P.Gannavaram: నియోజకవర్గంలో ఘనంగా మెగాస్టార్ చిరంజీవి జన్మదిన వేడుకలు!

P.Gannavaram: డాక్టర్ బి.ఆర్. అంబేద్కర్ కోనసీమ జిల్లా, పి.గన్నవరం నియోజకవర్గంలో మెగాస్టార్ కొణిదెల చిరంజీవి 71వ జన్మదిన వేడుకలను అభిమానులు, మెగా యూత్ సభ్యులు ఘనంగా నిర్వహించారు.

పి.గన్నవరం నియోజకవర్గ ఎమ్మెల్యే గిడ్డి సత్యనారాయణ క్యాంపు కార్యాలయంలో ఏర్పాటు చేసిన జన్మదిన వేడుకల్లో ఎమ్మెల్యే గిడ్డి సత్యనారాయణ ముఖ్య అతిథిగా పాల్గొని కేక్ కట్ చేశారు. ఈ సందర్భంగా మెగాస్టార్ చిరంజీవికి హృదయపూర్వక జన్మదిన శుభాకాంక్షలు తెలిపారు.

అనంతరం పోతవరం గ్రామంలో అభిమానుల ఆధ్వర్యంలో ఏర్పాటు చేసిన మెగా రక్తదాన శిబిరంలో ఎమ్మెల్యే పాల్గొన్నారు. రక్తదానం చేస్తున్న యువతను అభినందించి, సేవా కార్యక్రమాల ద్వారా చిరంజీవి జన్మదిన వేడుకలను నిర్వహించడం అభినందనీయమని అన్నారు. అనంతరం అక్కడ కూడా కేక్ కట్ చేసి వేడుకల్లో పాల్గొన్నారు.

అదేవిధంగా సాకలిపాలెం సెంటర్‌లో మెగా యూత్ ఫోర్స్ రాష్ట్ర కో-కన్వీనర్ కందాల చంటి ఆధ్వర్యంలో మెగాస్టార్ చిరంజీవి జన్మదిన వేడుకలను ఘనంగా నిర్వహించారు. ఈ సందర్భంగా కేక్ కట్ చేసి అభిమానులు, యువతతో కలిసి సంబరాలు జరుపుకున్నారు.

ఈ సందర్భంగా ఎమ్మెల్యే గిడ్డి సత్యనారాయణ మాట్లాడుతూ, మెగాస్టార్ చిరంజీవి గారు తన ప్రతిభ, కష్టం, క్రమశిక్షణ, పట్టుదలతో తెలుగు సినీ పరిశ్రమలో ప్రత్యేక స్థానం సంపాదించుకున్నారని అన్నారు. ఆయన కేవలం ఒక నటుడిగా మాత్రమే కాకుండా సేవాభావంతో సమాజానికి స్ఫూర్తిగా నిలిచారని పేర్కొన్నారు.

చిరంజీవి అభిమానులు రక్తదానం, నేత్రదానం, వైద్య శిబిరాలు, పేదలకు సహాయం వంటి సేవా కార్యక్రమాలు నిర్వహిస్తూ ఆయన సేవా స్ఫూర్తిని కొనసాగిస్తున్నారని ఎమ్మెల్యే తెలిపారు. అభిమానమంటే కేవలం సంబరాలు చేసుకోవడం మాత్రమే కాదని, సమాజానికి ఉపయోగపడే సేవా కార్యక్రమాలు చేయడమే నిజమైన అభిమానానికి అర్థమని అన్నారు.

చిరంజీవి గారి జీవితం యువతకు ఎంతో స్ఫూర్తిదాయకమని, లక్ష్యాన్ని నిర్దేశించుకుని క్రమశిక్షణతో నిరంతరం కష్టపడితే విజయం సాధించవచ్చని ఎమ్మెల్యే పేర్కొన్నారు.

మెగాస్టార్ కొణిదెల చిరంజీవి సంపూర్ణ ఆరోగ్యం, ఆనందంతో నిండు నూరేళ్లు జీవించాలని, మరెన్నో మంచి చిత్రాలతో ప్రేక్షకులను అలరించాలని, ఆయన సేవా స్ఫూర్తి తరతరాలకు ఆదర్శంగా నిలవాలని ఎమ్మెల్యే గిడ్డి సత్యనారాయణ ఆకాంక్షించారు.