Atmakur: ఆత్మకూరు అంగన్వాడీ కేంద్రంలో ఘనంగా 'తల్లిపాల వారోత్సవాలు'!

ఆత్మకూరు: నెల్లూరు జిల్లా ఆత్మకూరులోని యూపీహెచ్‌సీ అరుంధతివాడ పరిధిలోని ఎస్‌టీ కాలనీ-1 అంగన్వాడీ కేంద్రంలో ప్రపంచ తల్లిపాల వారోత్సవాలను ఘనంగా నిర్వహించారు. ఈ సందర్భంగా గర్భిణులు, బాలింతలకు తల్లిపాల ప్రాముఖ్యత, గర్భధారణ సమయంలో తీసుకోవాల్సిన జాగ్రత్తలు, తల్లి–బిడ్డ ఆరోగ్య సంరక్షణ, పౌష్టికాహారం, వ్యక్తిగత పరిశుభ్రతతో పాటు సీజనల్ వ్యాధుల నివారణపై విస్తృతంగా అవగాహన కల్పించారు.

కార్యక్రమంలో డాక్టర్ సాయి ప్రసన్న మాట్లాడుతూ తల్లిపాలు శిశువుకు ప్రకృతి ప్రసాదించిన అత్యుత్తమ ఆహారమని వివరించారు. బిడ్డ పుట్టిన తర్వాత వీలైనంత త్వరగా తల్లిపాలు ప్రారంభించడం, మొదట వచ్చే ముర్రుపాలను తప్పకుండా బిడ్డకు అందించడం ఎంతో ముఖ్యమని తెలిపారు. తొలి ఆరు నెలల పాటు వైద్యపరమైన ప్రత్యేక కారణం లేకపోతే బిడ్డకు తల్లిపాలనే ప్రధాన ఆహారంగా అందించాలని సూచించారు.తల్లిపాలు బిడ్డ ఎదుగుదలకు అవసరమైన పోషకాలను అందించడంతో పాటు రోగనిరోధక శక్తికి తోడ్పడతాయని, తల్లి–బిడ్డ మధ్య అనుబంధాన్ని బలోపేతం చేస్తాయని వివరించారు.

బాలింతలు తమ ఆరోగ్యాన్ని కూడా నిర్లక్ష్యం చేయకుండా పౌష్టికాహారం తీసుకోవడం, తగినంత విశ్రాంతి తీసుకోవడం, వైద్యుల సూచనలు పాటించడం ముఖ్యమని తెలిపారు.అదేవిధంగా గర్భిణులు గర్భధారణ సమయంలో తీసుకోవాల్సిన జాగ్రత్తలను డాక్టర్ సాయి ప్రసన్న గారు క్షుణ్ణంగా వివరించారు. నిర్ణీత సమయాల్లో వైద్య పరీక్షలు చేయించుకోవడం, ఐరన్‌, ఫోలిక్ యాసిడ్ తదితర మందులను వైద్యుల సూచన మేరకు తీసుకోవడం, సమతుల్యమైన పౌష్టికాహారం తీసుకోవడం, వ్యక్తిగత పరిశుభ్రత పాటించడం, ప్రమాద సంకేతాలు కనిపించినప్పుడు ఆలస్యం చేయకుండా వైద్య సేవలు పొందడం అవసరమని సూచించారు.

అంగన్వాడీల ద్వారా అందిస్తున్న పౌష్టికాహారాన్ని సద్వినియోగం చేసుకోవాలి..

ఈ సందర్భంగా సీడీపీఓ పి. సునీలత మాట్లాడుతూ ప్రభుత్వం అంగన్వాడీ కేంద్రాల ద్వారా గర్భిణులు, బాలింతలు, చిన్నారుల ఆరోగ్య పరిరక్షణ కోసం అందిస్తున్న పౌష్టికాహారాన్ని ప్రతి ఒక్కరూ పూర్తిస్థాయిలో సద్వినియోగం చేసుకోవాలని సూచించారు.గర్భిణులు, బాలింతలు తమకు అందిస్తున్న పోషకాహారాన్ని నిర్లక్ష్యం చేయకుండా తీసుకోవాలని, ఆరోగ్యకరమైన తల్లి ద్వారానే ఆరోగ్యకరమైన బిడ్డకు పునాది పడుతుందని తెలిపారు.

తల్లి ఆరోగ్యం, శిశువు ఆరోగ్యం విషయంలో కుటుంబ సభ్యుల సహకారం కూడా ఎంతో అవసరమని వివరించారు.అలాగే ఎస్‌టీ కాలనీ-1 అంగన్వాడీ కార్యకర్త రమణమ్మ కేంద్రం పరిధిలో గర్భిణులు, బాలింతలు, చిన్నారుల ఆరోగ్యం మరియు పోషకాహారంపై ప్రత్యేక శ్రద్ధ చూపుతూ ఎంతో బాధ్యతతో విధులు నిర్వహిస్తున్నారని సీడీపీఓ పి. సునీలత అభినందించారు.

డెంగ్యూ, మలేరియా మరియు సీజనల్ వ్యాధులపై అప్రమత్తంగా ఉండాలి..

అనంతరం హెల్త్ ఎడ్యుకేషన్ ఆఫీసర్ ఎస్. సుధాకర్ హెల్త్ అసిస్టెంట్ జి. రవీందర్ రెడ్డి మాట్లాడుతూ ప్రస్తుతం సీజనల్ వ్యాధులు ప్రబలే అవకాశం ఉన్నందున ప్రతి ఒక్కరూ అప్రమత్తంగా ఉండాలని సూచించారు.ముఖ్యంగా డెంగ్యూ, మలేరియా వంటి దోమల ద్వారా వ్యాపించే వ్యాధులను నివారించేందుకు ఇంటి పరిసరాలను పరిశుభ్రంగా ఉంచుకోవాలని, నీరు నిల్వ ఉండకుండా చూసుకోవాలని, నీటి పాత్రలను తరచుగా శుభ్రం చేయాలని, దోమలు పెరిగే ప్రాంతాలను గుర్తించి తొలగించాలని సూచించారు. దోమతెరలు ఉపయోగించడం, శరీరాన్ని కప్పే దుస్తులు ధరించడం వంటి జాగ్రత్తలు పాటించాలని తెలిపారు.

జ్వరం, తీవ్రమైన తలనొప్పి, ఒళ్లు నొప్పులు వంటి లక్షణాలు కనిపిస్తే నిర్లక్ష్యం చేయకుండా వైద్యులను సంప్రదించాలని సూచించారు.వ్యక్తిగత పరిశుభ్రతే ఆరోగ్యానికి మొదటి మెట్టు అని పేర్కొంటూ చేతులను సబ్బుతో శుభ్రంగా కడుక్కోవడం, పరిసరాలను పరిశుభ్రంగా ఉంచుకోవడం, సురక్షితమైన తాగునీరు ఉపయోగించడం, ఆహార పరిశుభ్రత పాటించడం వంటి అంశాలను వివరించారు.

తల్లిపాల వారోత్సవాల్లో భాగంగా కార్యక్రమానికి హాజరైన కొంతమంది గర్భిణులకు సంప్రదాయబద్ధంగా శ్రీమంతం కార్యక్రమాన్ని కూడా నిర్వహించారు. గర్భిణులను ఆశీర్వదిస్తూ తల్లీబిడ్డలు ఆరోగ్యంగా ఉండాలని ఆకాంక్షించారు. దీంతో కార్యక్రమం ఆనందోత్సాహాల మధ్య సాగింది.ఈ కార్యక్రమంలో టీడీపీ నాయకురాలు పులిమి శైలజా రెడ్డి, అంగన్వాడీ కార్యకర్త రమణమ్మతో పాటు అంగన్వాడీ కార్యకర్తలు, ఆరోగ్య సిబ్బంది, గర్భిణులు, బాలింతలు తదితరులు పాల్గొన్నారు.