Rajole: రాజోలులో నిర్వహించిన న్యాయ అవగాహన సదస్సు, లోక్ అదాలత్!

Rajole: రాజీ మార్గంలో సమస్యలు, దావాలు, కేసులను పరిష్కరించుకోవడం ద్వారా ఇరు పక్షాలకు మేలు జరుగుతుందని రాజోలు సీనియర్ సివిల్ జడ్జి, లోక్ అదాలత్ చైర్మన్ రత్న ప్రసాద్ అన్నారు. శనివారం ఆయన ఆధ్వర్యంలో రాజోలులో న్యాయ అవగాహన సదస్సు నిర్వహించారు.

ఈ సందర్భంగా జడ్జి రత్న ప్రసాద్ మాట్లాడుతూ.. లోక్ అదాలత్ ద్వారా కేసులను పరిష్కరించుకున్నప్పుడు ఏ ఒక్క పక్షం ఓడిపోయినట్లు, మరొక పక్షం గెలిచినట్లు భావించాల్సిన అవసరం లేదని, ఇరువర్గాలు గెలిచినట్లుగా భావించవచ్చని తెలిపారు. పరస్పర అంగీకారంతో కేసులను పరిష్కరించుకోవడం ద్వారా సమయం, ధనం ఆదా కావడంతో పాటు ఇరు పక్షాల మధ్య సుహృద్భావ వాతావరణం నెలకొంటుందని వివరించారు.

జాతీయ న్యాయ సేవా అధికార సంస్థ ఆధ్వర్యంలో దేశవ్యాప్తంగా అన్ని న్యాయస్థానాల్లో లోక్ అదాలత్‌లు నిర్వహిస్తున్నట్లు తెలిపారు. రాజీ పడదగ్గ కేసులను ఇరు పక్షాలు పరస్పర అంగీకారంతో లోక్ అదాలత్‌లో పరిష్కరించుకోవచ్చని సూచించారు. దీని ద్వారా దీర్ఘకాలంగా కొనసాగుతున్న వివాదాలకు సత్వర పరిష్కారం లభించడంతో పాటు కక్షిదారులకు న్యాయపరమైన ఉపశమనం కలుగుతుందని పేర్కొన్నారు.

అనంతరం నిర్వహించిన లోక్ అదాలత్‌లో పలు కేసులను పరిష్కరించారు. కేసుల్లో ఉన్న కక్షిదారులు పరస్పర అంగీకారంతో రాజీకి వచ్చి తమ కేసులను పరిష్కరించుకున్నారు. అనంతరం ఇరుపక్షాలు సుహృద్భావ వాతావరణంలో ముందుకు సాగేందుకు అంగీకరించారు.

ఈ కార్యక్రమంలో జూనియర్ సివిల్ జడ్జి కె. హిమబిందు, అడిషనల్ పబ్లిక్ ప్రాసిక్యూటర్ ఆచంట శ్రీనివాస్, న్యాయవాదులు నీతిపూడి సత్యనారాయణ, జె.హెచ్. సాగర్ తదితరులు పాల్గొన్నారు.