంతో మొదలైన ప్రయాణం.. అంకెల్లో చెప్పాలంటే పదేళ్ల అనుభవం..! 2015లో కెరీర్ స్టార్ట్ చేసి, ప్రింట్ మీడియా నుంచి డిజిటల్ విప్లవం వరకు అన్నిటినీ దగ్గరగా చూశాను. అంతర్జాతీయ పరిణామాల నుంచి దేశ రాజధాని రాజకీయాల వరకు, గల్లీ స్థాయి వార్తల నుంచి ఢిల్లీ స్థాయి విశ్లేషణల వరకు ప్రతి అంశాన్ని లోతుగా అధ్యయనం చేస్తూ కథనాలు అందించాను. టెక్నాలజీ స్పీడ్, బిజినెస్ లెక్కలైనా, ఆస్ట్రాలజీ విశ్లేషణ ఏదైనా.. నా నుంచి వచ్చే ప్రతి కథనం ప్రతి వార్త పాఠకుడికి ఇన్ఫర్మేషన్తో పాటు ఇంట్రెస్ట్ను కూడా అందిస్తుంది.