Rampachodavaram: సిఎం పర్యటన వేదికగా గిరిజన సమస్యలు పరిష్కరించాలి!

Rampachodavaram: రంపచోడవరం పర్యటనలో గిరిజనుల ప్రాథమిక హక్కులు, నియోజకవర్గ అభివృద్ధిపై ముఖ్యమంత్రి స్పష్టమైన హామీ ఇవ్వాలి..!

​— సి.పి.ఎం. పోలవరం జిల్లా కమిటీ డిమాండ్

ఈ నెల 24న పోలవరం జిల్లా రంపచోడవరం నియోజకవర్గానికి విచ్చేస్తున్న రాష్ట్ర ముఖ్యమంత్రి గారు ఏజెన్సీ ప్రాంత గిరిజనులు ఏళ్ల తరబడి ఎదుర్కొంటున్న సుదీర్ఘ సమస్యలను పరిష్కరించేందుకు ఈ పర్యటన వేదిక కావాలని సీపీఎం పోలవరం జిల్లా కార్యదర్శి బొప్పెన. కిరణ్ డిమాండ్ చేశారు. కేవలం సభలకే పరిమితం కాకుండా, గిరిజన ప్రాంతాల నిజమైన అభివృద్ధికి సమగ్రమైన కార్యాచరణ ప్రణాళికను ప్రకటించాలని కోరుతున్నాం.

​ఈ పర్యటన సందర్భంగా రాష్ట్ర ప్రభుత్వం మరియు ముఖ్యమంత్రి గారు తక్షణమే స్పందించి, పరిష్కరించాల్సిన ముఖ్యమైన సమస్యలు:

​1. పోలవరం నిర్వాసితుల పునరావాసం (R&R) మరియు పూర్తి నష్టపరిహారం:

​ఏజెన్సీ పరిధిలోని పోలవరం ప్రాజెక్ట్ నిర్వాసిత కుటుంబాలకు ప్రకటించిన నష్టపరిహారాన్ని, పునరావాసాన్ని (R&R Package) యుద్ధ ప్రాతిపదికన అందించాలి. కాలనీల్లో కనీస మౌలిక వసతులైన తాగునీరు, విద్యుత్, రహదారులు కల్పించాలి. కాంటూర్ తో సంబంధం లేకుండా అన్ని గ్రామాలకు ఓకే కాంటూరు కింద నష్టపరిహారం ఇవ్వాలి.

​2. 'జిఓ నెం. 3' పునరుద్ధరణ & గిరిజన హక్కుల పరిరక్షణ:

​ఏజెన్సీ ప్రాంతాల్లో గిరిజన నిరుద్యోగుల ఉపాధి హక్కులను కాపాడే విధంగా చట్టబద్ధమైన చర్యలు చేపట్టాలి. 1/70 చట్టాన్ని, అటవీ హక్కుల చట్టాన్ని (FRA) పకడ్బందీగా అమలు చేసి, గిరిజనుల సాగు భూములకు హక్కు పత్రాలు (పోడు పట్టాలు) తక్షణమే మంజూరు చేయాలి.

​3. ఏజెన్సీలో సూపర్ స్పెషాలిటీ వైద్య సేవలు:

​రంపచోడవరం గిరిజన ప్రాంతంలో మాతా శిశు మరణాలను అరికట్టడానికి, వర్షాకాలంలో వ్యాపించే సీజనల్ వ్యాధులు, రక్తహీనత వంటి సమస్యలను ఎదుర్కొనడానికి ఏరియా ఆసుపత్రిని సూపర్ స్పెషాలిటీ స్థాయికి ఆధునీకరించాలి. మారుమూల గిరిజన గ్రామాలకు ఆంబులెన్స్, మెరుగైన రవాణా వసతులు కల్పించాలి.

​4. మౌలిక వసతులు & రహదారుల నిర్మాణం:

​రంపచోడవరం నియోజకవర్గంలోని మారుమూల గిరిజన గ్రామాలకు నేటికీ సరైన రహదారి సౌకర్యం లేక ప్రజలు పడుతున్న అవస్థలను గుర్తించి, అన్ని గూడేలకు పక్కా రహదారులు, వంతెనల నిర్మాణానికి ప్రత్యేక నిధులు కేటాయించాలి.

​5. విద్య & గిరిజన ఆశ్రమ పాఠశాలల బలోపేతం:

​ఏజెన్సీలోని గిరిజన సంక్షేమ ఆశ్రమ పాఠశాలలు, హాస్టళ్లలో ఖాళీగా ఉన్న ఉపాధ్యాయ, సిబ్బంది పోస్టులను భర్తీ చేయాలి. డిజిటల్ విద్యతో పాటు పాఠశాలల్లో నాణ్యమైన మౌలిక వసతులు కల్పించాలి.

​6. గిరిజన ఉత్పత్తులకు మద్దతు ధర & గిరిజన వికాసం:

​గిరిజనులు సేకరించే అటవీ ఉత్పత్తులకు (GCC ద్వారా) మద్దతు ధర పెంచి కొనుగోలు చేయాలి. స్థానిక గిరిజన యువతకు ఉపాధి కల్పించేందుకు ఏజెన్సీ ఆధారిత చిన్న తరహా పరిశ్రమలను ఏర్పాటు చేయాలి.

​పోలవరం జిల్లాలోని సుందరమైన గిరిజన ప్రాంతం తీవ్రమైన నిర్లక్ష్యానికి గురవుతోంది. ముఖ్యమంత్రి గారి పర్యటన అధికారుల హడావుడికే పరిమితం కాకుండా, స్థానిక ప్రజల, గిరిజనుల సమస్యలకు శాశ్వత పరిష్కారం చూపే విధంగా ఉండాలనీ ఆయన డిమాండ్ చేశారు.