Khammam: ఎండల నుంచి తప్పించుకోవడానికి పిచ్చుక 'స్మార్ట్' ఐడియా: పార్క్ చేసిన స్కూటీలోనే గూడు.. గుడ్లు!

Khammam: తెలుగు రాష్ట్రాల్లో భానుడు భగభగ మండిపోతున్నాడు. ముఖ్యంగా ఖమ్మం జిల్లాలో రికార్డు స్థాయిలో ఉష్ణోగ్రతలు నమోదవుతుండటంతో ప్రజలు వడగాలులకు అల్లాడిపోతున్నారు. మనుషుల పరిస్థితి ఇలా ఉంటే.. మూగజీవాలు, పక్షుల పరిస్థితి మరీ ఘోరంగా తయారైంది. అయితే, మండుతున్న ఈ ఎండల నుంచి తమను తాము, తమ సంతానాన్ని రక్షించుకోవడానికి పక్షులు కూడా ఎంతలా ఆలోచిస్తాయో చెప్పడానికి ఖమ్మం జిల్లా వైరాలో చోటుచేసుకున్న ఈ ఆసక్తికర ఘటనే నిదర్శనం.

వైరా మున్సిపాలిటీ పరిధిలోని లీలాసుందరయ్యనగర్‌లో ఒక పిచ్చుక తన రక్షణ కోసం ఏకంగా ఒక ద్విచక్ర వాహనాన్ని సురక్షిత గూటిగా మార్చుకోవడం స్థానికులను ఆశ్చర్యానికి గురిచేస్తోంది.

లీలాసుందరయ్యనగర్‌లోని ఓ ఇంట్లో అద్దెకు ఉంటున్న కుటుంబం వేసవి సెలవుల నేపథ్యంలో తమ స్వగ్రామానికి వెళ్లిపోయింది. వారు వెళ్తూ తమ స్కూటీని ఇంటి ఆవరణలోనే పార్కింగ్ చేసి వెళ్లారు. దీంతో ఆ ద్విచక్ర వాహనం నెలరోజులకు పైగా ఒకే చోట కదలకుండా ఉండిపోయింది. ఈ ఖాళీ సమయాన్ని, ప్రశాంతతను గమనించిన ఒక పిచ్చుక.. స్కూటీ తాళం (Keyhole) అమరిక పక్కన ఉన్న చిన్న ఖాళీ ప్రదేశాన్ని తన నివాసంగా మార్చుకోవాలని డిసైడ్ అయింది.

చెట్లపై గూళ్లు కడితే ఎండ తీవ్రత నేరుగా తగులుతుందని భావించిందో ఏమో గానీ.. ఆ పిచ్చుక ఎంతో చాకచక్యంగా స్కూటీ లోపలి భాగంలో గూడు నిర్మించుకుంది. అంతటితో ఆగకుండా ఆ గూటిలో గుడ్లు కూడా పెట్టి పొదగడం ప్రారంభించింది.

గత కొన్ని రోజులుగా పిచ్చుకలు తరచూ ఆ స్కూటీ వద్దకు వచ్చి వెళ్తుండటాన్ని గమనించిన స్థానికులకు అనుమానం వచ్చింది. వాహనం దగ్గరకు వెళ్లి నిశితంగా పరిశీలించగా, తాళం పక్కన ఉన్న గ్యాప్‌లో పిచ్చుక గూడు, అందులో అందమైన గుడ్లు కనిపించడంతో వారు ఆశ్చర్యపోయారు.

మారుతున్న వాతావరణ పరిస్థితులు, అడవుల నరికివేత వల్ల పక్షులకు సహజ సిద్ధమైన చెట్లపై నీడ కరువవుతోంది. ఈ క్రమంలో తన పిల్లలను కాపాడుకునేందుకు ఈ పిచ్చుక ఎంచుకున్న ఈ వినూత్న సురక్షిత గృహం (స్కూటీ గూడు) ఫోటోలు ఇప్పుడు సోషల్ మీడియాలో తెగ చక్కర్లు కొడుతున్నాయి. పిచ్చుక 'స్మార్ట్ వర్క్'ను చూసి నెటిజన్లు సైతం మురిసిపోతున్నారు.