Swine Flu: ఢిల్లీలో స్వైన్ ఫ్లూ పంజా.. 8 రెట్లు పెరిగిన H1N1 కేసులు!

Swine Flu: దేశ రాజధాని ఢిల్లీలో స్వైన్ ఫ్లూ (H1N1) కేసులు వేగంగా పెరుగుతున్నాయి. ఆగస్టు 20 నాటికి నగరంలో 1,777 కేసులు నమోదయ్యాయని ఆరోగ్య శాఖ వెల్లడించింది. గత ఏడాది ఇదే సమయానికి నమోదైన సుమారు 200 కేసులతో పోలిస్తే, ఈసారి కేసుల సంఖ్య ఏకంగా 8 రెట్లు పెరగడం గమనార్హం.

అపోలో, మ్యాక్స్ వంటి ప్రముఖ ఆసుపత్రుల్లో ఓపిడి (OPD)కి వచ్చే ప్రతి 20 మంది రోగులలో దాదాపు 15 మందికి స్వైన్ ఫ్లూ పాజిటివ్‌గా తేలుతోందని వైద్యులు చెబుతున్నారు. వైరస్‌లో వచ్చిన జెనెటిక్ మ్యుటేషన్ లేదా ప్రజల మధ్య ముఖాముఖి సంబంధాలు పెరగడం వల్ల ఈ తీవ్రత ఎక్కువై ఉండవచ్చని అంచనా వేస్తున్నారు.

ప్రధాన లక్షణాలు:

ఇది ముక్కు, గొంతు మరియు ఊపిరితిత్తులపై తీవ్ర ప్రభావం చూపే ఇన్‌ఫ్లుయెంజా ‘ఎ’ రకానికి చెందిన వైరల్ ఇన్ఫెక్షన్.

జ్వరం మరియు తీవ్రమైన దగ్గు

తలనొప్పి, కండరాల నొప్పులు

చలి మరియు తీవ్ర అలసట

ప్రమాదం ఎవరికి ఎక్కువ?

చాలామంది సాధారణ చికిత్సతోనే కోలుకుంటున్నప్పటికీ, కొంతమందిలో న్యుమోనియా, ఆక్యూట్ రెస్పిరేటరీ డిస్ట్రెస్ సిండ్రోమ్ (ARDS) వంటి సమస్యలు వస్తున్నాయి. ముఖ్యంగా డయాబెటిస్, గుండె సంబంధిత సమస్యలు ఉన్నవారు, వృద్ధులు, గర్భిణులు మరియు రోగనిరోధక శక్తి తక్కువగా ఉన్నవారు హెచ్చరికతో ఉండాలని నిపుణులు సూచిస్తున్నారు.

నిర్ధారణ, చికిత్స మరియు జాగ్రత్తలు:

వ్యాధి నిర్ధారణకు ఆర్‌టీ-పీసీఆర్‌ (RT-PCR) లేదా రాపిడ్ యాంటిజెన్ పరీక్షలు చేస్తున్నారు.

లక్షణాలు కనిపించిన మొదటి 48 గంటల్లో 'ఆసెల్టామివిర్' అనే యాంటీవైరల్ మందు వాడటం మంచిది. యాంటీబయోటిక్స్ వాడకూడదని, కేవలం పారాసిటమాల్‌తో పాటు త్వరగా వైద్యుడిని సంప్రదించాలని సూచిస్తున్నారు. ఏటా ఇన్‌ఫ్లుయెంజా వ్యాక్సిన్ తీసుకోవడం ద్వారా నిరోధక శక్తి పెరుగుతుంది. వ్యాక్సిన్ తీసుకోవడానికి అక్టోబర్ నెల అనువైన సమయం. కేసుల సంఖ్య పెరుగుతున్నప్పటికీ ప్రజలు ఎలాంటి భయాందోళనకు గురికావాల్సిన అవసరం లేదని, తగిన జాగ్రత్తలు పాటిస్తే సురక్షితంగా ఉండవచ్చని ఆరోగ్య శాఖ తెలిపింది.