Atmakur: స్పార్క్ సిటీలో వైభవంగా శ్రీ వల్లి దేవసేన సమేత ఆలయ భూమి పూజ!

Atmakur: నెల్లూరు జిల్లా ఆత్మకూరు పట్టణంలోని స్పార్క్ సిటీలో నూతనంగా నిర్మించతలపెట్టిన శ్రీ వల్లి దేవసేన సమేత శ్రీ సుబ్రహ్మణ్యేశ్వర స్వామి వారి దేవస్థాన శంకుస్థాపన మరియు భూమి పూజా కార్యక్రమం ఈరోజు అత్యంత భక్తిశ్రద్ధలతో కనులపండువగా జరిగింది. ఈ దివ్య మహోత్సవంలో ముఖ్య అతిథిగా నిత్య అన్నదాత కంచి పరమేశ్వర రెడ్డి పాల్గొని ప్రత్యేక పూజలు నిర్వహించారు.

వేద పండితుల మంత్రోచ్ఛారణలు, మంగళ వాయిద్యాల నడుమ సాక్షాత్తు ఆ సుబ్రహ్మణ్యేశ్వర స్వామివారే అక్కడ కొలువుదీరినంత ఆధ్యాత్మిక వాతావరణం నెలకొంది. శంకుస్థాపన సందర్భంగా నిర్వహించిన పవిత్ర హోమం మరియు పూర్ణాహుతి కార్యక్రమాలతో ఆ ప్రాంతమంతా శివ-సుబ్రహ్మణ్య నామస్మరణతో మార్మోగింది.

ఈ ఆధ్యాత్మిక కార్యక్రమానికి ఆత్మకూరు పట్టణంతో పాటు చుట్టుపక్కల పరిసర ప్రాంతాల నుంచి, స్పార్క్ సిటీ భక్తులు విశేష సంఖ్యలో తరలివచ్చారు. కుటుంబ సమేతంగా విచ్చేసిన అశేష జనవాహిని స్వామివారి శంకుస్థాపన ఘట్టాన్ని తిలకించి తీర్థప్రసాదాలు స్వీకరించారు. భక్తులందరికీ శ్రీ వల్లి దేవసేన సమేత శ్రీ సుబ్రహ్మణ్యేశ్వర స్వామి వారి దివ్య ఆశీస్సులు ఎల్లప్పుడూ ఉండాలని, ఆత్మకూరు ప్రాంతం సర్వతోముఖాభివృద్ధి చెందాలని ఈ సందర్భంగా నిర్వాహకులు మరియు ప్రముఖులు ఆకాంక్షించారు.