పండగ లేదు.. పబ్బం లేదు.. అయినా తీసేశారు.. ఉద్యోగి భార్య హృదయవిదారక పోస్ట్!

Oracle Employee Fired: కార్పొరేట్ రంగంలో వర్క్-లైఫ్ బ్యాలెన్స్ అనేది కేవలం కాగితాలకే పరిమితమైన ఒక అందమైన మాటగా మారుతోంది. కంపెనీని కుటుంబంగా భావించి, రాత్రింబవళ్లు శ్రమించే ఉద్యోగులకు చివరికి ఎదురవుతున్న నిజాలు ఎంతటి వారినైనా కలిచివేస్తాయి.

గ్లోబల్ టెక్ దిగ్గజం ఒరాకిల్ సంస్థలో 12 ఏళ్లుగా అంకితభావంతో పనిచేసిన సౌరభ్ అనే ఉద్యోగి ఉదంతం ఇప్పుడు టెక్ ప్రపంచంలో తీవ్ర చర్చనీయాంశమైంది. ఆయన భార్య సోషల్ మీడియా వేదికగా పంచుకున్న ఆవేదన ప్రతి కార్పొరేట్ ఉద్యోగి గుండెను తాకేలా ఉంది.

ఒక ఉద్యోగి తన సంస్థ కోసం ఎంతవరకు తెగిస్తాడు అనడానికి సౌరభ్ ప్రయాణం ఒక నిలువెత్తు నిదర్శనం. భార్య ఆసుపత్రిలో సర్జరీ కోసం ఉంటే, అక్కడి నుంచే లాప్‌టాప్ పట్టుకుని ఆఫీస్ పని చేశాడు. కుటుంబంతో కలిసి న్యూ మెక్సికో వెకేషన్‌కు వెళ్లినప్పుడు కూడా కారులో ప్రయాణిస్తూ క్లయింట్ కాల్స్ అటెండ్ చేశాడు.

హోలీ, దీపావళి, పుట్టినరోజులు, పెళ్లి రోజులు అనే తేడా లేకుండా ప్రతి పండగను ఆఫీస్ డెస్క్ ముందే గడిపాడు. అర్ధరాత్రి 3 గంటల వరకు పని చేస్తూ, తన పెంపుడు కుక్క ఆలనాపాలనా చూసుకున్న ఆ తపన... చివరికి ఆయన ఆరోగ్యాన్నే దెబ్బతీసింది. ఇన్ని చేసినా, ఒక రోజు ఉదయం సిస్టమ్ లాగిన్ కాకపోవడంతో తాను రోడ్డున పడ్డానన్న నిజం ఆయనకు తెలిసింది.

కంపెనీల దృష్టిలో ఉద్యోగులు మనుషులు కాదనే కఠిన సత్యాన్ని ఈ ఘటన మరోసారి రుజువు చేసిందని నెటిజన్లు మండిపడుతున్నారు. కంపెనీల కోసం వ్యక్తిగత జీవితాన్ని త్యాగం చేస్తే చివరికి దక్కేది నిరుద్యోగమేనని ఈ ఉదంతం హెచ్చరిస్తోంది.

దశాబ్దానికి పైగా సేవలు అందించిన ఉద్యోగిని కనీసం ముఖం చూసి చెప్పకుండా, కేవలం సిస్టమ్ యాక్సెస్ తీసేసి తొలగించే పద్ధతిపై తీవ్ర వ్యతిరేకత వ్యక్తమవుతోంది. మీకు ఏదైనా ఉద్యోగ అవకాశం ఉంటే చెప్పండి. నా భర్త ఒక అద్భుతమైన సహచరుడే కాకుండా, టీమ్‌లో నమ్మకమైన మిత్రుడు అంటూ సౌరభ్ భార్య చేసిన అభ్యర్థన అందరినీ కదిలిస్తోంది.