PGannavaram: పి.గన్నవరంలో అబ్దుల్ కలాం వర్ధంతి.. ఎమ్మెల్యే నివాళులు

పి.గన్నవరం: డాక్టర్ బి.ఆర్. అంబేద్కర్ కోనసీమ జిల్లా, పి. గన్నవరం ప్రభుత్వ వైద్యశాలలో భారతరత్న, మాజీ రాష్ట్రపతి, ప్రముఖ శాస్త్రవేత్త, "మిస్సైల్ మ్యాన్ ఆఫ్ ఇండియా" డాక్టర్ ఏపీజే అబ్దుల్ కలాం వర్ధంతి సందర్భంగా పి. గన్నవరం నియోజకవర్గ ఎమ్మెల్యే గిడ్డి సత్యనారాయణ విగ్రహానికి పూలమాల సమర్పించి ఘనంగా నివాళులర్పించారు.

ఈ సందర్భంగా డాక్టర్ ఏపీజే అబ్దుల్ కలాం చారిటబుల్ ట్రస్ట్ ఆధ్వర్యంలో పి. గన్నవరం ప్రభుత్వ వైద్యశాలకు రూ.2.80 లక్షల విలువైన ఆపరేషన్ థియేటర్‌కు అవసరమైన ఆధునిక వైద్య పరికరాలను అందజేశారు. ఎమ్మెల్యే గిడ్డి సత్యనారాయణ ఆ పరికరాలను ఆసుపత్రి సూపరింటెండెంట్‌కు అధికారికంగా అందజేశారు. ఈ సందర్భంగా ట్రస్ట్ సభ్యులను అభినందిస్తూ, ఈ పరికరాల ద్వారా ప్రభుత్వ వైద్యశాలలో మరింత నాణ్యమైన వైద్య సేవలు అందించేందుకు దోహదపడతాయని తెలిపారు.

అనంతరం ఎమ్మెల్యే మాట్లాడుతూ, సాధారణ కుటుంబంలో జన్మించిన డాక్టర్ అబ్దుల్ కలాం తమ కృషి, క్రమశిక్షణ, పట్టుదలతో దేశ అత్యున్నత పదవిని అధిరోహించి కోట్లాది భారతీయులకు స్ఫూర్తిగా నిలిచారని అన్నారు. భారత రక్షణ రంగాన్ని బలోపేతం చేయడంలో, అగ్ని, పృథ్వి వంటి క్షిపణుల అభివృద్ధిలో, పోఖ్రాన్ అణు పరీక్షల విజయవంతమైన నిర్వహణలో ఆయన చేసిన సేవలు చిరస్మరణీయమని కొనియాడారు.

రాష్ట్రపతిగా ఉన్నప్పటికీ విద్యార్థులు, యువతతో మమేకమై వారిలో ఆత్మవిశ్వాసాన్ని నింపిన గొప్ప వ్యక్తిగా డాక్టర్ కలాం నిలిచారని పేర్కొన్నారు. "కలలు కనండి... కానీ నిద్రలో కనిపించే కలలు కాదు, మిమ్మల్ని నిద్రపోనివ్వని కలలు కనండి" అనే ఆయన సందేశం నేటి యువతకు మార్గదర్శకమని అన్నారు.

డాక్టర్ కలాం వర్ధంతిని కేవలం నివాళులర్పించే కార్యక్రమంగా కాకుండా, ఆయన ఆశయాలను ఆచరణలో పెట్టే సంకల్ప దినంగా భావించాలని ఎమ్మెల్యే పిలుపునిచ్చారు. ప్రతి విద్యార్థి విద్యలో రాణించాలని, ప్రతి యువకుడు దేశాభివృద్ధిలో భాగస్వామి కావాలని, నిజాయితీ, క్రమశిక్షణ, దేశభక్తి వంటి విలువలను జీవితంలో అలవర్చుకోవాలని సూచించారు.

ముఖ్యమంత్రి నారా చంద్రబాబు నాయుడు నాయకత్వంలో, ఉప ముఖ్యమంత్రి కొణిదెల పవన్ కళ్యాణ్ మార్గదర్శకత్వంలో రాష్ట్ర ప్రభుత్వం యువతకు నాణ్యమైన విద్య, నైపుణ్యాభివృద్ధి, ఉపాధి అవకాశాలు కల్పించేందుకు అనేక కార్యక్రమాలను అమలు చేస్తోందని తెలిపారు. డాక్టర్ కలాం కలలు కన్న అభివృద్ధి చెందిన భారత నిర్మాణంలో యువత కీలక పాత్ర పోషించాలని ఆకాంక్షించారు.

ఈ కార్యక్రమంలో వైద్యులు, వైద్య సిబ్బంది, ప్రజాప్రతినిధులు, వివిధ శాఖల అధికారులు, కూటమి నాయకులు, జనసైనికులు, తెలుగుదేశం పార్టీ నాయకులు, కార్యకర్తలు, విద్యార్థులు మరియు ప్రజలు పాల్గొని డాక్టర్ ఏపీజే అబ్దుల్ కలాంకు ఘన నివాళులు అర్పించారు.