Netflix FIFA Game : నెట్‌ఫ్లిక్స్‌లో ఫిఫా వరల్డ్ కప్ గేమ్.. ఫ్రీగా ఆడే ఛాన్స్.!

Netflix FIFA Game : ఫుట్‌బాల్ అభిమానులకు ఫెడరేషన్ ఇంటర్నేషనల్ డి ఫుట్‌బాల్ అసోసియేషన్ (FIFA) , ప్రముఖ ఓటీటీ ప్లాట్‌ఫారమ్ నెట్‌ఫ్లిక్స్ (Netflix) ఒక అదిరిపోయే శుభవార్తను అందించాయి. ఫిఫా వరల్డ్ కప్ 2026 ప్రారంభానికి ముందే నెట్‌ఫ్లిక్స్ గేమ్స్ (Netflix Games) భాగస్వామ్యంతో 'ఫిఫా వరల్డ్ కప్: లాంచ్ ఎడిషన్' (FIFA World Cup: Launch Edition) అనే సరికొత్త అఫీషియల్ ఫుట్‌బాల్ గేమ్‌ను తీసుకువస్తున్నట్లు ఉమ్మడిగా ప్రకటించాయి. ఈ మెగా టోర్నమెంట్‌లో పాల్గొనే మొత్తం 48 జాతీయ జట్లతో పాటు, 16 అధికారిక స్టేడియంలలో ఆడే అవకాశాన్ని ఈ గేమ్ కల్పిస్తోంది. నెట్‌ఫ్లిక్స్ సబ్‌స్క్రిప్షన్ ఉన్న వినియోగదారులందరికీ ఎలాంటి అదనపు రుసుము లేకుండా ఉచితంగా ఈ గేమ్ అందుబాటులోకి రానుంది. ఫిఫా తన డిజిటల్ నెట్‌వర్క్‌ను మరింత విస్తరించడంలో భాగంగానే ఈ సరికొత్త గేమింగ్ వ్యూహాన్ని అమలు చేస్తోంది.

అన్ని జట్లతో ఆడే సువర్ణావకాశం

అధికారిక పత్రికా ప్రకటన ప్రకారం, ఫిఫా వరల్డ్ కప్ 2026 ప్రారంభమయ్యే జూన్ 11వ తేదీ నుంచే ఈ గేమ్ నెట్‌ఫ్లిక్స్ గేమ్స్‌లో ప్రత్యేకంగా అందుబాటులోకి రానుంది. ఈ గేమ్‌లో టోర్నమెంట్‌కు అర్హత సాధించిన 48 జట్లు, 16 అధికారిక స్టేడియంలతో పాటు 1,200 మందికి పైగా నిజమైన ఫుట్‌బాల్ ఆటగాళ్ల క్యారెక్టర్లు ఫీచర్ కానున్నాయి. గేమింగ్‌పై పెద్దగా అవగాహన లేని వారు సైతం సులువుగా ఆడేలా దీని యూజర్ ఇంటర్‌ఫేస్‌ను అత్యంత సరళంగా రూపొందించినట్లు ఫిఫా తెలిపింది. వినియోగదారులు తమకు నచ్చిన దేశం తరఫున జట్టును ఎంచుకుని, ప్రపంచకప్ టోర్నమెంట్ తరహాలోనే మ్యాచ్‌లలో పోటీ పడవచ్చు.

స్మార్ట్‌ఫోనే కంట్రోలర్.. సరికొత్త గేమింగ్ అనుభూతి

ఈ గేమ్ సరికొత్త ఫోన్-ఆధారిత కంట్రోల్ సిస్టమ్‌ను (Phone-based control system) కలిగి ఉంది. ఆటగాళ్లు తమ కంపాటబుల్ స్మార్ట్ టీవీలో ఈ గేమ్‌ను ఓపెన్ చేసి, అక్కడ కనిపించే క్యూఆర్ (QR) కోడ్‌ను తమ మొబైల్ ఫోన్ ద్వారా స్కాన్ చేయడం ద్వారా టీవీకి కనెక్ట్ అవ్వచ్చు. ఆ తర్వాత వినియోగదారుల స్మార్ట్‌ఫోనే గేమింగ్ కంట్రోలర్‌గా మారుతుంది. దీని ద్వారా ఆటగాళ్లు నేరుగా తమ మొబైల్ నుంచే బాల్ పాస్ చేయడం, షూట్ చేయడం వంటి గేమ్ ప్లేని చాలా సులభంగా నియంత్రించవచ్చు. ఎటువంటి సంక్లిష్టమైన సెటప్ అవసరం లేకుండానే మ్యాచ్‌లోకి ప్రవేశించేలా దీనిని రూపొందించారు.

మల్టీప్లేయర్ సపోర్ట్ , భవిష్యత్తు అప్‌డేట్లు

ఒకే మ్యాచ్‌లో ఒకేసారి నలుగురు ఆటగాళ్లు కలిసి పోటీ పడేలా ఈ ఫిఫా వరల్డ్ కప్ లాంచ్ ఎడిషన్‌లో లోకల్ మల్టీప్లేయర్ సపోర్ట్‌ను కూడా అందించారు. ప్రస్తుతం ఈ ప్రారంభ ఎడిషన్‌లో ఆటను సులభంగా ఆస్వాదించడంపైనే దృష్టి పెట్టామని, రాబోయే రోజుల్లో మరిన్ని సరికొత్త ఫీచర్లు, మెరుగైన గ్రాఫిక్స్ , అప్‌డేట్లను జత చేయనున్నట్లు ఫిఫా పేర్కొంది. నెట్‌ఫ్లిక్స్‌తో కుదుర్చుకున్న ఈ సరికొత్త భాగస్వామ్యం ద్వారా ప్రపంచవ్యాప్తంగా ఉన్న కోట్లాది మంది ఫుట్‌బాల్ , గేమింగ్ ప్రియులను ఒకే వేదికపైకి తీసుకురావచ్చని సంస్థ ఆశాభావం వ్యక్తం చేసింది.