Gudivada Amarnath: గుడివాడ అమర్‌నాథ్‌కు జైలు శిక్ష: విశాఖ కోర్టు సంచలన తీర్పు

Gudivada Amarnath: వైఎస్ఆర్ కాంగ్రెస్ పార్టీ కీలక నేత, మాజీ మంత్రి గుడివాడ అమర్‌నాథ్‌కు విశాఖపట్నం న్యాయస్థానం షాక్ ఇచ్చింది. పదేళ్ల క్రితం నమోదైన ఒక పాత కేసులో ఆయనను దోషిగా తేల్చుతూ ఆరు నెలల జైలు శిక్ష ఖరారు చేసింది. ఈ పరిణామం ప్రస్తుతం రాజకీయ వర్గాల్లో పెద్ద ఎత్తున చర్చకు దారితీస్తోంది.

పదేళ్ల నాటి కేసులో విచారణ పూర్తి

వివరాల్లోకి వెళితే, ఆంధ్రప్రదేశ్ విభజన చట్టంలోని హామీలను అమలు చేయాలని కోరుతూ గతంలో పెద్ద ఎత్తున ఉద్యమాలు జరిగాయి. ఇందులో భాగంగా విశాఖపట్నం కేంద్రంగా ప్రత్యేక రైల్వే జోన్ ఏర్పాటు చేయాలని డిమాండ్ చేస్తూ 2016 ఏప్రిల్‌ నెలలో గుడివాడ అమర్‌నాథ్‌ జీవీఎంసీ కార్యాలయం వద్ద ఉన్న గాంధీ విగ్రహం సాక్షిగా ఆమరణ నిరాహార దీక్షకు దిగారు. నాలుగు రోజుల పాటు ఈ దీక్ష కొనసాగడంతో ఆయన ఆరోగ్య పరిస్థితి ఆందోళనకరంగా మారింది.

ఆత్మహత్యాయత్నం కింద కేసు నమోదు

అమర్‌నాథ్ ఆరోగ్యం క్షీణించడాన్ని గమనించిన పోలీసులు, ఆయన దీక్షను భగ్నం చేసి బలవంతంగా కింగ్ జార్జ్ ఆసుపత్రికి తరలించారు. అయితే, నిరాహార దీక్ష ద్వారా ప్రాణాలకు హాని తలపెట్టుకోవడానికి ప్రయత్నించారనే ఆరోపణలతో విశాఖ టూటౌన్‌ పోలీసులు ఆయనపై ఆత్మహత్యాయత్నం కింద కేసు నమోదు చేశారు. ఈ కేసు విచారణ గత ఎనిమిదేళ్లుగా సాగుతోంది.

కోర్టు తీర్పు

తాజాగా ఈ కేసుపై తుది విచారణ పూర్తి చేసిన విశాఖపట్నం రెండో అదనపు ప్రధాన న్యాయస్థానం న్యాయమూర్తి వరలక్ష్మి కీలక తీర్పును వెలువరించారు. అమర్‌నాథ్‌పై మోపబడిన ఆరోపణలు నిజమని నిర్ధారిస్తూ, ఆయనకు ఆరు నెలల సాధారణ జైలు శిక్షతో పాటు 5 వేల రూపాయల జరిమానా విధిస్తూ ఆదేశాలు జారీ చేశారు. ఒకవేళ జరిమానా చెల్లించని యెడల అదనపు శిక్ష అనుభవించాల్సి ఉంటుందని స్పష్టం చేశారు.

పై కోర్టులో అప్పీల్ చేస్తామన్న అమర్‌నాథ్

న్యాయస్థానం తీర్పుపై గుడివాడ అమర్‌నాథ్ స్పందిస్తూ.. ప్రజల ప్రయోజనాల కోసం, రైల్వే జోన్ సాధన కోసం తాను చేసిన పోరాటాన్ని తప్పుగా చిత్రీకరించడం సరికాదన్నారు. తమ పోరాట ఫలితంగానే విశాఖకు రైల్వే జోన్ మంజూరైందని ఆయన గుర్తు చేశారు. ఈ తీర్పును గౌరవిస్తూనే, న్యాయ సలహా మేరకు ఉన్నత న్యాయస్థానంలో అప్పీల్ చేయనున్నట్లు ఆయన వెల్లడించారు.