Ambulance: అంబులెన్స్‌ను ఓయో రూమ్‌గా మార్చేశారు.. నడిరోడ్డుపై యువతీ యువకుల నిర్వాకం

Madhya Pradesh: అత్యవసర సమయంలో ప్రాణాలు కాపాడాల్సిన అంబులెన్స్ అంటే అందరికీ ఒక గౌరవం, ఒక భరోసా. కానీ, కొందరు విచ్చలవిడి యువకులు ఆ పవిత్రమైన సేవను అపహాస్యం చేశారు. మధ్యప్రదేశ్‌లోని చత్తర్‌పూర్‌ జిల్లాలో చోటుచేసుకున్న ఒక షాకింగ్ ఘటన ఇప్పుడు దేశవ్యాప్తంగా చర్చనీయాంశమైంది. ప్రాణాపాయ స్థితిలో ఉన్నవారిని తరలించాల్సిన అంబులెన్స్‌ను కొందరు యువకులు ఏకంగా తమ కామకలాపాలకు అడ్డాగా మార్చుకున్నారు.

5 కిలోమీటర్ల మేర వెంబడించి..

రోడ్డుపై వేగంగా వెళ్తున్న ఒక అంబులెన్స్‌లో ఏదో తేడాగా ఉందని గమనించిన స్థానికులకు అనుమానం వచ్చింది. వాహనం కిటికీ అద్దాల గుండా లోపల జరుగుతున్న తంతును చూసి వారు అవాక్కయ్యారు. వెంటనే ద్విచక్రవాహనాలపై ఆ అంబులెన్స్‌ను సుమారు 5 కిలోమీటర్ల మేర వెంటాడారు. సినిమా స్టైల్‌లో ఆ వాహనాన్ని అడ్డుకుని, తలుపులు తెరిచి చూడగా అసలు భాగోతం బయటపడింది.

నెటిజన్ల ఫైర్

అంబులెన్స్ లోపల ఇద్దరు యువకులు, ఒక యువతి అభ్యంతరకర స్థితిలో ఉండటాన్ని చూసి స్థానికులు విస్తుపోయారు. దీనికి సంబంధించిన వీడియో సోషల్ మీడియాలో వైరల్ కావడంతో నెటిజన్లు ఒక్కసారిగా విరుచుకుపడ్డారు. ఇది అంబులెన్స్ కాదు.. మూవింగ్ ఓయో అంటూ కొందరు వ్యంగ్యంగా కామెంట్ చేస్తుంటే.. ప్రాణాలు కాపాడాల్సిన వాహనంలో ఇలాంటి పాడు పనులేంటి? అని మరికొందరు ఆగ్రహం వ్యక్తం చేస్తున్నారు.

అధికారుల సీరియస్ యాక్షన్

అత్యవసర సేవల కోసం ప్రభుత్వం కేటాయించిన వాహనాన్ని ఇలాంటి అసాంఘిక కార్యకలాపాలకు ఎలా వాడుతారని సామాన్యులు ప్రశ్నిస్తున్నారు. ఈ ఘటనపై అధికారులు ఇప్పటికే విచారణ ప్రారంభించారు. ఆ అంబులెన్స్ ఎవరిది? ఆ సమయంలో డ్రైవర్ ఎక్కడ ఉన్నాడు? అనే కోణంలో దర్యాప్తు జరుగుతోంది. నిందితులపై కఠిన చర్యలు తీసుకోవాలని నెటిజన్లు డిమాండ్ చేస్తున్నారు. వైద్య రంగానికి ఉన్న విలువను తగ్గించేలా వ్యవహరించిన ఈ ఘటన, వ్యవస్థలోని లోపాలను మరోసారి వేలెత్తి చూపుతోంది.