ఓటీటీకి వచ్చేస్తున్న ధనుష్ మేనల్లుడి ‘లవ్ ఓ లవ్’.. ఎప్పుడంటే?

Love Oh Love: కోలీవుడ్ స్టార్ హీరో ధనుష్ మేనల్లుడు పవిశ్ ప్రధాన పాత్రలో నటించిన తాజా రొమాంటిక్ కామెడీ చిత్రం ‘లవ్ ఓ లవ్’. మగేష్ రాజేంద్రన్ దర్శకత్వం వహించిన ఈ చిత్రం ఇటీవలే థియేటర్లలో విడుదలైంది. అయితే బాక్సాఫీస్ వద్ద ఆశించిన స్థాయిలో రాణించని ఈ సినిమా, ఇప్పుడు అనుకున్నదానికంటే ముందే ఓటీటీ వేదికగా ప్రేక్షకులను అలరించేందుకు సిద్ధమైంది.

అమెజాన్ ప్రైమ్‌లో స్ట్రీమింగ్ డేట్ ఫిక్స్

ప్రముఖ తెలుగు యూట్యూబర్ నాగదుర్గ ఈ చిత్రంతోనే తమిళ ఇండస్ట్రీకి హీరోయిన్‌గా పరిచయమయ్యారు. జూలై 10న థియేటర్లలో విడుదలైన ఈ చిత్రం, కేవలం కొన్ని వారాల వ్యవధిలోనే డిజిటల్ ప్రీమియర్‌కు వచ్చేస్తోంది. ప్రముఖ ఓటీటీ వేదిక అమెజాన్ ప్రైమ్ లో జూలై 31 నుండి ఈ సినిమా స్ట్రీమింగ్ కానున్నట్లు అధికారిక ప్రకటన వెలువడింది. థియేట్రికల్ రన్‌లో మిశ్రమ స్పందన తెచ్చుకున్న ఈ చిత్రం ఓటీటీలో ఎలాంటి రెస్పాన్స్ అందుకుంటుందో వేచి చూడాలి.

కథ .. నటీనటుల వివరాలు

ఒక కార్పొరేట్ ఉద్యోగి అయిన హీరో.. తన గర్ల్‌ఫ్రెండ్ కారణంగా భారీ క్రెడిట్ కార్డ్ అప్పుల ఊబిలో చిక్కుకోవడం, ఆ తర్వాత రిలేషన్‌షిప్ ప్రెషర్స్ వల్ల తను ఎదుర్కొన్న ఇబ్బందులను పోలీసులకు వివరిస్తూ సాగే వినూత్న కథాంశంతో ఈ సినిమా తెరకెక్కింది. ఈ చిత్రంలో సెల్వరాఘవన్‌, కేఎస్ రవికుమార్, వనితా విజయ్‌కుమార్, రమ్య, ఆదిత్య కతిర్ తదితరులు కీలక పాత్రలు పోషించారు. ఫాక్స్ సంగీతం అందించగా, జినెమా మీడియా అండ్ ఎంటర్‌టైన్‌మెంట్ సంస్థ ఈ చిత్రాన్ని నిర్మించింది.