Sullurpeta: మైనర్ల డ్రైవింగ్ ప్రమాదకరం: ఎస్సై భాను ప్రసన్న హెచ్చరిక

మైనర్ల డ్రైవింగ్ ప్రమాదకరం: శ్రీహరికోట ఎస్సై ఎస్. భాను ప్రసన్న హెచ్చరిక

​సూళ్ళూరుపేట రిపోర్టర్ :కెకెవి సుధాకర్

మైనర్ బాలబాలికలకు వాహనాలు ఇస్తే వారి భవిష్యత్తుతో పాటు, రోడ్డుపై వెళ్లే ఇతరుల ప్రాణాలకు కూడా ముప్పు వాటిల్లుతుందని శ్రీహరికోట ఎస్సై ఎస్. భాను ప్రసన్న స్పష్టం చేశారు. తిరుపతి జిల్లా సూళ్ళూరుపేట పోలీస్ స్టేషన్ ఆవరణలో మైనర్ డ్రైవింగ్‌పై ప్రత్యేక కౌన్సెలింగ్ కార్యక్రమం నిర్వహించారు.

​నిబంధనలకు విరుద్ధంగా ద్విచక్ర వాహనాలు నడుపుతూ పట్టుబడిన ముగ్గురు మైనర్ బాలురకు, వారి తల్లిదండ్రులకు ఎస్సై భాను ప్రసన్న సమక్షంలో కౌన్సెలింగ్ ఇచ్చారు. ఈ సందర్భంగా ఆమె మాట్లాడుతూ... పద్దెనిమిదేళ్లు నిండని పిల్లలకు వాహనాలు ఇవ్వడం చట్టరీత్యా నేరమని హెచ్చరించారు. సరదా కోసం లేదా అవసరం నెపంతో వాహనాలు ఇస్తే తీవ్ర పరిణామాలు ఎదుర్కోవాల్సి వస్తుందన్నారు. మైనర్లు డ్రైవింగ్ చేయడం వల్ల రోడ్డు ప్రమాదాలు జరిగి ప్రాణాలు పోయే ప్రమాదం ఉందని ఆమె ఆందోళన వ్యక్తం చేశారు.

​తల్లిదండ్రులు తమ పిల్లలపై నిరంతరం నిఘా ఉంచాలని, డ్రైవింగ్ లైసెన్స్ వచ్చే వరకు ఎట్టి పరిస్థితుల్లోనూ వాహనాలు ఇవ్వకూడదని ఆమె సూచించారు. ఒకవేళ మైనర్లు వాహనాలు నడుపుతూ పట్టుబడితే, వాహన యజమానులు మరియు తల్లిదండ్రులపైనే చట్టపరమైన కేసులు నమోదు చేస్తామని హెచ్చరించారు. భారీగా జరిమానాలు విధించడంతో పాటు జైలు శిక్ష కూడా పడే అవకాశం ఉందన్నారు. పట్టణంలో వాహన తనిఖీలను మరింత తీవ్రతరం చేస్తామని, నిబంధనలు ఉల్లంఘిస్తే కఠిన చర్యలు తప్పవని స్పష్టం చేశారు. పిల్లల భవిష్యత్తును దృష్టిలో ఉంచుకుని తల్లిదండ్రులు బాధ్యతాయుతంగా వ్యవహరించి, పోలీసు శాఖకు సహకరించాలని ఎస్సై భాను ప్రసన్న కోరారు.

​ఈ కార్యక్రమంలో పోలీస్ సిబ్బంది, మైనర్లు మరియు వారి తల్లిదండ్రులు పాల్గొన్నారు.