Rajahmundry: రాష్ట్రంలో చంద్రబాబు నియంత పాలన సాగుతోంది..జక్కంపూడి రాజా!

Rajahmundry: రాష్ట్రంలో చంద్రబాబు నియంత మాదిరిగా పాలన సాగిస్తున్నారని వైఎస్సార్ కాంగ్రెస్ పార్టీ యువజన విభాగం రాష్ట్ర అధ్యక్షుడు, మాజీ ఎమ్మెల్యే జక్కంపూడి రాజా ఆరోపించారు. రాజమహేంద్రవరం ప్రెస్ క్లబ్‌లో మంగళవారం నిర్వహించిన మీడియా సమావేశంలో ఆయన మాట్లాడారు.

గడిచిన రెండేళ్లలో రాష్ట్రంలో ఎక్కడ చూసినా దాడులు, హింసాత్మక ఘటనలే కనిపిస్తున్నాయని రాజా ఆరోపించారు. సంక్షేమాన్ని ప్రభుత్వం గాలికొదిలేసిందని, ఎన్నికల ముందు ఇచ్చిన హామీలను విస్మరించిందని విమర్శించారు. పోలీసు వ్యవస్థను తన చేతుల్లో పెట్టుకుని ప్రభుత్వం నియంతృత్వ పాలన సాగిస్తోందన్నారు.

ప్రభుత్వాన్ని ప్రశ్నిస్తున్న సోషల్ మీడియా కార్యకర్తలపై పెద్ద సంఖ్యలో కేసులు నమోదు చేస్తున్నారని, సీనియర్ జర్నలిస్టులపై సంబంధం లేని కేసులు పెట్టి భయభ్రాంతులకు గురిచేస్తున్నారని ఆరోపించారు. జర్నలిస్టులపై దేశద్రోహం వంటి కేసులు పెట్టి లొంగదీసుకునే ప్రయత్నం జరుగుతోందని అన్నారు.

ఉద్యోగాలు వస్తాయనే నమ్మకంతో కూటమి ప్రభుత్వానికి ఓటు వేసిన నిరుద్యోగ యువతను కూడా ప్రభుత్వం పట్టించుకోవడం లేదని విమర్శించారు. ప్రభుత్వాన్ని ప్రశ్నించిన వారిపై కేసులు పెట్టి జైలుకు పంపడమే విధానంగా మారిందన్నారు.

ప్రశ్నించే వారిపై నిఘా ఎందుకు?

ప్రభుత్వ తప్పులను ప్రశ్నించేందుకు ముందుకొస్తున్న వారిపై నిఘా పెట్టేందుకు ప్రయత్నాలు జరుగుతున్నాయని రాజా ఆరోపించారు. వాట్సాప్ గ్రూపులు, ఫేస్‌బుక్, ఇన్‌స్టాగ్రామ్, యూట్యూబ్‌లో చురుగ్గా ఉండే వారి వివరాలను సేకరిస్తున్నారని అన్నారు. యూట్యూబర్లు, ఇన్‌ఫ్లుయెన్సర్లు, కోచింగ్ సెంటర్ల నిర్వాహకులు, ఉపాధ్యాయుల వివరాలు కూడా సేకరిస్తున్నారని ఆరోపించారు.

పేరు, చిరునామా, వృత్తి తదితర వ్యక్తిగత వివరాలను సేకరించి నిఘా పెట్టే ప్రయత్నం జరుగుతోందన్నారు. ఎన్నికల్లో ఇచ్చిన హామీలను గుర్తు చేస్తే కేసులు పెట్టి లోపల వేయడమే ప్రభుత్వ విధానంగా మారిందని విమర్శించారు. అధికార దుర్వినియోగం చేస్తూ పైకి మాత్రం ఫీల్‌గుడ్ ప్రభుత్వంగా ప్రచారం చేసుకుంటున్నారని అన్నారు.

రాజమహేంద్రవరంలోని ప్రియాంక ఘటనతో పాటు రాష్ట్రవ్యాప్తంగా చిన్నారులు, మహిళలు, విద్యార్థులపై జరుగుతున్న అకృత్యాలు, హత్యలు, కబ్జాలు, డ్రగ్స్, గంజాయి, మద్యం అక్రమ విక్రయాలను నియంత్రించడంపై ప్రభుత్వం దృష్టి పెట్టడం లేదని ఆరోపించారు. హోంగార్డు నుంచి డీజీపీ వరకు ప్రభుత్వాన్ని ప్రశ్నించే వారిపై ప్రతాపం చూపించడానికే పోలీసు వ్యవస్థను ఉపయోగిస్తున్నారని అన్నారు.

విద్యార్థులపై పోలీసుల దౌర్జన్యం సరికాదు

తిరుపతిలో స్టైఫండ్ వివరాలపై స్పష్టత ఇవ్వాలని అడిగిన విద్యార్థులపై పోలీసులు దౌర్జన్యానికి పాల్పడ్డారని రాజా ఆరోపించారు. విద్యార్థినులను కూడా పోలీసులు ఈడ్చుకెళ్లారని, విద్యార్థులను పోలీసు వాహనాల్లోకి ఎక్కించి దాడి చేశారని విమర్శించారు.

అధికారం ఉంది కదా అని ఏం చేసినా చెల్లుతుందనే ధోరణి సరికాదన్నారు. ప్రతిపక్షంలో ఉన్న సమయంలో చంద్రబాబు, లోకేష్‌లు రోడ్లపైకి వచ్చి ప్రభుత్వాన్ని ప్రశ్నించిన విషయాన్ని గుర్తు చేసుకోవాలని సూచించారు. ఇప్పుడు యువత ప్రశ్నిస్తే వారిని ప్రజాస్వామ్య వ్యతిరేకులుగా చిత్రీకరించడం ఏమిటని ప్రశ్నించారు.

మోసపోయిన యువత రోడ్లపైకి వస్తారన్న భయంతోనే వారి డిజిటల్ ప్రొఫైళ్లను సేకరిస్తున్నారని ఆరోపించారు. హామీలు అమలు చేయడం చేతకాకపోతే ప్రజలను క్షమాపణ కోరాలని చంద్రబాబుకు సూచించారు. కేవలం ముఖ్యమంత్రి పీఠం కోసం అబద్ధపు హామీలు ఇచ్చామని ఒప్పుకోవాలని అన్నారు.

కోచింగ్ సెంటర్లపై దాడులు చేయించి లైసెన్సులు ఉన్నాయా లేదా అంటూ బెదిరింపులకు పాల్పడటం సరికాదన్నారు. ఎల్లవేళలా అధికారంలో ఉంటామని భావించవద్దని హెచ్చరించారు.

సోషల్ మీడియాను నియంత్రించగలరు.. ప్రజల ఆవేదనను కాదు

ఈస్ట్ జర్మనీలోని స్టాసీ వ్యవస్థ, బెర్లిన్ గోడ కూల్చివేతను, ఈజిప్టులో హోస్నీ ముబారక్ పాలనకు వ్యతిరేకంగా జరిగిన యువత ఉద్యమాన్ని గుర్తు చేసుకోవాలని రాజా సూచించారు. శ్రీలంకలో యువత పోరాటంతో రాజపక్స రాజీనామా చేసిన విషయాన్ని ప్రస్తావించారు.

సోషల్ మీడియాను నియంత్రించవచ్చేమో కానీ ప్రజల ఆవేదనను అణచివేయలేరని అన్నారు. ప్రజాస్వామ్యంలో ప్రజల గొంతుకను అణచివేయాలనే ప్రయత్నాలు సరికావన్నారు.

1974లో గుజరాత్‌లో విద్యార్థుల ఉద్యమం, 1970లలో బీహార్ విద్యార్థి ఉద్యమం, అస్సాంలో యువత ఉద్యమాలు సృష్టించిన రాజకీయ ప్రకంపనలను కూటమి ప్రభుత్వం గుర్తుంచుకోవాలని హెచ్చరించారు.

డీఎస్సీపై ప్రశ్నిస్తే సోషల్ మీడియా ఖాతాల బ్లాక్ ఎందుకు?

డీఎస్సీ అంశంపై ప్రశ్నిస్తే సోషల్ మీడియా ఖాతాలను బ్లాక్ చేయడం, కంటెంట్‌ను తొలగించడం ద్వారా యువతకు జరిగిన అన్యాయాన్ని ఆపలేరని రాజా అన్నారు. తెలంగాణ ముఖ్యమంత్రి రేవంత్‌రెడ్డి ఏపీ డీఎస్సీ అంశంపై అసెంబ్లీలో చేసిన వ్యాఖ్యలను గుర్తు చేశారు.

తెలంగాణలో 45 రోజుల్లో డీఎస్సీ నిర్వహించామని చెప్పిన విషయాన్ని ప్రస్తావిస్తూ, ఏపీ డీఎస్సీపై మీ శిష్యుడే చేసిన వ్యాఖ్యలను గుర్తు చేసుకోవాలని చంద్రబాబును ఉద్దేశించి అన్నారు. మీ ప్రభుత్వంపై మాట్లాడిన తెలంగాణ ముఖ్యమంత్రి సోషల్ మీడియా ఖాతాలను బ్లాక్ చేసే దమ్ముందా? అని ప్రశ్నించారు.

అమాయక ప్రజలు ఇచ్చిన అధికారాన్ని ఉపయోగించుకుని వారిపైనే నిఘా వ్యవస్థను ఏర్పాటు చేసి, ప్రశ్నించే గొంతులను అణచివేయడం సరికాదన్నారు. అంబేద్కర్ రాజ్యాంగాన్ని నియంతృత్వ ధోరణులతో మార్చాలని ప్రయత్నిస్తే యువత, ప్రజలు తిరగబడతారని హెచ్చరించారు. పోలీసు వ్యవస్థను ఉపయోగించి చేస్తున్న చర్యలు భవిష్యత్తులో ప్రభుత్వానికే ఎదురవుతాయని అన్నారు.

ఉద్యోగాలపై దృష్టి పెట్టాలి

వైఎస్సార్‌సీపీ ప్రభుత్వ హయాంలో అత్యంత పారదర్శకంగా 1.35 లక్షల సచివాలయ ఉద్యోగాల నియామకం చేపట్టామని రాజా తెలిపారు. పోలీసు, వైద్య రంగాలతో పాటు ప్రైవేట్ రంగంలోనూ లక్షలాది మందికి ఉద్యోగాలు కల్పించామని పేర్కొన్నారు.

ప్రభుత్వ ఖజానా పరిస్థితిపై కాగ్ నివేదికలో వెల్లడైన అంశాలను రాజా ప్రస్తావించారు. రాష్ట్ర ప్రభుత్వం కేవలం కొద్దిరోజుల నిర్వహణకు సరిపడే నిధులతోనే నడుస్తోందని, మిగిలిన కాలం అప్పులు, ఓవర్‌డ్రాఫ్ట్‌లపై ఆధారపడుతోందని ఆరోపించారు. ఇప్పటికైనా చంద్రబాబు కళ్లు తెరిచి ప్రజలకు ఇచ్చిన హామీల అమలుపై దృష్టి పెట్టాలని సూచించారు.

రూ.3 వేల నిరుద్యోగ భృతి, జాబ్ క్యాలెండర్‌ తో పాటు ఎన్నికల సమయంలో ఇచ్చిన హామీలను అమలు చేయాలని డిమాండ్ చేశారు. లేకపోతే రాష్ట్రంలో ఒకప్పుడు నియంత పాలన సాగించిన ప్రభుత్వం ఉండేదని ప్రజలు మాట్లాడుకునే పరిస్థితి వస్తుందని జక్కంపూడి రాజా హెచ్చరించారు.