Markapur: మార్కాపురంలో కార్డన్ అండ్ సెర్చ్.. 35 వాహనాలు సీజ్

మార్కాపురం: మార్కాపురం పట్టణంలోని డ్రైవర్స్ కాలనీలో పోలీసులు కార్డన్ అండ్ సెర్చ్ ఆపరేషన్ నిర్వహించారు. ఈ తనిఖీల్లో నిబంధనలకు విరుద్ధంగా ఉన్న 35 వాహనాలను స్వాధీనం చేసుకుని సీజ్ చేశారు.

ఈ సందర్భంగా పోలీసులు స్థానిక ప్రజలకు డ్రైవింగ్ లైసెన్స్ ప్రాముఖ్యతను వివరించారు. మైనర్లు వాహనాలు నడపడం వల్ల ప్రమాదాలు సంభవించే అవకాశం ఉండటంతో పాటు, చట్టపరమైన పరిణామాలు కూడా ఎదుర్కోవాల్సి వస్తుందని హెచ్చరించారు. తల్లిదండ్రులు తమ పిల్లలకు వాహనాలు ఇవ్వకుండా బాధ్యతగా వ్యవహరించాలని సూచించారు.

అదేవిధంగా పెరుగుతున్న సైబర్ నేరాలు, ఆన్‌లైన్ మోసాల పట్ల ప్రజలు అప్రమత్తంగా ఉండాలని పోలీసులు సూచించారు. తెలియని వ్యక్తుల నుంచి వచ్చే ఫోన్ కాల్స్, మెసేజ్‌లు, అనుమానాస్పద లింక్‌లను నమ్మవద్దని, వ్యక్తిగత మరియు బ్యాంకింగ్ వివరాలను ఎవరితోనూ పంచుకోవద్దని అవగాహన కల్పించారు. ప్రజలకు కౌన్సెలింగ్ నిర్వహించి సైబర్ నేరాల నివారణపై సూచనలు అందించారు.

ఈ కార్డన్ అండ్ సెర్చ్ కార్యక్రమంలో మార్కాపురం సర్కిల్ ఇన్‌స్పెక్టర్ అల్తాఫ్ హుసేన్, పట్టణ ఎస్సై విశ్వనాథరెడ్డి, గ్రామీణ ఎస్సై వేమన తదితరులు పాల్గొన్నారు.