Aishwarya Rai Cannes History: కేన్స్ వేదికపై 24 ఏళ్ల ఐశ్వర్య రాయ్ ఫ్యాషన్ సామ్రాజ్యం.. పట్టుచీర నుండి ‘లీవింగ్ లెజెండ్’ వరకు రేర్ లుక్స్!

Aishwarya Rai Cannes History: ప్రతిష్టాత్మక కేన్స్ ఫిల్మ్ ఫెస్టివల్ (Cannes Film Festival) అనగానే ప్రపంచవ్యాప్తంగా ఉన్న ఫ్యాషన్ ప్రియులకు మొదట గుర్తొచ్చే పేరు 'ఐశ్వర్య రాయ్ బచ్చన్'. అంతర్జాతీయ సినిమా వేదికపై భారత్ తరఫున ఒక గ్లోబల్ బ్రాండ్‌ను క్రియేట్ చేసిన ఘనత ఆమెకే దక్కుతుంది. కేన్స్ 2026 వేదికపై 'లారియల్ ప్యారిస్' చేత ‘లీవింగ్ లెజెండ్’ (Living Legend) గా కొనియాడబడిన ఐశ్వర్య.. గత 24 ఏళ్లుగా ఫ్రెంచ్ రివియెరా రెడ్ కార్పెట్‌పై సాగించిన ఫ్యాషన్ ప్రయాణం, సృష్టించిన సంచలనాలు అంతా ఇంతా కాదు. సాంప్రదాయ పట్టుచీరతో మొదలైన ఆమె ప్రయాణంలోని ఐకానిక్ మైలురాళ్లపై ఒక ప్రత్యేక కథనం.

2002: చారిత్రాత్మక తొలి అడుగు.. కాంచీపురం పట్టుచీరతో ఘనస్వాగతం

ఐశ్వర్య రాయ్ 2002లో మొదటిసారి కేన్స్ రెడ్ కార్పెట్‌పై అడుగుపెట్టారు. ఆమె నటించిన ‘దేవదాస్’ చిత్రం అక్కడ స్క్రీనింగ్ అయిన సందర్భంగా.. దర్శకుడు సంజయ్ లీలా భన్సాలీ, సహనటుడు షారుఖ్ ఖాన్‌లతో కలిసి ఆమె వెళ్లారు. ఆ సమయంలో ఐశ్వర్య ధరించిన సాంప్రదాయ పసుపు రంగు కాంచీపురం పట్టుచీర, భారీ గోల్డ్ జ్యువెలరీ అంతర్జాతీయ మీడియాను ఆకర్షించాయి. ఒక భారతీయ నటి పక్కా దేశీయ లుక్‌లో అంతటి అంతర్జాతీయ వేదికను మెస్మరైజ్ చేయడం ఒక చరిత్రగా నిలిచిపోయింది.

2003 - 2005: తొలి భారతీయ జ్యూరీ మెంబర్‌గా.. గ్లోబల్ ఫేస్‌గా మార్పు

2003లో కేన్స్ ఫిల్మ్ ఫెస్టివల్‌కు 'జ్యూరీ మెంబర్' (Jury Member) గా ఎంపికైన తొలి భారతీయ నటిగా ఐశ్వర్య సరికొత్త రికార్డు సృష్టించారు. ఆ సమయంలో ఆమె నియాన్ గ్రీన్ శారీ, ఫుస్సియా పింక్ లెహంగాలతో విభిన్న ప్రయోగాలు చేశారు. ఆపై 2004లో నీతా లుల్లా డిజైన్ చేసిన సిల్వర్ కటౌట్ గౌన్‌తో వెస్ట్రన్ లుక్‌లోకి మారారు. 2005లో అంతర్జాతీయ బ్రాండ్ ‘లారియల్ ప్యారిస్’ గ్లోబల్ అంబాసిడర్‌గా ఆమె అధికారిక ప్రయాణం ప్రారంభమై, గూచీ (Gucci) వంటి అంతర్జాతీయ బ్రాండ్ల దుస్తుల్లో మెరిశారు.

2007: రివియెరా వీధుల్లో ‘రాయల్ కపుల్’ వాక్

నటుడు అభిషేక్ బచ్చన్‌తో వివాహం జరిగిన తర్వాత 2007లో ఈ జంట మొదటిసారి కేన్స్ వేదికపై జంటగా నడిచారు. వజ్రాలు పొదిగిన అద్భుతమైన వైట్ ఆఫ్-షోల్డర్ జార్జియో అర్మానీ గౌనులో ఐశ్వర్య దేవకన్యలా మెరవగా.. అభిషేక్ క్లాసిక్ సూట్‌లో కనిపించారు. ఈ 'పవర్ కపుల్' ఎంట్రీ అప్పట్లో ప్రపంచవ్యాప్తంగా టాక్ ఆఫ్ ది టౌన్‌గా మారింది.

2014: విమర్శకుల నోళ్లు మూయించిన ‘గోల్డెన్ కంబ్యాక్’

ప్రసవం తర్వాత పెరిగిన బరువు కారణంగా అంతకుముందు కొన్ని సంవత్సరాలు తీవ్ర బాడీ షేమింగ్, విమర్శలు ఎదుర్కొన్న ఐశ్వర్య.. 2014లో ఇచ్చిన కంబ్యాక్ కేన్స్ చరిత్రలోనే అత్యుత్తమ ఘట్టం. రాబర్టో కావల్లి డిజైన్ చేసిన మెటాలిక్ గోల్డ్ మెర్మైడ్ గౌను, బోల్డ్ రెడ్ లిప్‌స్టిక్‌తో ఆమె రెడ్ కార్పెట్‌పై నడిచిన తీరు విమర్శకుల మైండ్ బ్లాక్ చేసింది. ఈ లుక్‌తో తనేంటో ఆమె ప్రపంచానికి చాటిచెప్పారు.

2016: సరికొత్త సాహసం.. సంచలనం రేపిన ‘పర్పుల్ లిప్స్’

ఫ్యాషన్‌లో తను ఎంతటి సాహసానికైనా సిద్ధమేనని ఐశ్వర్య 2016లో నిరూపించారు. రామి కాడి డిజైన్ చేసిన ఫ్లోరల్ గౌనుకు మ్యాచింగ్‌గా ఆమె ధరించిన పర్పుల్ (Pastel Purple) కలర్ లిప్‌స్టిక్ ప్రపంచవ్యాప్తంగా భారీ సంచలనం సృష్టించింది. సోషల్ మీడియాలో దీనిపై తీవ్ర చర్చ జరిగినప్పటికీ, ఒక గ్లోబల్ ఐకాన్‌గా ఆమె చేసిన ఈ బోల్డ్ ఫ్యాషన్ ప్రయత్నాన్ని అంతర్జాతీయ నిపుణులు కొనియాడారు.

2017 - 2018: రియల్ లైఫ్ డిస్నీ ప్రిన్సెస్ అండ్ బటర్ ఫ్లై మ్యాజిక్

ది సిండ్రెల్లా లుక్ (2017): మైఖేల్ సింకో డిజైన్ చేసిన ఐసీ-బ్లూ (Icy-Blue) భారీ హ్యాండ్‌క్రాఫ్టెడ్ బాల్ గౌనులో ఐశ్వర్య కనిపించిన విజువల్స్ ఇంటర్నెట్‌ను షేక్ చేశాయి. కేన్స్ మెట్లపై ఆమె నడుచుకుంటూ వస్తుంటే నిజమైన డిస్నీ ప్రిన్సెస్ భూమిపైకి వచ్చిందా అన్నట్లు ఫ్యాన్స్ మురిసిపోయారు. ఇది ఆమె కేన్స్ కెరీర్‌లోనే 'మోస్ట్ వైరల్ లుక్' గా నిలిచింది.

ది బటర్‌ఫ్లై గౌన్ (2018): మరుసటి ఏడాది కూడా మైఖేల్ సింకో డిజైన్ చేసిన 3 మీటర్ల పొడవైన అల్ట్రా-వైలెట్ బటర్‌ఫ్లై గౌనులో మెరిశారు. ఒక సీతాకోకచిలుక రూపకల్పనను తలపించేలా ఏకంగా 3,000 గంటల శ్రమతో ఈ అద్భుతాన్ని సృష్టించారు.

2026: వదంతులకు చెక్.. ఫ్యూచరిస్టిక్ సఫైర్ బ్లూ శిల్పం

కొంతకాలంగా వెండితెరకు దూరంగా ఉంటున్న ఐశ్వర్య.. ఈ ఏడాది కేన్స్ 2026 కు రావడం లేదంటూ సోషల్ మీడియాలో భారీగా వదంతులు వచ్చాయి. అయితే, వాటన్నింటికీ చెక్ పెడుతూ తన కుమార్తె ఆరాధ్య బచ్చన్‌తో కలిసి ఆమె కేన్స్ వేదికపై గ్రాండ్ ఎంట్రీ ఇచ్చారు. 1,500 గంటల పాటు కేవలం చేతిపనితో రూపొందించిన నీలమణి నీలం రంగు (Sapphire Blue) మెటాలిక్ కౌచర్ గౌనులో ఒక సజీవ శిల్పంలా మెరిసిపోయారు.

2002 లో పట్టుచీరతో మొదలైన ప్రయాణం నుండి 2026 లో అధునాతన ఫ్యాషన్ కౌచర్ గౌన్ల వరకు.. గత 24 ఏళ్లుగా ఐశ్వర్య రాయ్ బచ్చన్ ప్రతి ఏటా కేన్స్ వేదికగా సరికొత్త ట్రెండ్స్ సృష్టిస్తూనే ఉన్నారు. ప్రపంచ ఫ్యాషన్ సామ్రాజ్యంలో ఆమె స్థానం ఎప్పటికీ భర్తీ చేయలేనిదని, ఆమె ఒక నిజమైన అంతర్జాతీయ ఫ్యాషన్ ఐకాన్ అని కేన్స్ వేదిక మరోసారి రుజువు చేసింది.