Vanished Season 1 : మైమరపించే లొకేషన్లు.. ఆకట్టుకునే థ్రిల్..! కానీ..

Vanished Season 1 Review : ఒక రొమాంటిక్ రైలు ప్రయాణంలో ప్రియుడు హఠాత్తుగా మాయమైతే? ఆ తర్వాత వెలుగులోకి వచ్చే విస్తుపోయే నిజాలు, ప్రమాదకరమైన కుట్రలు ఏమిటి? అనే ఆసక్తికరమైన కాన్సెప్ట్‌తో తెరకెక్కిన వెబ్ సిరీస్ 'వెనిష్డ్ సీజన్ 1' (Vanished Season 1). కేలీ కువోకో, శామ్ క్లాఫ్లిన్ ప్రధాన పాత్రల్లో నటించిన ఈ 4 ఎపిసోడ్ల మిస్టరీ థ్రిల్లర్ సిరీస్ ఇటీవల విడుదలైంది. అమెజాన్ ప్రైమ్ లో అందుబాటులో ఉన్న ఈ సిరీస్ ప్రేక్షకులను ఏమేర అలరించిందో రివ్యూలో చూద్దాం.

కథేంటంటే?

అమెరికన్ పురావస్తు శాస్త్రవేత్త (ఆర్కియాలజిస్ట్) అలైస్ మన్రో (కేలీ కువోకో) తన ప్రియుడు టామ్ పార్కర్ (శామ్ క్లాఫ్లిన్)తో కలిసి ఫ్రాన్స్‌లో ఆహ్లాదకరమైన విహారయాత్రను ఆస్వాదిస్తూ ఉంటుంది. పారిస్ నుంచి ఆర్లెస్ వైపు వెళ్తున్న ఒక విలాసవంతమైన రైలు ప్రయాణంలో, ఆఫీస్ కాల్ మాట్లాడుతానని వెళ్లి టామ్ హఠాత్తుగా మాయమవుతాడు. ఒక ఊహించని రైలు స్టాప్ తర్వాత అతడు కనిపించకపోవడంతో అలైస్ కలవరపడుతుంది. అధికారుల నిర్లక్ష్య సమాధానాలను నమ్మని అలైస్ స్వయంగా శోధించడం ప్రారంభిస్తుంది. ఈ క్రమంలో టామ్ అసలు గుర్తింపు , అతడి వెనుక ఉన్న ప్రమాదకరమైన అంతర్జాతీయ కుట్రకు సంబంధించిన దిగ్భ్రాంతికర నిజాలు వెలుగులోకి వస్తాయి. అసలు టామ్ ఎవరు? అతడు ఎందుకు మాయమయ్యాడు? అనేదే మిగతా కథ.

ఆకట్టుకునే లొకేషన్లు.. ఉత్కంఠభరిత కథనం..

క్రియేటర్లు డేవిడ్ హిల్టన్, ప్రెస్టన్ థాంప్సన్ కథను ఎక్కడా ఆలస్యం చేయకుండా నేరుగా అసలు మిస్టరీలోకి తీసుకువెళ్లారు. దక్షిణ ఫ్రాన్స్, మార్సెయిల్ వంటి సుందరమైన లొకేషన్లు సిరీస్‌కి సినిమాటిక్ లుక్‌ను ఇచ్చాయి. కంటికి ఇంపుగా ఉండే అందమైన లొకేషన్ల నడుమ నడిచే ఉత్కంఠభరిత సన్నివేశాలు ప్రేక్షకులను తెరపై నుంచి చూపు తిప్పుకోకుండా చేస్తాయి. ప్రతి కొత్త క్లూ మిస్టరీని మరో మలుపు తిప్పుతూ ఆసక్తిని కలిగిస్తుంది.

నటీనటుల పనితీరు

సాధారణ మహిళలు అసాధారణ పరిస్థితుల్లో చిక్కుకున్నప్పుడు ఎలా స్పందిస్తారో చూపించడంలో కేలీ కువోకో తన నైపుణ్యాన్ని మరోసారి చాటుకున్నారు. అలైస్ పాత్రలో ఆమె నటన, ఆందోళన , పట్టుదల నెటిజన్లను కట్టుపడేస్తాయి. డిటెక్టివ్ డ్రాక్స్ పాత్రలో సైమన్ అబ్కారియన్, విలేకరి హెలెన్ లాండోగా కరిన్ వియార్డ్ చక్కటి ప్రదర్శన ఇచ్చారు. వీరిద్దరి పాత్రలు దర్యాప్తునకు కాస్త వెచ్చదనాన్ని, సమయానుకూల హాస్యాన్ని జోడించాయి.

ఎక్కడ దెబ్బకొట్టింది?

ఈ సిరీస్ ప్రధాన బలహీనత దాని వేగవంతమైన కథనమే. కేవలం 4 ఎపిసోడ్ల వ్యవధి మాత్రమే ఉండటంతో పాత్రల భావోద్వేగాలను, వారి నేపథ్యాన్ని బలంగా చూపించడానికి సమయం సరిపోలేదు. ట్విస్టులు వరుసగా వస్తూనే ఉన్నా, అవి ప్రేక్షకుడికి అనుభూతిని కలిగించేలా కాకుండా కథను ముందుకు నెట్టడానికే రూపొందించినట్లు అనిపిస్తాయి. ముఖ్యంగా అలైస్, టామ్‌ల మధ్య బంధాన్ని కేవలం కొన్ని ఫ్లాష్‌బ్యాక్ సీన్లకే పరిమితం చేయడం వల్ల వారి మధ్య ప్రేమను ప్రేక్షకులు బలంగా అనుభూతి చెందలేరు.

ఇక క్లైమాక్స్ వైపు వచ్చేసరికి మిస్టరీ మరింత సంక్లిష్టంగా మారి, చివరకు చాలా హడావుడిగా ముగించినట్లు అనిపిస్తుంది. ఫైనల్ గా.. సస్పెన్స్, అద్భుతమైన ఫ్రాన్స్ లొకేషన్లు , కేలీ కువోకో బలీయమైన నటన కోసం 'వెనిష్డ్ సీజన్ 1'ను సరదాగా ఒకే సారి చూసేయవచ్చు. అయితే కథనంలో లోపించిన లోతు, పాత్రల అసంపూర్ణ రూపకల్పన , నిరాశపరిచే ముగింపు వల్ల ఇది ఒక సగటు మిస్టరీ థ్రిల్లర్‌గా మిగిలిపోయింది.