Bus Accident : ఘోర రోడ్డు ప్రమాదం.. బస్సు బోల్తా పడి ఐదుగురు మృతి, 15 మందికి తీవ్రగాయాలు

Bus Accident : ఉత్తరప్రదేశ్‌లోని ఉన్నావ్ జిల్లాలో మంగళవారం తెల్లవారుజామున ఒక భయంకరమైన రోడ్డు ప్రమాదం జరిగింది. లక్నో-ఆగ్రా ఎక్స్‌ప్రెస్‌వేపై ప్రయాణిస్తున్న ఒక డబుల్ డెక్కర్ ఏసీ బస్సు అదుపుతప్పి బోల్తా పడింది. ఈ ప్రమాదంలో ఐదుగురు ప్రయాణికులు అక్కడికక్కడే ప్రాణాలు కోల్పోగా, మరో 15 మందికి పైగా తీవ్రంగా గాయపడ్డారు. ప్రమాద సమయంలో బస్సులో మొత్తం 30 మంది ప్రయాణికులు ఉన్నట్లు తెలుస్తోంది. ఢిల్లీ నుంచి బీహార్ వెళ్తుండగా ఈ విషాదం చోటుచేసుకుంది.

నిద్రమత్తే కొంపముంచింది

పోలీసుల ప్రాథమిక విచారణ ప్రకారం.. తెల్లవారుజామున 5 గంటల సమయంలో డ్రైవర్‌కు చిన్న నిద్రమత్తు రావడమే ఈ ప్రమాదానికి ప్రధాన కారణమని తెలుస్తోంది. ఆ సమయంలో బస్సు చాలా వేగంగా ఉంది. ఉన్నావ్‌లోని ఔరాస్ పోలీస్ స్టేషన్ పరిధిలోని 262 కిలోమీటర్ పాయింట్ వద్ద బస్సు అదుపుతప్పి డివైడర్‌ను బలంగా ఢీకొట్టింది. ఢీకొన్న వేగానికి బస్సు అద్దాలు పగిలిపోయి, కొందరు ప్రయాణికులు కిటికీల నుండి నేరుగా ఎక్స్‌ప్రెస్‌వే కింద పడిపోయారు. బస్సు కూడా ఎక్స్‌ప్రెస్‌వే రేలింగ్‌కు వేలాడుతూ భయానకంగా కనిపించింది.

క్షతగాత్రుల పరిస్థితి విషమం

ప్రమాదం జరిగిన వెంటనే అక్కడ పెద్ద ఎత్తున కేకలు, హాహాకారాలు వినిపించాయి. స్థానికులు వెంటనే పోలీసులకు, యూపీడా రెస్క్యూ టీమ్‌కు సమాచారం అందించారు. సమాచారం అందుకున్న వెంటనే పలు అంబులెన్సులు ఘటనాస్థలికి చేరుకున్నాయి. బస్సులో ఇరుక్కుపోయిన వారిని అతి కష్టం మీద బయటకు తీసి సమీపంలోని కమ్యూనిటీ హెల్త్ సెంటర్‌కు తరలించారు. పరిస్థితి విషమంగా ఉన్న వారిని లక్నోలోని ట్రామా సెంటర్, జిల్లా ఆసుపత్రికి రిఫర్ చేశారు.

దర్యాప్తు ప్రారంభించిన పోలీసులు

మృతుల మృతదేహాలను స్వాధీనం చేసుకున్న పోలీసులు పోస్ట్‌మార్టం నిమిత్తం తరలించారు. ప్రస్తుతం వారి వివరాలను సేకరించి కుటుంబ సభ్యులకు సమాచారం అందించే ప్రయత్నం చేస్తున్నారు. ఎక్స్‌ప్రెస్‌వేపై మితిమీరిన వేగంతో ప్రయాణించడం, రాత్రి సమయాల్లో డ్రైవర్లు విశ్రాంతి తీసుకోకపోవడం వంటి కారణాల వల్లే ఇలాంటి ప్రమాదాలు పునరావృతమవుతున్నాయని అధికారులు ఆగ్రహం వ్యక్తం చేస్తున్నారు. ఈ ఘటనపై కేసు నమోదు చేసిన పోలీసులు దర్యాప్తును ముమ్మరం చేశారు.