Supreme Court: బెంగాల్ కౌంటింగ్‌ వేళ మమతా బెనర్జీకి భారీ షాక్.. సుప్రీంకోర్టు సంచలన తీర్పు!

Supreme Court: పశ్చిమ బెంగాల్ రాజకీయాల్లో ఉత్కంఠ పోరు ముగిసి, ఫలితాల కోసం యావత్ దేశం ఎదురుచూస్తున్న వేళ ముఖ్యమంత్రి మమతా బెనర్జీకి గట్టి ఎదురుదెబ్బ తగిలింది. ఓట్ల లెక్కింపు ప్రక్రియలో పారదర్శకతపై తృణమూల్ కాంగ్రెస్ లేవనెత్తిన అభ్యంతరాలను సర్వోన్నత న్యాయస్థానం తోసిపుచ్చింది. ప్రజాస్వామ్య పండుగలో అత్యంత కీలకమైన కౌంటింగ్ సిబ్బంది నియామకంలో ఎన్నికల సంఘానిదే తుది నిర్ణయమని స్పష్టం చేసింది.

సుప్రీంకోర్టులో దీదీకి చుక్కెదురు

పశ్చిమ బెంగాల్ అసెంబ్లీ ఎన్నికల ఓట్ల లెక్కింపు మే 4న జరగాల్సి ఉంది. ఈ క్రమంలో కౌంటింగ్ కేంద్రాల్లో కేవలం కేంద్ర ప్రభుత్వ సిబ్బందిని మాత్రమే నియమించడాన్ని సవాలు చేస్తూ అధికార టీఎంసీ సుప్రీంకోర్టును ఆశ్రయించింది. అయితే, జస్టిస్ పీఎస్ నరసింహ, జస్టిస్ జోయ్‌మాల్య బాగ్చీలతో కూడిన ప్రత్యేక ధర్మాసనం ఈ పిటిషన్‌ను విచారించి, మమతా బెనర్జీ ప్రభుత్వానికి ప్రతికూల తీర్పును వెలువరించింది. ఓట్ల లెక్కింపు సిబ్బందిని ఎంపిక చేసుకునే పూర్తి అధికారం కేంద్ర ఎన్నికల సంఘానికి (ఈసీ) ఉందని, ఏప్రిల్ 13న ఈసీ జారీ చేసిన సర్క్యులర్‌ను తప్పుబట్టలేమని ధర్మాసనం తేల్చిచెప్పింది.

ఈసీ వాదనతో ఏకీభవించిన ధర్మాసనం

విచారణ సందర్భంగా ఎన్నికల సంఘం తన వాదనలను బలంగా వినిపించింది. కౌంటింగ్ సిబ్బందిగా కేవలం కేంద్ర ప్రభుత్వ ఉద్యోగులే కాకుండా, కేంద్ర , రాష్ట్ర ప్రభుత్వ ఉద్యోగుల మిశ్రమంగా ఉంటారని ఈసీ కోర్టుకు తెలిపింది. రిటర్నింగ్ అధికారిగా రాష్ట్ర ప్రభుత్వ ఉద్యోగి బాధ్యతలు నిర్వహిస్తారని, సిబ్బందిని నియమించే అధికారం ఆయనకే ఉంటుందని వివరించింది. ఓట్ల లెక్కింపులో అక్రమాలు జరుగుతాయన్న టీఎంసీ ఆందోళనల్లో ఎటువంటి వాస్తవం లేదని ఈసీ కొట్టిపారేసింది. తాము జారీ చేసిన నియమ నిబంధనలను తూచ తప్పకుండా అమలు చేస్తామని అత్యున్నత న్యాయస్థానానికి ఈసీ హామీ ఇచ్చింది.

టీఎంసీ అభ్యంతరాలు… కోర్టు ప్రశ్నలు

టీఎంసీ తరఫున సీనియర్ న్యాయవాది కపిల్ సిబల్ వాదిస్తూ, ఏప్రిల్ 13 నాటి ఈసీ సర్క్యులర్ గురించి తమకు ఏప్రిల్ 29న మాత్రమే తెలిసిందని కోర్టుకు చెప్పారు. ఆ సర్క్యులర్‌లో ఉన్న నిబంధనలను యథాతథంగా అమలు చేయాలని కోరారు. ఈ సందర్భంగా జస్టిస్ జోయ్‌మాల్య బాగ్చీ స్పందిస్తూ కీలక వ్యాఖ్యలు చేశారు. "సర్క్యులర్ అమలు కావాలని మీరు కోరుకుంటున్నప్పుడు, అసలు కోర్టు ముందుకు రావాల్సిన అవసరం ఏముంది?" అని ప్రశ్నించారు. ఈ వ్యవహారంలో తదుపరి ఆదేశాలు ఇవ్వాల్సిన అవసరం లేదని భావించిన ధర్మాసనం, టీఎంసీ పిటిషన్‌ను కొట్టివేసింది.

హైకోర్టు నుంచి సుప్రీంకోర్టు వరకు

వాస్తవానికి ఈ వివాదం తొలుత కలకత్తా హైకోర్టు మెట్లెక్కింది. ఈసీ నిర్ణయంలో ఎటువంటి అక్రమం లేదని హైకోర్టు అప్పట్లోనే స్పష్టం చేసింది. అయితే, అక్కడ ఊరట లభించకపోవడంతో మమతా బెనర్జీ సుప్రీంకోర్టును ఆశ్రయించారు. అక్కడ కూడా అదే ఫలితం రావడంతో టీఎంసీ శ్రేణుల్లో నిరాశ వ్యక్తమవుతోంది. బెంగాల్‌లో రెండు దశల్లో (ఏప్రిల్ 23 , 29) పోలింగ్ జరిగిన విషయం తెలిసిందే. రాష్ట్రంలో అధికారాన్ని నిలబెట్టుకోవాలని మమతా బెనర్జీ, ఈసారి ఎలాగైనా పాగా వేయాలని ప్రధాన ప్రతిపక్షాలు హోరాహోరీగా తలపడ్డాయి.

మే 4న తేలనున్న బెంగాల్ భవితవ్యం

సుప్రీంకోర్టు తీర్పుతో ఓట్ల లెక్కింపునకు ఉన్న అన్ని అడ్డంకులు తొలగిపోయాయి. కేంద్ర , రాష్ట్ర బలగాల పహారాలో, ఈసీ మార్గదర్శకాల ప్రకారం మే 4న కౌంటింగ్ నిర్వహించనున్నారు. లెక్కింపు ప్రక్రియపై పర్యవేక్షణ పెంచాలని, ఎటువంటి అవాంఛనీయ సంఘటనలు జరగకుండా జాగ్రత్తలు తీసుకోవాలని అధికారులను ఆదేశించారు. దేశవ్యాప్తంగా ఆసక్తి రేకెత్తిస్తున్న ఈ ఫలితాల్లో బెంగాల్ ప్రజలు ఎవరికి పట్టం కట్టారో తెలియాలంటే మరో రెండు రోజులు వేచి చూడక తప్పదు. ప్రజలు శాంతియుతంగా ఉండాలని, ఫలితాల విషయంలో ఎటువంటి భయాందోళనలకు గురికావాల్సిన అవసరం లేదని అధికారులు స్పష్టం చేశారు.